ရန်ကုန်တိုင်း၊ သန်လျင်မြို့နယ်၊ မြို့မမြောက်ရပ်ကွက်၊ မြို့မဈေးအနီး၊ လမ်းမတော်လမ်းနဲ့ ဇာတ်ရုံ လမ်းထောင့်က ဝန်ထမ်းလိုင်းခန်းတွဲမှာ မေ ၉ ရက် မနက်အစောပိုင်းက မီးလောင်မှု ဖြစ်ပွား ခဲ့တယ်လို့ မြန်မာမီးသတ်ဌာနချုပ်က သိရပါတယ်။

မနက် ၀၀ နာရီ ၂၇ မိနစ်ခန့်က မီးလောင်မှု သတင်းရခဲ့ပြီး သန်လျင်မီးသတ်ဌာန မီးသတ်ယာဉ် ၅ စီးနဲ့ အရပ်ဖက်အသင်းတွေက ဝိုင်းဝန်းငြှိမ်းသတ်ခဲ့တာကြောင့် မနက် ၁ နာရီလောက် မီးငြိမ်း သွားပါတယ်။

မြို့ခံကယ်ဆယ်ရေးအသင်း ယာဉ်တာဝန်ခံက "စက်ရုံလိုင်းခန်းတွဲ စာတိုက်ဘေးက လမ်းမှာ လောင်တာပါ။ မြို့မမြောက်ရပ်ကွက် အပိုင်ထဲကပဲ။ မီးသတ်ကားက ၅ စီး လောက်လာတယ်။ အတွင်းပိုင်း အကုန်လုံး ပျက်စီးသွားတယ်။ လူထိခိုက်တာ တော့ မရှိဘူး "လို့ ဆိုပါတယ်။

မီးလောင်မှုကြောင့် သန်လျင်ရေနံချက်စက်ရုံဝန်ထမ်းလိုင်းခန်းတွဲ သွပ်မိုးအုတ်ကာ ၁ ထပ် အဆောက်အအုံ ၆ ခန်းတွဲ ပျက်စီးဆုံးရှုံးသွားပြီး လူထိခိုက်မှု မရှိဘူးလို့ သိရပါတယ်။ 

မီးစတင်လောင်ကျွမ်းရတဲ့ အကြောင်းအရင်းနဲ့ ပျက်စီး ဆုံးရှုံးမှုတန်ဖိုးကို တွက်ချက် နေဆဲ ဖြစ်တယ်လို့ သိရပြီး မီးလောင်ကျွမ်းမှုစတင်ခဲ့တဲ့ အခန်းနေသူကိုတော့  သန်လျင်မြို့မရဲစခန်းမှာ အမှုဖွင့်စစ်ဆေးနေတယ်လို့ သိရပါတယ်။

ရန်ကုန်မှာ မေ ၁ ရက်က ‌တောင်ဥက္ကလာပမြို့နယ်မှာ မီးလောင်မှုကြောင့် နေအိမ် ၄ လုံး၊ မေ ၄ ရက်က သာကေတမြို့နယ်မှာ မီးလောင်မှုကြောင့် နေအိမ် ၆လုံးနဲ့ တခြမ်း၊ မေ ၇ ရက်က အင်းစိန်မြို့နယ်မှာ မီးလောင်မှုကြောင့်  နေအိမ် ၁ လုံးနဲ့ အိမ်ခန်း ၄ ခန်းတွဲ ပျက်စီးဆုံးရှုံးခဲ့ပါတယ်။

ရှမ်းပြည်နယ်မြောက်ပိုင်း၊ နောင်ချိုမြို့မှာ ဖေဖော်ဝါရီ ၂၃ ရက် ဒီမနက် ၁ နာရီခွဲလောက်က နောင်ချိုဘူတာရုံ ၀န်ထမ်းလိုင်းခန်းနဲ့ လုံခြုံရေး တန်းလျားကို အမည်မသိလက်နက်ကိုင်အဖွဲ့က ၀င်ရောက်တိုက်ခိုက်သွားတယ်လို့ ဒေသခံတွေထံက သိရပါတယ်။

“နောင်ချိုမြို့ ဘူတာရုံနဲ့ ကတီပင် ဘုန်းကြီးကျောင်းတောင်ဘက်မှာ ပစ်ခတ်သံတွေ ဆက်တိုက်ကြားနေရပြီး လက်နက်ကြီးသံတွေ ပေါက်ကွဲသံတွေပါ ကြားနေရတယ်”လို့ ဒေသခံတစ်ဦးက ဒီဗွီဘီကို ပြောပါတယ်။

နာရီဝက်လောက် အပြန်အလှန်တိုက်ခိုက်မှုအတွင်း အရပ်သားတချို့ ထိခိုက်ဒဏ်ရာ အနည်းငယ် ရခဲ့ပြီး ဘူတာရုံလိုင်းခန်းတချို့ ထိခိုက်ပျက်စီးခဲ့တယ်လို့ သိရပါတယ်။

ဒီတိုက်ခိုက်မှုကိုတော့ ဘယ်အဖွဲ့က လုပ်ဆောင်တယ်ဆိုတာ မသိရသေးသလို ဘယ်အဖွဲ့ကမှ သူတို့လက်ချက်လို့ ထုတ်ပြန်တာလည်း မရှိသေးပါဘူး။ 

ရှမ်းပြည်နယ်မြောက်ပိုင်းမှာ တိုင်းရင်းသား လက်နက်ကိုင်အဖွဲ့အစည်းတွေများစွာ  ရှိသလို ပြည်သူ့ကာကွယ်ရေးတပ်ဖွဲ့ PDF တွေလည်း အားကောင်းတဲ့ ဒေသတစ်ခု ဖြစ်ပါတယ်။