ရန်ကုန်တိုင်း၊ လမ်းမတော်မြို့နယ်၊ ၈ ရပ်ကွက်၊ အောင်ရတနာလမ်း၊ သခင်မြပန်းခြံအနီးမှာ မတ် ၂ ရက် ဒီနေ့မနက်အစောပိုင်းက မီးလောင်မှုဖြစ်ခဲ့ပြီး ဆိုင်ခန်း ၁၀ ခန်းထက်မနည်း ပျက်စီးဆုံးရှုံးခဲ့တယ်လို့ ရပ်ကွက်နေသူတွေဆီက သိရပါတယ်။
ဒီနေ့မနက် ၄ နာရီခွဲက သခင်မြပန်းခြံအနီးရှိ အောင်ရတနာလမ်းမပေါ်က ဒံပေါက်ဆိုင်၊ စာအုပ်ဆိုင်၊ အထည်ဆိုင်တွေနဲ့ တခြားလူသုံးကုန်ပစ္စည်းဆိုင်တွေရဲ့ အတွင်းဘက် ဆိုင်ခန်းတွေက မီးစတင်လောင်ခဲ့တာဖြစ်တယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။
“သခင်မြပန်းခြံရှေ့ ကပ်လျက်က ဆိုင်ခန်းတွေ၊ အပေါ်ထပ်ခိုးမှာ လူနေတယ်။ အောက်မှာ ဆိုင်ခန်းဖွင့်ထားတာ၊ အနည်းဆုံး ၁၀ ခန်းကျော်လောက်တော့ ပါသွားတယ်။”
မီးလောင်မှုဖြစ်စဥ်ကို ကျောက်တံတားမြို့နယ် မီးသတ်တပ်ဖွဲ့က မီးသတ်ယာဥ်တွေနဲ့ Level 2 အဆင့်သတ်မှတ်ပြီး တနာရီကျော်ကြာ ငြှိမ်းသတ်ခဲ့ရကာ မနက် ၅ နာရီ ၄၄ မိနစ်မှာ မီးငြိမ်းခဲ့တယ်လို့ မီးသတ်ဦးစီးဌာန တာဝန်ရှိသူတဦးက ဒီဗွီဘီကို ပြောပါတယ်။
အလားတူ ဒီနေ့မနက် ၁၁ နာရီ ၂၀ မိနစ်ကလည်း သင်္ဃန်းကျွန်းမြို့နယ်၊ ဆ/ကရပ်ကွက်၊ ကျိုက္ကဆံဘုရားလမ်း စံပြဆေးရုံရှေ့ရှိ ဆေးဆိုင်မှာလည်း မီးလောင်မှုဖြစ်ခဲ့ပါသေးတယ်။
လတ်တလောမှာ မီးလောင်ရတဲ့အကြောင်းအရင်းနဲ့ ဆုံးရှုံးမှုတန်ဖိုးကို မီးသတ်ဦးစီးဌာနက ပြောဆိုခြင်းမရှိသေးပါဘူး။
ရန်ကုန်တိုင်း အလုံမြို့နယ် ဧရာဝတီရပ်ကွက် အောက်ကြည့်မြင်တိုင်လမ်းရှိ သခင်မြပန်းခြံမှာ ဒီကနေ့ ညနေပိုင်းက ဗုံးပေါက်ကွဲမှုကြောင့် အမျိုးသားတဦး ထိခိုက်ဒဏ်ရာရရှိခဲ့တယ်လို့ ရပ်ကွက်နေသူတွေက ပြောပါတယ်။
ဒီကနေ့ ညနေသုံးနာရီဝန်းကျင်က သခင်မြပန်းခြံအတွင်း အများသုံးအိမ်သာမှာ ဗုံးပေါက်ကွဲခဲ့တာဖြစ်ပြီး အမျိုးသားတဦး ထိခိုက်ဒဏ်ရာရရှိခဲ့တာလို့ ရပ်ကွက်နေသူတဦးက ပြောပါတယ်။
"တလုံး အိမ်သာထဲမှာ ပေါက်တာ ဗုံးပေါက်တယ်၊ အိမ်သာတက်ဖို့ စောင့်နေတဲ့သူတွေ ထွက်ပြေးကြတာ။ တလုံးကမပေါက်သေးဘူး၊ စစ်တပ်က တွေ့လို့ ဖောက်ခွဲပစ်တာ။"
ဗုံးပေါက်ကွဲပြီးနောက် စစ်ကောင်စီတပ်ဟာ ပေါက်ကွဲခဲ့တဲ့နေရာကို ထပ်မံရှာဖွေခဲ့ရာ ဗုံးတလုံးထပ်မံတွေ့ရှိပြီး ပန်းခြံအတွင်းရှိ လမ်းမပေါ်မှာ အတားအဆီးပြုလုပ်ကာ ဖောက်ခွဲခဲ့တယ်လို့ ရပ်မိရပ်ဖတဦးက ဒီဗွီဘီ ကိုပြောပါတယ်။
"ဗုံးထိသွားတဲ့ကောင်လေးက မျက်နှာတွေ လက်တွေထိသွားတယ်၊ စိုးရိမ်ရတယ်၊ ရန်ကုန်ဆေးရုံကြီးကို ပို့လိုက်တယ်။"
လက်ရှိအခြေအနေမှာ စစ်ကောင်စီတပ်သားတွေ သခင်မြပန်းခြံအတွင်းနဲ့ အောက်ကြည့်မြင်တိုင် လမ်းမကြီးတလျှောက် ကားနဲ့လမ်းသွားလမ်းလာတွေကို စစ်ဆေးနေတယ်လို့ ရပ်ကွက်နေသူတွေက ပြောပါတယ်။
ရန်ကုန်တိုင်းအတွင်းရှိ မြို့နယ်အချို့မှာ နိုဝင်ဘာ ၁ ရက်မှ ၂၀ ရက်နေ့အတွင်း ပစ်ခတ်မှုနဲ့ ဗုံးပေါက်ကွဲမှုများဖြစ်ခဲ့ပြီး ၇ ဦးသေဆုံးကာ ၇ ဦးဒဏ်ရာရရှိခဲ့ပါတယ်။
