ဧရာဝတီတိုင်း၊ ပုသိမ်မြို့ခံ မြစ်မခသတင်းဌာနရဲ့ အကြီးတန်းသတင်းထောက် ကိုမျိုးမင်းထွန်းကို ဩဂုတ် ၁၀ ရက်နေ့မှာ စစ်ကောင်စီက ထောင်ဒဏ် ၂ နှစ်ချမှတ်လိုက်တယ်လို့ မိသားစုနဲ့ နီးစပ်သူတွေက ပြောပါတယ်။ 

ပုသိမ်မြို့၊ အမှတ် ၂ ရပ်ကွက်က ကိုမျိုးမင်းထွန်း နေထိုင်တဲ့ နေအိမ်မှာ စစ်ကောင်စီတပ်သားတွေက ၂၀၂၁ ခုနှစ်၊ အောက်တိုဘာ ၂၂ ရက်နေ့ ညနေပိုင်းက လာရောက်ဖမ်းဆီးသွားပြီး ၁၀ လအကြာမှာ ခုလိုပြစ်ဒဏ်ချမှတ်ခဲ့တာလို့ မိသားစုနဲ့ နီးစပ်သူတဦးက ဒီဗွီဘီကိုပြောပါတယ်။  

“ဒီနေ့ နေ့လယ်ပိုင်းက ထောင်တွင်းတရာရုံးမှာ အမိန့်ချတာ။ သူက ကျန်းမာရေးတော့ တော်တော်ကောင်းပါတယ်။ သူကို သတင်းတွေတင်လို့ CDM  တွေနဲ့ စကားပြောလို့ဆိုပြီ ချလိုက်တာ” လို့ ပြောပါတယ်။  

ကိုမျိုးမင်းထွန်းဟာ စစ်တပ်အာဏာသိမ်းပြီးနောက်ပိုင်း သတင်းထောက်အလုပ် မလုပ်တော့ပေမယ့် နေအိမ်မှာရှိနေစဉ် ဖမ်းဆီးတာ ခံခဲ့ရပြီး ပုဒ်မ ၅၀၅(က) နဲ့ တရားစွဲ ထောင်ချခံခဲ့ရတာလို့ ဆိုပါတယ်။  

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း ဖမ်းဆီးထောင်ချခံရတဲ့ သတင်းထောက် ၃ ဦးထိ ရှိလာပြီလို့ ဒေသတွင်း သတင်းသမားတွေက ပြောပါတယ်။

ဧရာ၀တီတိုင်း၊ ပုသိမ်မြို့က မြစ်မခသတင်းဌာန သတင်းထောက်ဟောင်းဖြစ်သူ ကိုမျိုးမင်းထွန်းကို စစ်ကောင်စီက ဖမ်းဆီးပြီး ၆ လကျော်ကြာအထိ မိသားစုနဲ့တွေ့ခွင့်မပေးသေးဘူးလို့ သိရပါတယ်။

မြစ်မခအကြီးတန်းသတင်းထောက် ကိုမျိုးမင်းထွန်းကို စစ်ကောင်စီတပ်သားတွေ အောက်တိုဘာလပိုင်းက နေအိမ်မှာ လာရောက်ဖမ်းဆီးသွားပြီး ခုချိန်ထိ မိသားစုနဲ့ တွေ့ခွင့်မပေးသေးတာလို့ မိသားစုနဲ့နီးစပ်သူတွေက ပြောပါတယ်။

“ကိုမျိုးမင်းထွန်းကို ဖမ်းတာ ၆ လကျော်သွားပြီ ခုချိန်ထိတွေ့ခွင့်မရသေးဘူး။ သူ့အစ်ကို ဆုံးတာတောင် သူ သိရဲ့လားမသိဘူး။ သူအပါအဝင် နိုင်ငံရေးအကျဉ်းသားတွေ အားလုံးကို စစ်ကောင်စီက မိသားစုနဲ့ တွေ့ခွင့်မပေးတာ” လို့ နီးစပ်သူတဦးက ပြောပါတယ်။

သတင်းထောက် ကိုမျိုးမင်းထွန်း ဖမ်းဆီးခံရပြီး ၆ လပြည့်ခါနီးမှာ အစ်ကိုဖြစ်သူ သတင်းထောက်ဟောင်း ကိုမြမင်းဦး ရုတ်တရက်သေဆုံးခဲ့ပေမယ့် ကိုမျိုးမင်းထွန်း သတင်းမသိနိုင်ဘူးလို့ ဆိုပါတယ်။

စစ်ကောင်စီက သတင်းထောက် ကိုမျိုးမင်းထွန်းကို ပုဒ်မ ၅၀၅(က)နဲ့ အမှုဖွင့်ထားပြီး ထောင်တွင်းတရားရုံးမှာ ရုံးထုတ်စစ်ဆေးနေတယ်လို့ သိရပါတယ်။

သတင်းထောက် ကိုမျိုးမင်းထွန်းဟာ အာဏာသိမ်းပြီး ၂ လအကြာမှာ အလုပ်ကနေ ရပ်နားခဲ့သူ ဖြစ်တာကြောင့် အခုလို ဖမ်းဆီးတရားစွဲတာ မဖြစ်သင့်ဘူးလို့ သတင်းထောက်တွေက ပြောပါတယ်။

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း စစ်ကောင်စီက သံတော်ဆင့်သတင်းထောက် ကိုရဲရင့်ထွန်းကို ဖမ်းဆီးပြီး မတ် ၂၃ ရက်မှာ ထောင်ဒဏ် ၂ နှစ် ပြစ်ဒဏ်ချမှတ်ခဲ့ပါသေးတယ်။