ရန်ကုန်တိုင်း၊ သင်္ဃန်းကျွန်းမြို့နယ်၊ ငမိုးရိပ်ရပ်ကွက် ၉ လမ်းက လူငယ်နှစ်ဦး မတ် ၂၅ ရက် ည ၁၀ နာရီလောက်မှာ ကွမ်းယာထွက်ဝယ်ချိန် လုံခြုံရေးကင်းလှည့်တဲ့ ကားနဲ့တွေ့ပြီး ဖမ်းဆီးခေါ်ဆောင်ခံခဲ့ရတယ်လို့ ရပ်ကွက်နေပြည်သူတွေက ပြောပါတယ်။

အဲဒီလူငယ်နှစ်ဦးကို ညမထွက်ရအချိန် အပြင်ထွက်လို့ဆိုတဲ့ အကြောင်းပြချက်နဲ့ ဖမ်းဆီးခဲ့တာဖြစ်ပြီး ရန်ကုန်မှာ သတ်မှတ်ထားတဲ့ညမထွက်ရအချိန်က ည ၁၂ နာရီဖြစ်တာကြောင့် ငွေညှစ်ချင်တာကြောင့် ဖမ်းတဲ့သဘောဖြစ်တယ်လို့ ဆိုပါတယ်။

ငမိုးရိပ်ရပ်ကွက်မှာနေထိုင်သူတဦးက "ဒီမနက်ဘဲ တယောက်ငါးသောင်းနဲ့ ပြန်ရွေးထုတ်လာကြတယ်။ သူတို့ လမ်းထိပ်ထွက်တဲ့အချိန် ကင်းလှည့်တဲ့ကားနဲ့တိုးပြီး ဖမ်းခံရတာလို့ ပြောတယ်" ရပ်ကွက်နေသူတဦးက ပြောပါတယ်။

ဖမ်းဆီးခံရသူနှစ်ဦးအနက် တဦးက အဲဒီလမ်းက ဒလန်တဦးရဲ့သားဖြစ်နေလို့ ဒီလောက်ငွေပမာဏ နဲ့ ပြန်လွှတ်ပေးလိုက်ပုံရတယ်လို့ ရပ်ကွက်အတွင်း နေထိုင်သူတွေက ပြောပါတယ်။

ရန်ကုန်မြို့မှာ အခုနောက်ပိုင်း လူငယ်တွေကို စစ်ကောင်စီတပ်နဲ့ရဲတွေက အကြောင်းမဲ့ ပစ်မှတ်ထားဖမ်းဆီးပြီး ငွေနဲ့ ပြန်ရွေးခိုင်းတာတွေ ဆက်တိုက်ပြုလုပ်နေကြတယ်လို့ မြို့ခံတွေကပြောပါတယ်။ 

ရန်ကုန်တိုင်း၊ သင်္ဃန်းကျွန်းမြို့နယ်၊ ဦးစံဖေရပ်ကွက်၊ ဦးစံဖေလမ်းမှာရှိတဲ့ ချစ်စရာ ကုန်စုံဆိုင်မှာ ဖေ‌ဖော်ဝါရီ ၃ ရက် ဒီနေ့မနက် ၁၁ နာရီခွဲက မီးလောင်မှုဖြစ်ခဲ့တယ်လို့ ရပ်ကွက်နေသူတွေဆီက သိရပါတယ်။

ဦးစံဖေလမ်းရှိ အရက်၊ အအေးမျိုးစုံ လက်လီလက်ကားရောင်းချတဲ့ ချစ်စရာကုန်စုံဆိုင်မှာ ဒီနေ့မနက် ၁၁ နာရီက မီးစတင်လောင်ခဲ့ရာ မီးသတ်ယာဥ်တွေနဲ့ ပရဟိတအဖွဲ့တွေက level 2 အဆင့်နဲ့ နာရီဝက်ကြာ မီငြှိမ်းသတ်ခဲ့ရတယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။

“မီးက အတော်လေးလောင်တာ၊ ကုန်စုံဆိုင်လည်း တဝက်ပါသွားတယ်။ ရေစဲစက်ရော နည်းနည်းပါသွားတယ်။”

မီးလောင်မှုဖြစ်စဥ်နဲ့ ပတ်သက်လို့ လတ်တလောမှာ မီးလောင်ရတဲ့ အကြောင်းအရင်းကို စစ်ဆေးနေပြီး ဆုံးရှုံးမှုတန်ဖိုးကို မသိရသေးဘူးလို့ မီးသတ်ဦးစီးဌာန တာဝန်ရှိသူတဦးက ဒီဗွီဘီကို ပြောပါတယ်။

ပြီးခဲ့တဲ့ ဖေဖော်ဝါရီ ၁ ရက်မှ ၃ ရက်အတွင်း အင်းစိန်၊ မှော်ဘီ၊ သင်္ဃန်းကျွန်း၊ ဗိုလ်တထောင်မြို့နယ်တို့မှာ မီးလောင်မှု လေးကြိမ် ဖြစ်ခဲ့ပါတယ်။

ပြီးခဲ့တဲ့ ဇန်နဝါရီလအတွင်း ရန်ကုန်မှာ မီးလောင်မှု ၄၅ ကြိမ်ဖြစ်ခဲ့ပြီး လေးဦးသေဆုံးကာ မီးသတ်တပ်ဖွဲ့နဲ့ ပရဟိတအဖွဲ့ဝင်တချို့ ဒဏ်ရာရရှိခဲ့တယ်လို့ သတင်းအချက်အလက်တွေအရ သိရပါတယ်။

ရန်ကုန်တိုင်းမှာ ၂၀၂၂ ခုနှစ်အတွင်း မီးလောင်မှု ၂၂၄ ကြိမ်ဖြစ်ပွားခဲ့ပြီး ၇ ဦး သေဆုံးကာ ၂၂ ဦး ဒဏ်ရာရရှိခဲ့တယ်လို့ ထုတ်ပြန်ချက်အရ သိရပါတယ်။