လာမယ့်မေလမှာ တရုတ်နိုင်ငံကို သွားရောက်ဖို့ သဘောတူညီမှု ရခဲ့တယ်လို့ ကုလသမဂ္ဂလူ့အခွင့်အရေး အကြီးအကဲ မီရှဲလ် ဘတ်ချ်လက်က မတ်လ ၈ ရက်မှာ ပြောပါတယ်။

ရှင်ကျန်းဒေသမှာ ထိန်းသိမ်းစခန်းတွေမှာ ရှိနေတဲ့ ဝီဂါမွတ်ဆလင် ၁ သန်းကိုလည်း သွားကြည့်နိုင်မယ်လို့ ပြောပါတယ်။ 

“ တရုတ်အစိုးရကျူးလွန်တဲ့ အချက်အလက်တွေ ရရှိထားပြီး ဝီဂါတွေရဲ့ လွတ်လပ်ခွင့်ကို လေးစားဖို့ တိုက်တွန်းနေပါတယ်” လို့ ဂျီနီဗာမှာ ကျင်းပတဲ့ လူ့အခွင့်အရေးကောင်စီ ညီလာခံကို ဗီဒီယိုနဲ့ စကားပြောရာမှာ မီရှဲလ်ကပြောပါတယ်။

ဝီဂါတွေအပေါ် လူ့အခွင့်အရေးချိုးဖောက်နေတယ်ဆိုတဲ့ စွပ်စွဲချက်တွေကို တရုတ်အစိုးရက ငြင်းဆန်လေ့ ရှိပြီး၊ အစွန်းရောက် တယူသန်ဝါဒကို တိုက်ဖျက်ဖို့ အသက်မွေးဝမ်းကျောင်းစခန်းတွေမှာ စိတ်ဓာတ်ပြုပြင် လေ့ကျင့်သင်ကြားပေးနေတာလို့ ပြောပါတယ်။ 

ကုလသမဂ္ဂလူ့အခွင့်အရေး မဟာမင်းကြီးရဲ့ တရုတ်နိုင်ငံ ခရီးစဉ်မတိုင်မီ ရှေ့ပြေးအဖွဲ့က ဧပြီလမှာ ပေကျင်းကို ကြိုတင် ရောက်ရှိနေမှာ ဖြစ်ပါတယ်။

တရုတ်နိုင်ငံ၊ ရှင်းကျန်းဒေသမှာ ဝီဂါမွတ်ဆလင်တွေနဲ့  တခြားလူနည်းစုတွေကို တရားမဝင် ထိန်းသိမ်းထားမှု၊ ဖိနှိပ်မှု၊ အဓမ္မခိုင်းစေမှုနဲ့ လူမျိုးတုံးသတ်ဖြတ်မှု အခြေအနေတွေဟာ လုံးဝ တိုးတက်ကောင်းမွန်မလာဘူးလို့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံး ပြောခွင့်ရပုဂ္ဂိုလ် ရူးပတ် ခါဗလ်က ပြောပါတယ်။ 

တွေ့ရှိချက်တွေကတော့ အလွန်အမင်း စိတ်သောကရောက်စရာတွေဖြစ်ပြီး အရင်လုပ်နေကျအ တိုင်း မတရား ဖမ်းဆီးထားမှု၊ အကျဉ်းစခန်းတွေထဲ အတင်းအကျပ်ပညာပေးမှု၊ မတရားခိုင်းစေမှု၊ ယဉ်ကျေးမှုနဲ့ လူမှုရေး အခွင့်အရေးအားလုံး ဆုံးရှုံးစေမှုတွေ ရှိနေတယ်လို့ သူက ပြောပါတယ်။ မကြာခင် အဲဒီအခြေအနေနဲ့ပတ်သက်တဲ့ အစီရင်ခံစာလည်း ထွက်လာမယ်လို့ ဆိုပါတယ်။

ဗြိတိန်အခြေစိုက် ရှေ့နေ့များခုံရုံးကတော့ အဲဒီလူနည်းစုအုပ်စုတွေအပေါ် ကျူးလွန်တဲ့ ရာဇဝတ်မှု တွေအတွက် သမ္မတရှီကျင့်ဖျင်မှာ အဓိကတာဝန်ရှိတယ်လို့ စွပ်စွဲထားပါတယ်။ 

တရုတ်အစိုးရကတော့ အနောက်အုပ်စုဟာ ရှင်းကျင်းဒေသအပေါ် ပုံကြီးချဲ့ ပြဿနာ ဖန်တီးနေ တာလို့ အမြဲတုံ့ပြန်လေ့ရှိပါတယ်။