ရန်ကုန်၊ အင်းစိန်မြို့နယ်၊ ကမ်းနားအလယ်ရပ်ကွက်၊ ခေမာတောင်လမ်းမှာ မေလ ၇ ရက် မနက်အစောပိုင်းက ဝါယာရှော့ဖြစ်ပြီး မီးလောင်မှုဖြစ်ပွားခဲ့တာကြောင့် နေအိမ် ၁ လုံးနဲ့ အိမ်ခန်းတွဲ ၄ ခန်း ပျက်စီးဆုံးရှုံးခဲ့တယ်လို့ မြန်မာနိုင်ငံမီးသတ်ဌာနချုပ်ကနေ သိရပါတယ်။
မနက် ၂ နာရီ ၅၆ မိနစ်လောက်က မီးသတင်းရခဲ့တာကြောင့် အင်းစိန်မြို့နယ် မီးသတ်ယာဉ်တွေနဲ့ ကယ်ဆယ်ရေးအသင်းတွေက Level 1 အဆင့်နဲ့ ငြှိမ်းသတ်ခဲ့ရပြီး မနက် ၃ နာရီ ၄၀ လောက်မှာ မီးငြိှမ်းသတ်နိုင်ခဲ့တာပါ။
အင်းစိန်အခြေစိုက် ကယ်ဆယ်ရေးအသင်း တာဝန်ခံတဦးက “မီးလောင်တာက ဝါယာရှော့ဖြစ်လို့ပါ။ အဲ့အိမ်က အထည်ချုပ်လုပ်ငန်းလည်း ဖွင့်ထားတယ်။ အောက်ထပ်မှာက အခန်း ၄ ခန်း ငှားထားတာလို့ ပြောတယ်။ ခြေရင်းဘက်ကအိမ်လည်း မီးနည်းနည်းစွဲသွားတယ်။ လူထိခိုက်တာတော့ မရှိပါဘူး။ မီး စဖြစ်တာနဲ့ အကုန်လုံး ရှောင်နေကြတာ” လို့ ပြောပါတယ်။
မီးလောင်မှုကြောင့် အထည်ချုပ်လုပ်ငန်း ဖွင့်လှစ်ထားတဲ့ ၂ ထပ်တိုက် အဆောက်အဦ အပေါ်တထပ်လုံးနဲ့ အောက်ထပ်ရှိ အိမ်ခန်း ၄ ခန်း မီးလောင်ပျက်စီးသွားပြီး ဘေးကပ်ရက်နေအိမ်တလုံး မီးကူးစက်မှု အနည်းငယ် ရှိခဲ့ပါတယ်။
၂ ထပ်တိုက် အပေါ်ထပ်ကနေ မီးစလောင်တာလို့ ရပ်ကွက်နေသူတွေက ပြောကြပြီး လူထိခိုက်မှု မရှိဘူးလို့ သိရတဲ့အပြင် ပျက်စီးဆုံးရှုံးမှုတန်ဖိုး ခန့်မှန်း သိန်း ၃၀၀ ကျပ်ခန့် ရှိတယ်လို့ သိရပါတယ်။
ရန်ကုန်မှာ ပြီးခဲ့တဲ့ မေလ ၁ ရက်က တောင်ဥက္ကလာပမြို့နယ်၊ ၁၃ ရပ်ကွက်မှာ Level 1 အဆင့် မီးလောင်မှုကြောင့် နေအိမ် ၄ လုံး ပျက်စီးဆုံးရှုံးခဲ့သလို မေလ ၄ ရက်ကလည်း သာကေတမြို့နယ်၊ ၆ အရှေ့ရပ်ကွက်မှာ Level 2 အဆင့် မီးလောင်မှုကြောင့် နေအိမ် ၆ လုံးနဲ့ တခြမ်း ပျက်စီးဆုံးရှုံးခဲ့ပါတယ်။
ပဲခူးမြို့ ဇောင်းတူကျေးရွာ၊ ကွမ်းတန်းလမ်းရှိ နေအိမ်တလုံးမှ မတ် ၇ ရက် မနက် ၂ နာရီကျော်က ဒေါ်တင်လှပိုင်နေအိမ် မီတာဘုံးမှတဆင့် ဝါယောရှော့ဖြစ်ပြီး မီးလောင်မှုဖြစ်ပွားခဲ့ရာ နေအိမ် ၉ လုံး ဆုံးရှုံးခဲ့တယ်လို့ နယ်ခံတွေနဲ့ အရန်မီးသတ်တပ်ဖွဲ့ဝင်တွေဆီက သိရပါတယ်။
မီးသတ်တပ်ဖွဲ့ဝင်တဦးက "ညက လျှပ်စစ်မီး လာလိုက်ပျက်လိုက် ခဏခဏဖြစ်တယ်။ ရာသီဥတုကလည်းပူတော့ အိမ်သုံးလျှပ်စစ်ပစ္စည်းတွေကို မပိတ်ဘဲ အိပ်ကြတာများတယ်။ ပန်ကာကတော့ တောက်လျှောက်ဖွင့်ထားကျတာ မီတာဘုံးက စလောင်တာ” လို့ ပြောပါတယ်။
မီးလောင်ကျွမ်းမှုကြောင့် သွပ်မိုး ပျဉ်ကာ နှစ်ထပ်အိမ် ၉ လုံး ပျက်စီးဆုံးရှုံးခဲ့ပြီး မီးဘေးသင့်သူ ၃၂ ဦး ရွာခံဘုန်းကြီးကျောင်းမှာ နေထိုင်နေရတယ်လို့ ဆိုပါတယ်။
နေအိမ် မီးလောင်ဆုံးရှုံးခဲ့သူတဦးက "မီးစတင်လောင်ကျွမ်းတဲ့ အိမ်ရှင်ကိုတော့ ဖမ်းဆီး စစ်ဆေး နေတယ်။ လတ်တလော အကူအညီတော့ လိုတာပေါ့။ စားရေးသောက်ရေးကို ရွာဘုန်းကြီးကပဲ တာဝန်ယူထားရတာ။ အိပ်ကောင်းတဲ့ အချိန်ကြီး မီးကလောင်တော့ တန်ဖိုးရှိတဲ့ ပစ္စည်းတောင် မသယ်နိုင်ခဲ့ဘူး” လို့ ပြောပါတယ်။
မီးလောင်ကျွမ်းမှုကို မြို့နယ်မီးသတ်ဦးစီးဌာနမှ ရေကား ၅ စီး၊ ရေသယ်ယာဉ် ၂ စီးနဲ့ အချိန် ၁ နာရီ ကြာငြှိမ်းသတ်ခဲ့ရပြီး ကာလတန်ဖိုး ၈၃ သိန်းကျော် ဆုံးရှုံးခဲ့ကာ လူနဲ့တိရစ္ဆာန် ထိခိုက်မှု မရှိဘူးလို့ သတင်းထုတ်ပြန်ပါတယ်။
၂၀၂၂ ခုနှစ် နိုဝင်ဘာ ၂၀ ရက်ကလည်း ပဲခူးမြို့ ၊ မြို့တွင်းကြီးရပ်ကွက်မှာ ရေခဲသေတ္တာ အပူလွန်ပြီး မီးလောင်ခဲ့ရာမှ ဆိုင်ခန်းတွဲ ၅ ခန်း မီးလောင်ဆုံးရှုံးခဲ့ပါတယ်။
