အတူနေချစ်သူကို ကိုယ်ထိလက်ရောက် ကျူးလွန်တယ်ဆိုတဲ့ စွပ်စွဲချက်နဲ့ အမှုရင်ဆိုင်နေရတဲ့ နည်းပြ ရွိုင်ယန်ဂစ်ဟာ ဝေးလ်အသင်းနည်းပြရာထူးကနေ တရားဝင်နုတ်ထွက်သွားပါတယ်။
မန်ယူ ဂန္ထဝင်ကစားသမား ရွိုင်ယန်ဂစ်ဟာ တရားရုံးရဲ့ စွပ်စွဲချက်ကို ငြင်းဆန်ထားပါတယ်။ အမှုမပြီးပြတ်သေးတာကြောင့် ဝေးလ်အသင်းရဲ့ ကမ္ဘာ့ဖလားပြိုင်ပွဲအတွက် ပြင်ဆင်မှုတွေမှာ သက်ရောက်မှုရှိမှာကို စိုးရိမ်ပြီး ရာထူးကနေ အပြီးသတ်နုတ်ထွက်ဖို့ ဆုံးဖြတ်ခဲ့တာပါ။
အမှုဆက်လက်ရင်ဆိုင်နေရဆဲဖြစ်ပေမဲ့ အပြစ်မရှိဘူးဆိုတာကို ယုံကြည်ကြောင်း၊ နည်းပြတာဝန်တွေ ဆက်ယူနိုင်ဖို့အတွက် အမှုအမြန်ဆုံးပြီးပြတ်ဖို့ ဆန္ဒရှိခဲ့ပေမဲ့ ကြန့်ကြာနေခဲ့တာဖြစ်ကြောင်း ဂစ်က သူ့ရဲ့ထုတ်ပြန်ချက်မှာ ပြောထားပါတယ်။
ဝေးလ်အသင်းဟာလည်း ကမ္ဘာ့ဖလားအတွက် ပြင်ဆင်မှုတွေ လုပ်ဆောင်ရတော့မှာဖြစ်လို့ သူ့ရဲ့အမှုကိစ္စက အကျိုးသက်ရောက်မှု ဖြစ်စေမှာကို စိုးရိမ်တာကြောင့် အသင်းနဲ့လမ်းခွဲဖို့ ဆုံးဖြတ်ခဲ့တာဖြစ်ကြောင်း၊ ဝေးလ်နည်းပြရာထူး ခန့်အပ်ခံရတာကို အမြဲတမ်း ဂုဏ်ယူနေမှာဖြစ်ကြောင်း ဂစ်က ထုတ်ပြန်ချက်မှာ ပြောထားပါတယ်။
ဝေးလ်အသင်းဟာ နည်းပြချုပ်ဂစ် မရှိပေမဲ့လည်း ယာယီနည်းပြ ရောဘတ်ပေ့ချ်ရဲ့ ဦးဆောင်မှုနဲ့အတူ ယူကရိန်းကို အနိုင်ယူပြီး ကမ္ဘာ့ဖလားခြေစစ် ပွဲအောင်မြင်ခဲ့တာ ဖြစ်ပါတယ်။
ကမ္ဘာ့ဖလားခြေစစ်ပွဲ ပလေးအော့ဖ်ဗိုလ်လုပွဲမှာ ယူကရိန်းကိုအနိုင်ရခဲ့တဲ့ ဝေးလ်အသင်းဟာ ၆၈ နှစ်အတွင်း ပထမဆုံးအကြိမ် ကမ္ဘာ့ဖလားဝင်ခွင့်ရရှိသွားပါတယ်။
ပွဲချိန် ၃၄ မိနစ်မှာ ဂါရတ်ဘေးလ်ရဲ့ ဖရီးကစ်ကနေ တဆင့်ယာမိုလန်ကိုက ကိုယ့်ဂိုးကိုယ်ပြန်သွင်းမိခဲ့ပြီး အဲဒီသွင်းဂိုးနဲ့ပဲ ဝေးလ်အသင်းကအနိုင်ရခဲ့တာပါ။
ဝေးလ်အသင်းဟာ ၁၉၅၈ ခုနှစ် ဆွီဒင်ကမ္ဘာ့ဖလားပြိုင်ပွဲမှာ ပထမဆုံးအကြိမ်ဝင်ပြိုင်ခွင့်ရခဲ့ပြီး ကွာတားဖိုင်နယ်တက်ရောက်နိုင်ခဲ့ပြီးနောက်ပိုင်း ၆၄ နှစ် ကြာစောင့်ဆိုင်းခဲ့ရပြီး ၂၀၂၂ ကမ္ဘာ့ဖလားရောက်မှ ခြေစစ်ပွဲအောင်မြင်ခဲ့တာပါ။
ကမ္ဘာ့ဖလားဝင်ခွင့်ရရရှိစေခဲ့တဲ့ ယူကရိန်းနဲ့ ပလေးအော့ဖ် ဗိုလ်လုပွဲစဉ်ဟာ ကစားသမားဘဝတစ်လျှောက် အခမ်းနားဆုံးပွဲစဉ်ဖြစ်တယ်လို့လည်း ပွဲအပြီးမှာ ဝေးလ် အသင်းခေါင်းဆောင် ဂါရတ်ဘေးလ်က ပြောပါတယ်။
ကာတာကမ္ဘာ့ ဖလား မှာ ဝေးလ်အသင်းက လာမယ့်နိုဝင်ဘာ၂၁ရက်မှာ အမေရိကန်၊ နိုဝင်ဘာ ၂၅ရက်မှာ အီရန်၊ နိုဝင်ဘာ၂၉ရက်မှာ အင်္ဂလန်အသင်းနဲ့ယှဉ်ပြိုင်သွားရမှာဖြစ်ပါတယ်။
