close

သင်ထောက်ကူ

close

April 1, 2023

ရွှေဘိုခရိုင်တွင် စစ်ဘေးရှောင်ကလေးငယ်များ သင်ထောက်ကူများလိုအပ်နေ

စစ်ကိုင်းတိုင်း၊ ရွှေဘိုခရိုင်ရှိ  စစ်ကောင်စီတပ်ရဲ့ မီးရှို့ခံရတဲ့ကျေးရွာက စစ်ရှောင်ကလေးတွေအတွက် သင်ထောက်ကူပစ္စည်းတွေလို အပ်နေတယ်လို့  S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ထံက သိရပါတယ်။

အဲဒီရွာဟာ ၂၀၂၂ ခုနှစ် ဩဂုတ်လက စာသင်ကျောင်းအပါအဝင် မီးရှို့ခံခဲ့ရတာဖြစ်ပြီး အသက် ၅ နှစ်ကနေ ၁၅ နှစ်အရွယ် စစ်ဘေးရှောင်ကလေးငယ် ၂၂၀ ကျော် စာသင်ကြားခွင့် မရခဲ့တဲ့အကြောင်းနဲ့ အခုအခါ စာသင်ဖို့ ဆရာ၊ဆရာမ လုံလောက်မှု ရှိပေမဲ့ စာရေးကိရိယာနဲ့ စာရေးစားပွဲတွေ လိုအပ်နေတယ်လို့ သိရပါတယ်။

S&C အဖွဲ့တာဝန်ရှိသူက "အခုမှ ပြန်လည်ထူထောင်တာဆိုတော့ စာသင်ကြားပေးနေတာက မကြာသေးဘူး။ အခုက စာသင်ခုံတွေနဲ့သင်ထောက်ကူပစ္စည်းတွေ အဓိကလိုနေတာပေါ့။ ဆရာ၊ ဆရာမကတော့ အနီးနားကျေးရွာတွေက CDM တွေနဲ့ ဘွဲ့ရပြီးသား လူငယ်တွေဝိုင်းဝန်း သင်ကြားပေးနေတယ်”လို့ ပြောပါတယ်။

လတ်တလော စာသင်ကြားရာမှာလည်း အဖီဆွဲကာ သင်ကြားနေရတာဖြစ်ပြီး မိုးဒဏ်လေဒဏ် ခံနိုင်ရည် မရှိတာကြောင့် ကျောင်းဆောက်လုပ်နိုင်ဖို့ ပြင်ဆင်နေတယ်လို့ သိရပါတယ်။

အခုချိန်​မှာ မူလတန်းကနေ အလယ်တန်းထိ စာသင်ကြားပေးနေပြီး အခုလို ပြန်လည် ထူထောင်ရေးအတွက် ပြည်တွင်း၊ ပြည်ပက အလှူရှင်တွေအနေနဲ့ ဝိုင်းဝန်း ကူညီပေးကြဖို့လည်း S&C အဖွဲ့မှတာဝန်ရှိသူက မေတ္တာရပ်ခံထားပါတယ်။

7 mins Ago

March 15, 2020

အခြေခံပညာမူလတန်းအတွက် English Application များ အခမဲ့ဖြန့်ဝေပေးမည်

လာမယ့်ပညာသင်နှစ် အခြေခံပညာမူလတန်းပညာကို သင်ယူကြမယ့် ကျောင်းသား၊ ကျောင်းသူတွေ အင်္ဂလိပ်စာဘာသာရပ်ကို လွယ်လွယ်ကူကူနဲ့ အဆင့်မြှင့်မြှင့်လေ့သင်ယူနိုင်ဖို့ သင်ထောက်ကူ Application တွေကို အခမဲ့ဖြန့်ဝေပေးသွားမှာဖြစ်ပါတယ်။  မြန်မာနိုင်ငံရဲ့ အနာဂတ်ပညာရေးမှာ အထောက်အကူဖြစ်စေဖို့အတွက် Application ထုတ်လုပ်ဖြန့်ဝေမှုကိုတော့ 360 ed နဲ့ Mpride တို့က ပူးပေါင်းလုပ်ဆောင်ထားတာဖြစ်ပါတယ်။  ကျောင်းသားတွေ အခမဲ့အသုံးပြုနိုင်မယ့် English Applicationတွေ ကိုတော့ ပညာရေးဝန်ကြီးဌာနက ရေးဆွဲထားတဲ့ သင်ရိုးညွှန်းတမ်းအသစ်မှာ ပါဝင်တဲ့ သင်ခန်းစာတွေအတိုင်း ထည့်သွင်းရေးဆွဲထားတာပါ။  ကျောင်းသား၊ ကျောင်းသူအနေနဲ့ လက်ကိုင်ဖုန်း၊ Tablet တွေရှိရုံနဲ့ ဒီ App ကို အခမဲ့ Download ရယူပြီး အင်္ဂလိပ်စာကို အသံထွက်မှန်မှန်ကန်ကန်နဲ့ အလွယ်တကူ လေ့လာသင်ယူနိုင်မှာဖြစ်ပါတယ်။  လာမယ့်ပညာသင်နှစ်မတိုင်မီ မေလအတွင်းမှာတော့ Grade_2နဲ့ Grade_3 အတန်းတွေအတွက် English Appliction တွေ စတင်ဖြန့်ဝေပေးသွားမှာဖြစ်ပြီး ကျန်ရှိတဲ့အတန်းတွေကိုတော့ သင်ရိုးညွှန်းတမ်းနဲ့အမီ ထုတ်လုပ်ပေးသွားမှာဖြစ်ပါတယ်။ နှစ်စဉ်ကျောင်းသား၊ ကျောင်းသူ ၆ သန်းကျော်ကို ပညာရေးမှာ အထောက်အကူပေးနိုင်ဖို့အတွက် Appliction တွေကို မြန်မာငွေ ကျပ်သိန်းပေါင်း ၂၅၀၀  အကုန်အကျခံထုတ်လုပ်ထားတာဖြစ်ပါတယ်။ အခြေခံပညာကို လေ့လာသင်ယူနေတဲ့ ကျောင်းသား၊ ကျောင်းသူတွေရဲ့ လက်ထဲကို ဒီ App ရောက်ရှိနိုင်ဖို့အတွက် သင်ရိုးဖတ်စာအုပ်တွေမှာ Application အကြောင်း ထည့်သွင်းသွားမှာဖြစ်သလို ဆရာတွေကို သင်တန်းပို့ချတာတွေနဲ့ ရုပ်မြင်သံကြားကနေ ကြေငြာတာတွေ လုပ်ဆောင်သွားမှာဖြစ်ပါတယ်။  360ed ကနေ ဒီပညာသင်နှစ်မှာ Grade(1)EnglishApplication ကို တနိုင်ငံလုံးက ကျောင်းသားတွေ အသုံးပြုနိုင်ဖို့အတွက် ပညာရေးဝန်ကြီးဌာနကို လှူဒါန်းထားတာဖြစ်ပြီး လက်ရှိမြို့ပေါ်နေ ကျောင်းသားအများစုက ဒီ App ကို အသုံးပြုနေကြပြီဖြစ်ပါတယ်။  
3 years Ago
Up