မန္တလေးတိုင်း၊ ပြင်ဦးလွင်မြို့ စည်သာတံတားအနီးမှာ ဖေဖော်ဝါရီ ၅ ရက် မနက်က ပြင်ဦးလွင်ကနေ မန္တလေးဘက်ကို ပြန်လာတဲ့ Hijet ယာဉ်ပေါ်ကို သစ်ကိုင်းကျိုးကျပြီး ယာဉ်မောင်းဖြစ်သူ သေဆုံးခဲ့တယ်လို့ ကူညီကယ်ဆယ်ရေးတွေ လုပ်ဆောင်ခဲ့တဲ့ လူမှုကူညီရေးအသင်း တာဝန်ရှိသူက ဒီဗွီဘီကို ပြောပါတယ်။
“ကားဖြတ်သွားချိန်မှာ သစ်ကိုင်းကျိုးကျခဲ့တာဖြစ်ပြီး သစ်ကိုင်းကလည်းကြီးကာ ကားကလည်း အရှိန်နဲ့ဆိုတော့ ကားခေါင်းခန်းကို သစ်ကိုင်းက ဖောက်ထွက်ပြီး ကားမောင်းတဲ့သူ ရင်ဘတ်ထိုးစိုက်မိကာ နေရာမှာတင် ဆုံးသွားတာဖြစ်တယ်။”
အဲဒီယာဉ်ပေါ်မှာ ပြည်ကြီးတံခွန်မြို့နယ် ကျောက်မီးရွာက မိသားစု ၅ ဦး လိုက်ပါစီးနင်းလာတာဖြစ်ပြီး ပြင်ဦးလွင်ကနေအပြန် အခုလို မတော်တဆမှု ဖြစ်ပွားခဲ့တာပါ။
သေဆုံးသူ အသက် ၅၉ နှစ်အရွယ် ယာဉ်မောင်းရဲ့ ရုပ်အလောင်းကိုတော့ ပြင်ဦးလွင် ပြည်သူ့ဆေးရုံကြီး ရင်ခွဲရုံကို ပို့ဆောင်ပေးထားတယ်လို့လည်း ကူညီပို့ဆောင်ပေးတဲ့ လူမှုကူညီရေးအသင်းက ပြောပါတယ်။
စစ်ကိုင်းတိုင်း၊ ကလေးမြို့နယ်မှာ မေ ၁၇ ရက် နေ့လယ်က နတ်ချောင်း စစ်ဘေးရှောင်စခန်းမှာ လေပြင်းတိုက်ခတ်ပြီး တဲပေါ် သစ်ကိုင်းကျိုးကျတာကြောင့် အသက် ၁၄ နှစ်အရွယ် မိန်းကလေးငယ်တယောက် သေဆုံးသွားပါတယ်။
စစ်ရှောင်တွေကို ကူညီပေးနေတဲ့ ဦးဇင်းတပါးက “သူတို့ညီအမနှစ်ယောက်က တဲထဲမှာ နေခဲ့တာ၊ သူ့မိဘတွေက ရဟန်းခံအတွက် အလုပ်ရှုပ်နေကြတာ။ လေက တအားတိုက်တာ၊ မိုးကလည်းသည်း၊ သစ်ကိုင်းက ကျိုးကျပြီး ရင်ဘတ်ပေါ်ကျသွားပုံရတယ်။ ချက်ချင်းမဆုံးပေမဲ့ အချိန်မမီတော့ ခဏအသက်ဆယ်ပြီး ဆုံးသွားတယ်" လို့ ဒီဗွီဘီကို မိန့်ပါတယ်။
နတ်ချောင်းကျေးရွာက စစ်ရှောင်တွေဟာ ကျေးရွာကနေအိမ်တွေ မီးရှို့ဖျက်ဆီးခံထားရတာကြောင့် ဘေးလွတ်ရာ ဒေသတွေမှာ နေထိုင်နေကြရတာပါ။
သေဆုံးတဲ့ မိသာစုးဝင်တွေကတော့ ကျေးရွာတွင်းက ရန်ကင်းဘုန်းကြီးကျောင်းထဲမှာ ယာယီတဲထိုးနေထိုင်ကြတယ်လို့ ဆိုပါတယ်။
သေဆုံးသွားသူမှာ မယုလှိုင်သင်းဖြစ်ပြီး ညီအမ ၂ ယောက်စလုံးကို ထိမှန်ခဲ့ပေမဲ့ အမဖြစ်သူကတော့ အသက်အန္တရာယ် မထိခိုက်ကြောင်း၊ စစ်ဘေးရှောင်စခန်းအတွင်း ဆေးအဖွဲ့ရှိပေမဲ့ ဆေးဝါးကိရိယာ မပြည့်စုံတဲ့အတွက် အသက်မကယ်နိုင်ဘူးလို့ ဦးပဉ္ဇင်းက မိန့်ပါတယ်။
လေပြင်းတိုက်တာကြောင့် တဲတချို့ ပျက်စီးသွားတယ်လို့လည်း သိရပါတယ်။
စစ်ကောင်စီတပ်တွေဟာ နတ်ချောင်းကျေးရွာက ဒေသခံနေအိမ်တွေကို မီးရှို့ဖျက်ဆီးတာ ၃ ကြိမ်တိုင်ရှိပြီဖြစ်ပြီး နေအိမ် ၂၀၀ ကျော် မီးလောင်ဆုံးရှုံးထားပါတယ်။
