ကရင်ပြည်နယ်၊ မြဝတီမြို့နယ်၊ သောင်ရင်းမြစ်ဘေးမှာ စစ်ဘေးရှောင်ခိုလှုံနေတဲ့ ကလေးငယ် ၃၀၀ နီးပါးဟာ နေထိုင်မကောင်းတဲ့အပြင် ဝမ်းရောဂါတွေ ဖြစ်ပွားနေတဲ့အတွက်  ဆေးဝါးလိုအပ်နေတယ်လို့ ကျန်းမာရေးစောင့်ရှောက်မှုပေးနေသူတွေက ပြောပါတယ်။

ဖေဖော်ဝါရီ ၁၆ ရက်က စတင်ပြီး စစ်ကောင်စီနဲ့ ကရင်အမျိုးသားလွတ်မြောက်ရေးတပ်မတော် (KNLA)၊ ပြည်သူ့ကာကွယ်ရေးအဖွဲ့ (PDF) ပူးပေါင်းတပ်တို့ တကျော့ပြန် ပြန်လည်ဖြစ်ပွားခဲ့တဲ့ နှစ်ဘက်တိုက်ပွဲတွေကြောင့် ကျေးရွာ ၅ ရွာက ထောင်နဲ့ချီတဲ့ နေရပ်ပြန် စစ်ဘေးရှောင်တွေဟာ ပြန်လည်ထွက်ပြေးတိမ်းရှောင်ခဲ့ကြရပြီး နေထိုင်စားသောက်ရေးအပြင် ကျန်းမာရေး မကောင်းမွန်တာတွေနဲ့ ရင်ဆိုင်နေရတာပါ။

၁၇ ရက် ညကစတင်ပြီး အချိန်အခါမဟုတ် နေ့စဉ်မိုးရွာသွန်းမှုတွေကြောင့် မိုးမိတာ၊ သောက်သုံးရေ မလုံလောက်တဲ့အတွက် သန့်ရှင်းမှုမရှိတဲ့ သောင်ရင်းမြစ်ရေကို သောက်သုံးနေရတာတွေကြောင့် ရောဂါတွေ ဖြစ်ပွားနေပြီး ကုသရေးအတွက် ဆေးဝါးတွေ အခက်အခဲတွေရှိတယ်လို့ ကျန်းမာရေးဆရာမတစ်ဦးက ပြောပါတယ်။

“အခုက ကလေးတွေက ကိုယ်ပူတယ်။ ဝမ်းသွားတယ်။ အန်တယ်။ လူကြီးတွေကျတော့ မိုးရွာထဲမှာ နေရတဲ့အခါကျတော့ မိုးထိတော့ အဖျားတွေ တအားတက်ကျတယ်။ ပြီးတော့ သွေးတိုးသမားတွေ အရမ်းများတယ်။ ကုသဖို့က ဆေးမရှိဘူး။ စိုးရိမ်စရာတော့ မတွေ့သေးဘူး။ ဒါပေမဲ့ ရှေ့ဆက်တော့ စိုးရိမ်တယ်။”

စစ်ဘေးရှောင်ပြည်သူတစ်ဦးက “အားလုံးက ကိုယ်အိမ်လို မဟုတ်တဲ့အတွက် အခက်အခဲတွေ ရှိတယ်။ နေရေးထိုင်ရေး၊ စားရေးသောက်ရေး၊ သွားရေးလာရေး၊ ဒူ ဒူ (သေနတ်)သံကြားရင် ပိုးဆိုးတယ်။ အခက်အခဲက အများကြီးပဲ။ အလှူရှင်တွေဆီက ရတဲ့ဟာကို ဆေးရရင် ဆေးပြေးဝယ်မယ်။ ရေရရင် ရေပြေးဝယ်မယ်။ အလှူရှင်ရှိတော့လည်း လာဖို့က အဆင်မပြေးဘူး” လို့ ပြောပါတယ်။

စစ်ဘေးရှောင်ပြည်သူတွေရဲ့ နေထိုင်စားသောက်ရေးအတွက်  ပြင်ပရောက် မြန်မာနိုင်ငံသားတွေရဲ့ ကူညီလှူဒါန်းလိုက်တဲ့ စားနပ်ရိက္ခာနဲ့ ပစ္စည်းတွေကို သွားရောက်လှူဒါန်းတာတွေရှိနေပေမဘ့် ထိုင်းနိုင်ငံရဲ့ ဒေသလုံခြုံရေးနဲ့ ကိုဗစ်စည်းကမ်း ကန့်သတ်ချက်တွေကြောင့် စစ်ဘေးရှောင်တွေဟာ အခက်အခက်တွေနဲ့ ရင်ဆိုင်နေရတာပါ။

ဇန်နဝါရီ ၂၇ ရက်က တာခ်ခရိုင်၊ မဲဆောက်မြို့နယ်၊ မဟာဝမ်းတိုက်နယ်၊ မဲကိုကင်းရွာအနီးက မဲ့ကိုကင်းစစ်ဘေးရှောင်စခန်းကို ထိုင်းအာဏာပိုင်တွေက အပြီးပိတ်သိမ်းလိုက်တဲ့အတွက် ကျေးရွာ ၁၀ ရွာက ထောင်နဲ့ချီတဲ့ ဒေသခံတွေထဲမှာ အမျိုးသမီးတွေ၊ ကိုယ်ဝန်ဆောင်မိခင်တွေ၊ ကလေးငယ်တွေနဲ့ သက်ကြီးရွယ်အိုတွေ အများဆုံးပါဝင်ပြီး နယ်စပ်သောင်းရင်းမြစ်တလျှောက်မှာ ခိုလှုံနေရတာပါ။

စစ်ကောင်စီတပ် မီးရှို့ဖျက်ဆီးတာကြောင့် ရွာလုံးကျွတ် ထွက်ပြေးတိမ်းရှောင်နေကြရတဲ့ စစ်ကိုင်းတိုင်း၊ ကလေးမြို့နယ်၊ နတ်ချောင်းကျေးရွာက တောတွင်းစစ်ဘေးရှောင်စခန်းတစ်ခုမှာ ဝမ်းရောဂါ ခံစားနေကြရတယ်လို့ စစ်ဘေးရှောင်တွေဆီက သိရပါတယ်။

တောတွင်း ဘုန်းကြီးကျောင်းတစ်ချောင်းမှာ ခိုလုံနေကြတဲ့  စစ်ဘေးရှောင်တွေမှာ မသန့်ရှင်းတဲ့ ရေတွေ သောက်သုံးမိတာကြောင့် ဝမ်းရောဂါ ခံစားနေကြရတာလို့ သိရပါတယ်။

ဝမ်းရောဂါ ဖြစ်တဲ့အပြင်  ရာသီဥတု အအေးဒဏ်ကိုလည်း အန်တုခံစားနေကြရတယ်လို့ စစ်ဘေးရှောင်တွေဆီက သိရပါတယ်။

စစ်ဘေးရှောင်တွေအနေနဲ့ စားသောက်ရေးအတွက် အခက်အခဲဖြစ်နေသလို ကျန်းမာရေး စောင့်ရှောက်မှုလည်း လိုအပ်နေတယ်လို့ သိရပါတယ်။

လျှပ်စစ်မီး မရရှိတဲ့အပြင် ဖုန်းနဲ့အကူအညီ ဆက်သွယ်တောင်းခံဖို့အတွက်လည်း ဖုန်းငွေဖြည့်ကတ်ဝယ်မရတာတွေ၊ ဖုန်းလိုင်းမမိတာတွေ နဲ့ ရင်ဆိုင်နေရတယ်လို့ စစ်ဘေးရှောင်တွေကပြောပါတယ်။

“စားရေးသောက်ရေးကတော့ ကိုယ့်မိသားစုအတွက် ကိုယ်တိုင်ဖြစ်သလို စီစဉ်ရတယ်။ အချင်းချင်းကူညီပြီး အနီးနားက ရွာတချို့ကလည်းကူညီကြတယ်။ စစ်ဘေးရှောင်လာတာက နှစ်ပတ်လောက်ရှိပြီ အိမ်တွေကလည်း မီးရှို့ခံလိုက်ရတယ်။ တစ်ရွာလုံးပဲ ထွက်ပြေးရတာက စကစက ဝင်မီးရှို့သွားတာ၊ သောက်တဲ့ရေရော သုံးစွဲကြတဲ့ရေရော မသန့်လို့ ဝမ်းပျက်ကြတယ်။ ဝမ်းလျောကြတယ်။ ဆေးလှူချင်တဲ့ သူတွေလည်းရှိတယ်၊ ဒါပေမယ့် ဒီဘက်ကိုလာလို့ မရဘူးလို့လည်းပြောကြတယ်” လို့ စစ်ဘေးရှောင်တစ်ဦးက ပြောပါတယ်။

နတ်ချောင်းကျေးရွာက ဒေသခံတွေဟာ နှစ်ပတ်ကြာလောက်အထိ ထွက်ပြေးတိမ်ရှောင်နေခဲ့ရပြီး နေအိမ်တွေလည်း မီးရှို့ဖျက်ဆီးခံထားရတာကြောင့် ဒီနေ့ထက်ထိ နေရပ်ကိုပြန်နိုင်ခြင်း မရှိသေးပါဘူး။

စစ်ကောင်စီတပ်ဖွဲ့ဟာ နတ်ချောင်းကျေးရွာအတွင်းကို ဒီဇင်ဘာ ၂၂ ရက်နေ့ကတည်းက ကျေးရွာအတွင်းက နေအိမ်တွေကို မီးရှို့ဖျက်ဆီးတော၊ ပြုလုပ်ခဲ့ကြတာဖြစ်ပါတယ်။

နတ်ချောင်းကျေးရွာမှာ ဒေသခံပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်ပွားခဲ့ပြီး စစ်ကောင်စီတပ်က ရဟတ်ယာဉ်တွေနဲ့ကျေးရွာအတွင်း ပစ်ခတ်ခဲ့တာဖြစ်ပါတယ်။ ဇန်နဝါရီ ၃ ရက်နေ့မှာ နတ်ချောင်းကျေးရွာအတွင်းကို ထပ်မံဝင်ရောက်ပြီး ရန်ကင်းဘုန်းတော်ကြီးကျောင်းအတွင်းမှာ တပ်စွဲနေထိုင်ခဲ့ကြပါတယ်။

တပ်စွဲနေထိုင်ကြပြီး ချောင်းခွ၊ ပန်းမွန်ချောင်း၊ နတ်မြောင်း၊ စတဲ့ကျေးရွာတွေက ပြည်သူတွေမွေးမြူထားတဲ့ တိရိစ္ဆာန်တွေကို သတ်ဖြတ်စားသောက်ပြီး နေအိမ်တွေအတွင်းက တန်ဖိုကြီးပစ္စည်းတွေကို ယူဆောင်သွားကြတယ်လို့ ဒေသခံတွေက ပြောပါတယ်။