အာဏာသိမ်း စစ်ကောင်စီဟာ  သူခန့်ထားတဲ့ ပြည်ထောင်စုဝန်ကြီးတချို့နဲ့ ဗဟိုဘဏ်   အကြီးအကဲတွေကို ရာထူးတာဝန်ကနေ အနားပေးတာ၊ နေရာပြောင်းရွေ့တာတွေပြုလုပ်လိုက်ပြီး ပြည်ထောင်စုအစိုးရအဖွဲ့ ပြင်ဆင်ဖွဲ့စည်းလိုက်ကြောင်း ဩဂုတ် ၁၉ ရက်မှာ ကြေညာလိုက်ပါတယ်။

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီး ဦးခင်ရီ၊ ပြည်ထောင်စုအစိုးရအဖွဲ့ရုံးဝန်ကြီးဌာန (၂) ဦးချစ်နိုင်၊  နိုင်ငံတော်ဗဟိုဘဏ် ဥက္ကဋ္ဌ ဦးသိန်းညိန်းနဲ့ ဗဟိုဘဏ် ဒုဥက္ကဋ္ဌ တဦးဖြစ်တဲ့  ဦးဝင်းသော်တို့ကို တာဝန်ကနေ အနားပေးလိုက်တယ်လို့ စစ်ကောင်စီအတွင်းရေးမှူး ဒုဗိုလ်ချုပ်ကြီး အောင်လင်းဒွေး အမိန့်နဲ့ ထုတ်ပြန်လိုက်တာပါ။ 

ပြည်ထောင်စုစာရင်းစစ်ချုပ် ဒေါက်တာကံဇော်ကို ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးအဖြစ်လည်းကောင်း၊ အလုပ်သမားဝန်ကြီး ဦးမြင့်ကြိုင်ကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးအဖြစ်လည်းကောင်း၊ စီးပွားကူးသန်းဝန်ကြီး ဒေါက်တာပွင့်ဆန်းကို အလုပ်သမားဝန်ကြီးအဖြစ်လည်းကောင်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဦးအောင်နိုင်ဦးကို စီးပွားရေးနှင့် ကူးသန်းရောင်းဝယ်‌ရေးဝန်ကြီးအဖြစ်လည်းကောင်း ပြောင့်ရွေ့ခန့်အပ်လိုက်ပါတယ်။

ဒါ့ပြင် နိုင်ငံတော်ဗဟိုဘဏ် ဒုဥက္ကဋ္ဌ  ဒေါ်သန်းသန်းဆွေကို ဗဟိုဘဏ် ဥက္ကဋ္ဌအဖြစ် ပြောင်းလဲ  ခန့်အပ်တာဝန်ပေးလိုက်ပြီး ဒုဥက္ကဋ္ဌ အဖြစ် ဦးဇော်မြင့်နိုင်ကို ခန့်အပ်လိုက်ပါတယ်။ ဒေါ်သန်းသန်းဆွေဟာ ပြီးခဲ့တဲ့ ဧပြီလက  နေအိမ်မှာ သေနဲ့အပစ်ခံခဲ့ရပြီး အသက်မသေဘဲ ဒဏ်ရာရရှိခဲ့သူဖြစ်ပါတယ်။ 

ဘာကြောင့် အခုလို ပြောင်းလဲမှုတွေလုပ်ခဲ့တယ်ဆိုတာကိုတော့ စစ်ကောင်စီက ပြောဆိုတာမရှိပေမဲ့ နိုင်ငံတွင်းမှာ မြန်မာကျပ်ငွေတန်ဖိုး စံချိန်တင်ကျဆင်းပြီး တိုင်းပြည်စီးပွားရေး ယိုယွင်းပျက်စီး ကမောက်ကမ ဖြစ်နေချိန်မှာ  ဗဟိုဘဏ်အကြီးအကဲတွေနဲ့ စီးပွားကူးသန်းဝန်ကြီးနေရာတွေကို  အစားထိုး ခန့်အပ်လိုက်တာဖြစ်ပါတယ်။

အဂတိလိုက်စားမှုတိုက်ဖျက်ရေးကော်မရှင် ဥက္ကဋ္ဌ ဦးတင်ဦးကို စာရင်းစစ်ချုပ်အဖြစ် တာဝန်ပေးလိုက်ပြီး ပြည်ထောင်စုရာထူးဝန် ဥက္ကဋ္ဌ ဦးသန်းဆွေကို  အဂတိလိုက်စားမှုတိုက်ဖျက်ရေးကော်မရှင် ဥက္ကဋ္ဌအဖြစ် ပြောင်းလဲတာဝန်ပေးလိုက်ပါတယ်။

နေပြည်တော်ကောင်စီ ဥက္ကဋ္ဌ ဒေါက်တာမောင်မောင်နိုင်ကို  ပြည်ထောင်စုရာထူးဝန် ဥက္ကဋ္ဌ အဖြစ်ပြောင်းရွေ့တာဝန်ပေးလိုက်ပြီး နေပြည်တော်ကောင်စီ ဥက္ကဋ္ဌအဖြစ် ဦးတင်ဦးလွင်ကို ခန့်အပ်လိုက်ပါတယ်။

အားကစားနှင့် လူငယ်ရေးရာ ဝန်ကြီးဌာန ဒုဝန်ကြီးအဖြစ် ဒေါက်တာ စိုးဝင်းကို ခန့်အပ်တာဝန်ပေးလိုက်ပါတယ်။ 

ချင်းပြည်နယ်ဝန်ကြီးချုပ် ဦးငွန်ဆန်းအောင်ကို ရာထူးတာဝန်ကနေ အနားပေးလိုက်ပြီး သူ့ရဲ့နေရာမှာ ဒေါက်တာ ဝုန်ဆွန်းထန်ကို ခန့်အပ်လိုက်ပါတယ်။

ပဲခူးတိုင်း၊ မွန်ပြည်နယ်၊ ရှမ်းပြည်နယ်နဲ့ ဧရာဝတီတိုင်း လုံခြုံရေနဲ့ နယ်စပ်ရေးရာ ဝန်ကြီးတွေကိုလည်း အစားထိုးခန့်အပ်ကြောင်း ကြေညာထားပါတယ်။

အာဏာသိမ်းစစ်ကောင်စီရဲ့ ဆောင်ရွက်ချက်တွေအားလုံးဟာ တရားမဝင်သလို အသိအမှတ်မပြုတဲ့ အကြောင်း အမျိုးသားညီညွတ်ရေးအစိုးရ (NUG) က ကြေညာထားသလို ပြည်သူလူထုတွေက လည်း အာဏာသိမ်း စစ်ကောင်စီကို  လက်နက်ကိုင် ခုခံစစ်ပွဲဆင်နွှဲတာအပါအဝင် ရရာ နည်းလမ်း ပေါင်းစုံနဲ့ ဆန့်ကျင် တော်လှန်နေကြပါတယ်။

Photo- DSINFO

မြန်မာနိုင်ငံမှာရောက်ရှိနေတဲ့ အာဆီယံအလှည့်ကျဥက္ကဋ္ဌရဲ့ မြန်မာနိုင်ငံဆိုင်ရာအထူးကိုယ်စားလှယ် ကမ္ဘောဒီးယား နိုင်ငံခြားရေးဝန်ကြီး ပရတ်ဆာခွန်ဟာ  ဇွန် ၃၀ ရက်က နေပြည်တော်မှာ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်အပါအဝင်  ဝန်ကြီးတွေနဲ့ တွေ့ဆုံခဲ့ပါတယ်။

တွေ့ဆုံရာမှာ အာဆီယံဘုံသဘောတူညီချက် ၅ ရပ်ကို အကောင်အထည်ဖော်ရေးကိစ္စ၊ နိုင်ငံတွင်း အကြမ်းဖက်မှုတွေဖြစ်ပွားနေတဲ့ကိစ္စ၊ စာသင်ကျောင်းတွေပြန်ဖွင့်တဲ့ကိစ္စ၊ တိုင်းရင်းသားလက်နက်ကိုင် အဖွဲ့တွေနဲ့ ငြိမ်းချမ်းရေးဆွေးနွေးနေတဲ့ကိစ္စနဲ့  လူသားချင်းစာနာထောက်ထားမှုဆိုင်ရာ အကူအညီများရရှိစေရေးကိစ္စတွေဆွေးနွေးခဲ့တယ်လို့ စစ်ကောင်စီ ပြန်ကြားရေးက သတင်းထုတ်ပါတယ်။

အာဆီယံအထူးကိုယ်စားလယ်ဟာ စစ်ကောင်စီခန့် ပြည်ထောင်စုဝန်ကြီးတွေဖြစ်တဲ့  နိုင်ငံခြားရေးဝန်ကြီး ဦးဝဏ္ဏမောင်လွင်နဲ့  အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး ဦးကိုကိုလှိုင်တို့နဲ့လည်း တွေ့ဆုံခဲ့ပါတယ်။ 

ဦးကိုကိုလှိုင်နဲ့တွေ့ဆုံရာမှာတော့ အာဆီယံ အထူးကိုယ်စားလှယ်ဟာ  မြန်မာနိုင်ငံသို့ လူသားချင်းစာနာမှုအကူအညီပေးခြင်းဆိုင်ရာ ပထမအဆင့် လုပ်ငန်းစဉ် အကောင်အထည်ဖော်ပြီးမြောက်မှု ဖြစ်ပေါ်တိုးတက်မှုများ၊ ဒုတိယအဆင့် အကောင်အထည်ဖော်ရန် ပြင်ဆင်ဆောင်ရွက်ထားရှိမှုတွေနဲ့ မြန်မာမှာ ကိုဗစ်-၁၉ ကာကွယ်ဆေးစီမံခန့်ခွဲမှုမူဘောင် အကောင်အထည်ဖော်ခြင်းကိစ္စရပ်များအပေါ် အမြင်ချင်းဖလှယ်ဆွေးနွေးခဲ့ကြပါသည်။ 

ဒါ့အပြင် အာဆီယံ လူသားချင်းစာနာထောက်ထားမှု အကူအညီများပေးအပ်ရာမှာ အမှန်တကယ်လိုအပ်နေသူတွေကို ခွဲခြားမှုမရှိဘဲ မျှတစွာပေးအပ်သွားနိုင်ရေးအတွက် အာဆီယံအတွင်းရေးမှူးချုပ်၊ AHA Centre နဲ့ လက်ရှိအာဆီယံ ဥက္ကဋ္ဌတို့ ပူးပေါင်းဆောင်ရွက်သွားမယ်လို့ ပြောဆိုခဲ့တယ်လို့ဆိုပါတယ်။

ဦးဝဏ္ဏမောင်လွင်နဲ့ တွေ့ဆုံရာမှာလည်း  အာဆီယံ တူညီဆန္ဒ(၅)ချက် အကောင်အထည်ဖော်ခြင်း လုပ်ငန်းစဉ်တွေ၊ အာဆီယံလူသားချင်းစာနာထောက်ထားမှု အကူညီကိစ္စတွေအပြင် အကြမ်းဖက်မှုများရပ်တန့်ရေး၊ တိုင်းရင်းသားလက်နက်ကိုင်အဖွဲ့တွေနဲ့ ငြိမ်းချမ်းရေးဆွေးနွေး နေတဲ့ကိစ္စတွေဆွေးနွေးခဲ့တယ်လို့သိရပါတယ် ။ 

တူညီဆန္ဒ(၅)ချက် အကောင်အထည်ဖော်ရာမှာ မြန်မာနိုင်ငံအနေနဲ့ အာဆီယံပဋိညာဉ်နဲ့ အခြေခံမူတွေအပေါ်အခြေခံပြီး အာဆီယံနဲ့ ဆက်လက်ပူးပေါင်းဆောင်ရွက် သွားမည်ဖြစ်ကြောင်း အာဆီယံအဖွဲ့ဝင်နိုင်ငံတွေအနေနဲ့လည်း အာဆီယံပဋိညာဉ်နဲ့ အာဆီယံရဲ့အဓိကမူတွေကို လေးစားလိုက်နာဖို့နဲ့ အပြန်အလှန် လေးစားမှုရှိဖို့ စစ်ကောင်စီ ဝန်ကြီးက ပြောကြားခဲ့တယ်လို့ စစ်ကောင်စီ နိုင်ငံခြားရေးဌာနက သတင်းထုတ်ထားပါတယ်။

အာဆီယံ အထူးကိုယ်စားလှယ်ဟာ မနေ့က ရန်ကုန်မှာကျင်းပတဲ့ တရုတ်နိုင်ငံက မြန်မာအတွက် ကိုဗစ်-၁၉ ကာကွယ်ဆေးတွေကို အာဆီယံကနေ တဆင့်ပေးအပ်တဲ့ အခမ်းအနားကိုလည်း တက်ရောက်ခဲ့ပါတယ်။

အာဆီယံအထူးကိုယ်စားလှယ်ဟာ မြန်မာခရီးစဉ်အတွင်းမှာ နိုင်ငံရေးပါတီ တချို့နဲ့ တွေ့ဆုံဖို့ရှိသလို အပစ်ရပ် တိုင်းရင်းသားလက်နက်ကိုင်အဖွဲ့တချို့နဲ့လည်း တွေ့ဆုံဆွေးနွေးဖို့ရှိနေပါတယ်။  နေပြည်တော်ထောင်မှာ ဖမ်းဆီးထိန်းသိမ်း အကျဉ်းကျခံနေရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့တော့ တွေ့ဆုံခွင့်မရသေးပါဘူး။  

ပရတ်ဆာခွန်း ဦးဆောင်တဲ့ အာဆီယံသံတမန်များအဖွဲ့ဟာ မြန်မာနိုင်ငံမှာ ကာလရှည်ကြာဖြစ်ပေါ်နေတဲ့ ပဋိပက္ခတွေအပေါ် ငြိမ်းချမ်းစွာအဖြေရှာနိုင်ရေးအတွက် ဇွန်လ ၂၉ ရက်နေ့ကနေ ဇူလိုင်လ ၃ ရက်နေ့အထိ ၅ ရက်ကြာလာရောက်တာဖြစ်ပြီး ဒါဟာ သူ့ရဲ့ ဒုတိယ အကြိမ်မြောက် မြန်မာပြည်ခရီးစဉ်လည်းဖြစ်ပါတယ်။

အာဆီယံအထူးကိုယ်စားလှယ် ပရတ်ဆာခွန်းဟာ ပြီးခဲ့တဲ့ မတ်လ ၂၁ ရက် ကလည်း မြန်မာနိုင်ငံကို ပထမအကြိမ် လာရောက်ခဲ့ပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံကာ အာဆီယံ ဘုံသဘောတူညီချက် (၅) ရပ်အပေါ် အကောင်အထည်ဖော်ရေး၊ လူသားခြင်းစာနာ ထောက်ထားမှုဆိုင်ရာ အကူအညီကိစ္စတွေ ဆွေးနွေးခဲ့ပေမဲ့ ဘာရလဒ်မှ ထွက်မလာခဲ့ပါဘူး။