အမေဇုံ နိုင်ငံတကာကော်ပိုရေးရှင်းဟာ အခုသီတင်းပတ်ကစပြီး ကော်ပိုရိတ်နဲ့ နည်းပညာကဏ္ဍတွေက ဝန်ထမ်းပေါင်း ၁၀,၀၀၀ လောက်ကို ရာထူးကနေထုတ်ပစ်ဖို့ စီစဉ်နေတယ်လို့ အဲဒီကိစ္စနဲ့ ရင်းနှီးသူတဦးက နိုဝင်ဘာ ၁၄ ရက်မှာ ပြောပါတယ်။

ဒီပမာဏဟာ ဒီနေ့အထိ အကြီးမားဆုံး ဝန်ထမ်းလျှော့ချမှု ဖြစ်လိမ့်မယ်လို့လည်း ဆိုပါတယ်။

နယူးယောက်တိုင်းမ်စ် သတင်းဌာနက အစောပိုင်းမှာ ဖော်ပြခဲ့တဲ့ ဖြတ်တောက်မှုဟာ အမေဇုံရဲ့ ကော်ပိုရိတ်ဝန်ထမ်း  ၃ ရာခိုင်နှုန်းလောက် ရှိနေတာပါ။

အမေဇုံအောက်က လုပ်ငန်းတွေဟာ သူတို့ရဲ့ ဦးစားပေးတွေကို ပြန်သုံးသပ်နေလို့ အရေအတွက် အတိအကျ ကွဲပြားနိုင်တယ်လို့ သတင်းရင်းမြစ်က ရိုက်တာသတင်းဌာနကို ပြောပါတယ်။

အွန်လိုင်းလက်လီရောင်းချသူ အမေဇုံဟာ အသံနဲ့ ထိန်းချုပ်ထားတဲ့ အလက်ဇာ ဂက်ဂျက်တွေနဲ့  အိမ်လုံခြုံရေး ကင်မရာတွေအပြင် သူ့ရဲ့ လူ့စွမ်းအားအရင်းအမြစ်နဲ့ လက်လီရောင်းချတဲ့ ဌာနခွဲတွေမှာ ပါရှိတဲ့ စက်ပစ္စည်းအဖွဲ့အစည်းထဲက ဝန်ထမ်းတွေကို ဖယ်ရှားဖို့ စီစဉ်နေတယ်လို့ အဲဒီသတင်းရင်းမြစ်က ဆက်ပြောပါတယ်။

ဝန်ထမ်းတွေကို အသိပေးဖို့ အမေဇုံရဲ့ အချိန်သတ်မှတ်ချက်က ရှင်းရှင်းလင်းလင်း မသိရသေးပါဘူး။

အမေဇုံနဲ့ တခြားကုမ္ပဏီတွေ ရင်ဆိုင်ကြုံတွေ့နေရတဲ့ မသေချာ မရေရာတဲ့ မက်ခရိုစီးပွားရေး ပတ်ဝန်းကျင်ကြောင့် ဝန်ထမ်းလျှော့ချတာလို့ သတင်းရင်းမြစ်က ယူဆနေပါတယ်။

ပြီးခဲ့တဲ့သီတင်းပတ်က ဖေ့စ်ဘွတ်ခ်ရဲ့ မိခင်ကုမ္ပဏီ မေတာ ပလက်ဖောင်း နိုင်ငံတကာ ကော်ပိုရေးရှင်းဟာ ကုန်ကျစရိတ်ကိုထိန်းချုပ်ဖို့ လုပ်သားဦးရေ ၁၁,၀၀၀ ဒါမှမဟုတ် လုပ်သားအင်အားရဲ့ ၁၃ ရာခိုင်နှုန်းကျော်ကို ဖြတ်တောက်မယ်လို့ ပြောခဲ့ပါတယ်။

အမေရိကန်နိုင်ငံ ဆီယက်တယ်မြို့အခြေစိုက် အမေဇုံဟာ ပုံမှန်အားဖြင့် အမြတ်အစွန်းများတဲ့ အားလပ်ရက်ရာသီအတွက် အရောင်းတိုးတက်မှုနှုန်း နှေးကွေးမယ်လို့ ခန့်မှန်းထားပါတယ်။