ပဲခူးတိုင်းဒေသကြီး၊ ရေတာရှည်မြို့နယ်၊ ပဲခူးရိုးမပေါ် တရားမဝင် သစ်ခိုးထုတ်နေသူတွေကို မတ် ၁၆ ရက် ဒီကနေ့မှာ ပြည်သူ့ကာကွယ်ရေးတပ်ဖွဲ့ ၃၅၀၀ တပ်ရင်း ၁၊ တပ်ခွဲ ၃ (Y.P.D.F)၊ Sniper အဖွဲ့က နောက်ဆုံးအကြိမ် ထပ်မံသတိပေးလိုက်ပါတယ်။
ဖေဖော်ဝါရီ ၂၅ ရက်က ပဲခူးရိုးမပေါ် တရားမဝင် သစ်ခိုးထုတ်နေသူတွေကို မတ် ၁ ရက် နောက်ဆုံးထားပြီး ပစွည်းတွေ သယ်ယူထွက်ခွာသွားကြဖို့ အသိပေးထားပြီးဖြစ်ပေမယ့် စစ်ကောင်စီတပ်နဲ့ ရဲတွေက တာဝန်ယူပေးထားတဲ့အတွက် သစ်ခိုးထုတ်နေဆဲပါ။
တရားမဝင် သစ်ခိုးထုတ်နေသူတွေဟာ ပဲခူးရိုးမပေါ်ကနေ ကိုးပင်-သာဂရလမ်းမရှိ မြောင်သာလမ်း၊ ချောင်းမငယ်လမ်း၊ အုတ်တွင်းလမ်းတွေကနေ ထပ်မံသစ်ခိုးထုတ်နေတဲ့အတွက် မတ် ၃၁ ရက် နောက်ဆုံးထားပြီး အပြီးထွက်ခွာသွားကြဖို့ ထပ်မံအသိပေးလိုက်တာပါ။
ဆက်လက်ပြီး လိုက်နာမှုမရှိဘဲ ပဲခူးရိုးမထဲကို ကျူးကျော်ဝင်ရောက်လာတဲ့ စစ်ကောင်စီတပ်နဲ့ ရဲတွေ အပါအဝင် ဘယ်သူ့ကိုမဆို ထိရောက်ပြတ်သားစွာ အရေးယူသွားမယ်လို့ ဆိုပါတယ်။
ကိုးပင်ကျေးရွာဒေသခံတဦးက "သစ်ခိုးထုတ်တာကတော့ အခုနောက်ပိုင်း ပိုလုပ်လာကြတယ်။ လိုင်းကြေးပိုက်ဆံ ပေးထားတော့ တရားဝင်ပုံစံမျိုး ကားတွေ၊ ဆိုင်ကယ်တွေနဲ့ကို ပေါ်ပေါ်ထင်ထင် သယ်နေကြတာ။ လမ်းမှာ တပ်နဲ့ ရဲတွေလည်း ပိုက်ဆံပေးထားတော့ မမြင်ချင်ဟန်ဆောင်ပေးထားတယ်။ ကြာရင် သစ်တောပြုန်းတီးသွားနိုင်တယ်” လို့ ပြောပါတယ်။
ပဲခူးတိုင်းဒေသကြီး၊ တောင်ငူခရိုင်၊ ပဲခူးရိုးမတလျှောက်ကို မိဘပြည်သူတွေ အနေနဲ့ ရိုးမပေါ် ဖြတ်သန်းသွားလာတာတွေ မပြုလုပ်ဖို့ တောင်ငူခရိုင် ပြည်သူ့ကာကွယ်ရေးတပ် (PDF)၊ အမှတ် ၃၅၀၁ ဘုရင့်နောင်တပ်ရင်းက မတ် ၈ ရက်မှာ ထုတ်ပြန်ခဲ့ပါတယ်။
စစ်ကောင်စီတပ်တွေဟာ ရိုးမတောင်ခြေက ကျေးရွာတွေမှာ အင်အားအလုံးအရင်းနဲ့ တပ်စွဲပြီး ပဲခူးရိုးမပေါ် အရပ်သားအသွင်ယူကာ ဆိုင်ကယ်၊ ဖောကားတွေ အသုံးပြုပြီး PDF သတင်းတွေကို လိုက်လံရယူနေတာကြောင့် မိုင်းဆွဲတာ၊ ပစ်ခတ်တိုက်ခိုက်တာတွေ လုပ်ဆောင်သွားမယ်လို့ ထုတ်ပြန်ထားပါတယ်။
စစ်ကိုင်းတိုင်း၊ သမိုင်းဝင် အလောင်းတော်ကဿပ အမျိုးသားဥယျာဉ်အတွင်းက ထိန်းသိမ်း စောင့်ရှောက်ထားတဲ့ အဖိုးတန် ရှားပါးသစ်တွေကို စစ်ကောင်စီအကြမ်းဖက်အဖွဲ့နဲ့ ဆက်နွှယ်တဲ့ အပေါင်းအပါတွေက ခိုးထုတ်နေတယ်လို့ ကနီမြို့နယ် PDF အဖွဲ့က ဇွန်လ ၂၁ ရက်မှာ ထုတ်ပြန်ပါတယ်။
ယင်းမာပင်မြို့နယ်၊ ကနီမြို့နယ်၊ ပုလဲမြို့နယ်၊ ဂန့်ဂေါမြို့နယ်၊ မင်းကင်းမြို့နယ်အစပ်ရှိ အများပြည်သူတွေ တန်ဖိုးထား ထိန်းသိမ်းထားရှိတဲ့ အာဆီယံအမွေအနှစ် အလောင်းတော်ကဿပအမျိုးသားဥယျာဉ်၊ ဘေးမဲ့ကြိုးဝိုင်းအတွင်းရှိ ရှားပါးတန်ဖိုးကြီး သစ်တွေကို စစ်ကောင်စီအကြမ်းဖက်အဖွဲ့နဲ့ ဆက်နွှယ်တဲ့ သစ်သူခိုးတွေ၊ သစ်ပွဲစားတွေ၊ သစ်လုပ်ငန်းရှင်တွေက ကိုယ်ကျိုးစီးပွားအတွက် ကားကြီး ၊ ကားငယ်၊ ဆိုင်ကယ်တွေနဲ့ နေ့စဉ် ခိုးယူရောင်းချသယ်ဆောင်နေကြတယ်လို့ ဆိုပါတယ်။
တချို့သစ်ခိုးသမားတွေဟာ တော်လှန်ရေးသမားတွေအသုံးပြုတဲ့ တူမီးသေနတ်တွေ ကိုင်ဆောင်ပြီး PDF တပ်ဖွဲ့ အယောင်ဆောင်ကာ သစ်တွေကို ခြိမ်းခြောက်ခိုးယူသယ်ဆောင်နေကြတဲ့အပြင် ရှားပါးဘေးမဲ့သားရိုင်းတိရစ္ဆာန်တွေကိုလည်း ဖမ်းဆီးသတ်ဖြတ်ရောင်းချနေတာကို စုံစမ်းသိရှိရတယ်လို့ ကနီမြို့နယ် ပြည်သူကာကွယ်ရေးအဖွဲ့က ထုတ်ပြန်ထားပါတယ်။
ပြည်သူ့ကာကွယ်ရေးတပ်ဖွဲ့အနေနဲ့ ပြည်သူတွေရဲ့ အသက်အိုးအိမ်စည်းစိမ်တို့ကို တတ်စွမ်းသလောက် ကာကွယ်ထိန်းသိမ်းဖို့၊ အာဆီယံအမွေအနှစ် အလောင်းတော်ကဿပ အမျိုးသားဥယျာဉ်နဲ့ သဘာဝသစ်တောကြိုးဝိုင်းကို စောင့်ရှောက်ဖို့ တာဝန်ရှိတာကြောင့် သစ်ခိုးယူတာတွေ အမြန်ဆုံးရပ်တန့်ကြဖို့ တောင်းဆိုထားပါတယ်။
ဆက်လက်လုပ်ဆောင်နေပါက မတော်လောဘသမားတွေအတွက် ပြုလုပ်သင့်တဲ့ လုပ်ရပ်တွေအဖြစ် အပြစ်ပေး ဆောင်ရွက်သွားမယ်လို့လည်း ကနီမြို့နယ် PDF က သတိပေး ထုတ်ပြန်ထားပါတယ်။
