ရန်ကုန်မြို့က အများပြည်သူပိုင် တနိုင်တပိုင် အသေးစားဆိုလာစနစ်ကနေ ပိုလျှံတဲ့ လျှပ်စစ်ဓာတ်အားတွေကို ဝယ်ယူလိုကြောင်း ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း (YESC) က ဧပြီ ၂၁ ရက် ဒီနေ့ အသိပေးကြေညာပါတယ်။

ရန်ကုန်မြို့မှာရှိတဲ့ ဈေးဝယ်စင်တာတွေ၊ ဟိုတယ်တွေ၊ စက်ရုံ၊ အလုပ်ရုံတွေ၊ နေအိမ်တွေ၊ အဆောက်အဦတွေရဲ့ ခေါင်မိုးပေါ်နဲ့ အများပြည်သူ၊ လုပ်ငန်းရှင်တွေရဲ့ ကိုယ်ပိုင်မြေနေရာတွေပေါ်မှာ တနိုင်တပိုင် တပ်ဆင်ထားတဲ့ ဓာတ်အားကွန်ရက်ချိတ်ဆက် အသေးစားဆိုလာစနစ်ကနေ အသုံးပြုပြီး ပိုလျှံတဲ့ လျှပ်စစ်ဓာတ်အားတွေကို ရန်ကုန်ဓာတ်အားဖြန့်ဖြူးမှု ကွန်ရက်စနစ်ကို ချိတ်ဆက်ရောင်းချလိုပါက ဝယ်ယူသွားမယ်လို့ YESC ရဲ့ ကြေညာချက်မှာ ဖော်ပြထားတာပါ။

ဓာတ်အားခနှုန်းထားအနေနဲ့ ၁၀၀ ကီလိုဝပ်ကနေ ၁ မဂ္ဂါဝပ်အတွင်း ရောင်းချပါက ၁ ကီလိုဝပ်ကို ၈၅ ကျပ်နှုန်း၊ ၁ မဂ္ဂါဝပ် အထက်ကနေ ၁၀ မဂ္ဂါဝပ်အထိဖြစ်ပါက ၁ ကီလိုဝပ်ကို ၈၀ ကျပ်နှုန်းနဲ့ ဝယ်ယူသွားမယ်လို့ ထုတ်ပြန်ချက်မှာ ပါရှိပါတယ်။

ဓာတ်အားကွန်ရက်ချိတ်ဆက် အသေးစားဆိုလာစနစ်အတွက် နည်းပညာဆိုင်ရာ သတ်မှတ်ချက်တွေ၊ လျှောက်ထားရမယ့် လုပ်ငန်းစဉ်တွေနဲ့ ပတ်သက်တဲ့ အသေးစိတ် အချက်အလက်တွေကိုတော့ ထပ်မံထုတ်ပြန် ကြေညာပေးသွားမယ်လို့ ဆိုပါတယ်။

လက်ရှိမှာ နိုင်ငံတဝန်း လျှပ်စစ်မီးပြတ်တောက်မှုတွေက ဆိုးဆိုးရွားရွား ဖြစ်ပေါ်နေပြီး တရက်ကို ၂၄ နာရီနီးပါး ပြတ်တောက်နေတဲ့ နေရာဒေသတွေရှိသလို သတ်မှတ်ချိန်ထက်ပိုပြီး လျှပ်စစ်မီးပြတ်တောက်နေတဲ့ နေရာဒေသတွေလည်း ရှိနေပါတယ်။

လျှပ်စစ်မီး ဆိုးဆိုးရွားရွား ပြတ်တောက်မှုက လူထုအကြားမှာ အဆင်မပြေမှုတွေ ကြုံတွေ့နေရပြီး စီးပွားရေးလုပ်ငန်းတွေလည်း အခက်ကြုံနေရပါတယ်။

တရုတ်နိုင်ငံက ဝယ်ယူထားတဲ့ Sinopharm ကိုဗစ်-၁၉ ကာကွယ်ဆေး ၄ သန်း စက်တင်ဘာ ၂၆ ရက်ညနေပိုင်းမှာ ထပ်မံရောက်ရှိလာခဲ့တယ်လို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက ထုတ်ပြန်ပါတယ်။

အဆိုပါ ထုတ်ပြန်ချက်ထဲမှာတော့ တရုတ်နိုင်ငံကနေ မြန်မာအစိုးရက ကာကွယ်ဆေးအကြိမ်ရေ ၂၄ သန်း စာချုပ်ချုပ်ဆိုဝယ်ယူထားခဲ့တာလို့ ဖော်ပြပါတယ်။

ခုလက်ရှိရောက်လာခဲ့တဲ့ ကာကွယ်ဆေး အလုံးရေ ၄ သန်းကတော့ ဝယ်ယူထားတာတွေထဲက ဒုတိယအသုတ်အနေနဲ့ ရောက်ရှိလာခဲ့တာဖြစ်ပြီး ပထမဆုံးအသုတ် ၄ သန်းကတော့ ပြီးခဲ့တဲ့ စက်တင်ဘာ ၁၂ ရက်မှာ ရောက်ရှိခဲ့ပြီး ဖြစ်ပါတယ်။

ဒါ့အပြင် စက်တင်ဘာ ၂၆ ရက်နေ့အထိ ကျန်းမာရေးဝန်ကြီးဌာနက ဝယ်ယူထားတဲ့ COVISHIELD ကာကွယ်ဆေး ၂ သန်း၊ Sinopharm ကာကွယ်ဆေး ၁၀ သန်း၊ Sinovac ကာကွယ်ဆေး ၂ သန်းနဲ့ စုစုပေါင်း ၁၄ သန်း ရောက်ရှိခဲ့ပြီးဖြစ်တယ်လို့ ဆိုပါတယ်။

မြန်မာနိုင်ငံမှာတော့ လက်ရှိအချိန်ထိ ရောဂါကူးစက်ခံရသူပေါင်း ၄ သိန်းခွဲကျော်နဲ့ သေဆုံးသူ ၁၇,၀၀၀ ကျော်ထိ ရှိလာနေပြီလို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက ဖော်ပြပါတယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ် ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှုတိကျတဲ့ ပမာဏအတိုင်းအဆကို မသိနိုင်သေးပါဘူး။

မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၈ လနီးပါး ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် မြန်မာနိုင်ငံတဝန်း ကာကွယ်ဆေးထိုးနှံပြီးသူ အရေအတွက်ဟာ ၇ သန်း ကျော်ရှိခဲ့ပြီလို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ထားပေမယ့် ပြည်သူတွေကြားမှာတော့ အကြမ်းဖက်စစ်ကောင်စီကို မယုံကြည်ကြတာမို့ ကာကွယ်ဆေးသွား ရောက်ထိုးနှံသူ အရေအတွက်ဟာ နည်းပါးတယ်လို့ သိရပါတယ်။