မြန်မာနိုင်ငံမှာ အာဏာသိမ်းစစ်ကောင်စီက သတင်းသမားတွေကို ဖမ်းဆီးခြိမ်းခြောက်တာတွေ ပြုလုပ်ပြီး အမှန်တရား ဆိတ်သုဉ်းစေဖို့ ရည်ရွယ်လုပ်ဆောင်နေတယ်လို့ NUG ကိုယ်စားပြု ကုလကိုယ်စားလှယ် ဦးကျော်မိုးထွန်းက ပြောကြားလိုက်ပါတယ်။

အောက်တိုဘာ ၁၄ ရက်က နယူယောက်မြို့ ၇၇ ကြိမ်မြောက် ကုလသမဂ္ဂအထွေထွေညီလာခံရဲ့ တတိယ ကော်မတီရဲ့ လူ့အခွင့်အရေးမြှင့်တင်ကာကွယ်ရေးဘာသာရပ်နဲ့ပတ်သက်လို့ လွတ်လပ်စွာ ထင်မြင်ချက်ပေးခွင့်နှင့်ထုတ်ဖော်ပြောကြားခွင့်ဆိုင်ရာ အစီရင်ခံစာတင်သွင်းသူနဲ့ ဦးကျော်မိုးထွန်း တို့ အပြန်အလှန်ဆွေးနွေးတဲ့ အစီအစဉ်မှာ  အထက်ပါအတိုင်း ပြောခဲ့တာပါ။

ဦးကျော်မိုးထွန်းက ဆွေးနွေးရာမှာ သတင်းအချက်အလက်ဟာ အခြေခံလူ့အခွင့်အရေးဖြစ်ကာ ပဋိပက္ခဖြစ်တဲ့ နေရာနဲ့ အဲဒီမှာ နေတဲ့သူတွေအတွက် အထူးအရေးပါတယ်လို့ ပြောဆိုခဲ့ပြီး စစ်အာဏာသိမ်းတဲ့အချိန်ကစလို့ လွတ်လပ်စွာ ထင်မြင်ချက် ပေးခွင့်နဲ့ ထုတ်ဖော်ပြောကြားခွင့်ဟာ အလွန်ခက်ခဲဆိုးရွားတဲ့အခြေအနေမှာရှိနေပြီလို့ ထည့်သွင်းပြောဆိုခဲ့ပါတယ်။

မြန်မာစစ်တပ်ဟာ အာဏာသိမ်းပြီးချိန်ကစတင်ကာ သတင်းမှားတွေ၊ ဝါဒဖြန့်မှုတွေ၊ အကြမ်းဖက်မှုတွေအား စစ်ပွဲအင်္ဂါရပ်အဖြစ် လှုံ့‌ဆော်လုပ်ဆောင်နေကြောင်း၊ အထူးသဖြင့် နိုင်ငံပိုင် မီဒီယာ၊ သတင်းစာနဲ့ လူမှုကွန်ရက်တွေပေါ်ကနေ အကြမ်းဖက်မှုနဲ့ အမုန်းပွားမှုဖြစ်ပေါ်စေဖို့ မမှန်တဲ့သတင်းအချက်အလက်တွေ ဖြန့်ဝေနေတယ်လို့ ဦးကျော်မိုးထွန်း က ထောက်ပြထားပါတယ်။ 

ဒါ့အပြင် အာဏာသိမ်းချိန်ကစပြီး သတင်းဌာန ၁၂ ခုကို ပိတ်ခိုင်းခဲ့သလို  ပကတိ မြန်မာနိုင်ငံအခြေအနေမှန်ကို ဖော်ထုတ်ဖို့ ကြိုးစားတဲ့  သတင်းထောက် ၁၄၂ ဦးကို ဖမ်းဆီးကာ အမှန်တရား ဆိတ်သုန်းစေဖို့ လုပ်ဆောင်ခဲ့တယ်လို့လည်း ဆိုပါတယ်။ 

စစ်အာဏာရှင်စနစ်အား ကန့်ကွက်မှု ပြင်းထန်တဲ့ ဒေသအနှံ့အပြားမှာလည်း အင်တာနက်ကို ရည်ရွယ်ချက်ရှိရှိပိတ်ခဲ့တာကြောင့် မြန်မာနိုင်ငံရဲ့ အခြေအနေဟာ အရှိန်အဟုန်နဲ့ ဆိုးရွားလာနေကြောင်း၊ သတင်းအချက်အလက် ရယူခွင့်၊ လွတ်လပ်စွာ ထုတ်ဖော်ပြောကြားခွင့်တွေကို အလွန်အမင်းကန့်သတ်ထားပြီး သတင်းအချက်အလက်အမှားနဲ့ ဝါဒအမှားတွေကို ဖြန့်ကာ ပြည်သူကို လိမ်လည်လှည့်ဖြားပြီး ဒုက္ခဖြစ်စေတယ်လို့လည်း ဆိုပါတယ်။

ဒါကြောင့် မြန်မာနိုင်ငံမှာ ပြည်သူကို လိမ်လည်လှည့်ဖြားပြီး ဒုက္ခဖြစ်စေတဲ့ စစ်တပ်ရဲ့ သတင်းမှားဖြန့်တဲ့အပေါ် ဘယ်လိုကိုင်တွယ် ဖြေရှင်း ရမလဲဆိုတာကို မေးမြန်းခဲ့ပါတယ်။  

မြန်မာစစ်အာဏာရှင်ဟာ သတင်းထောက်တွေကို ခြိမ်းခြောက်တဲ့အနေနဲ့  ထင်ရာမြင်ရာ ဥပဒေတွေနဲ့ထောင်ချ နေတယ်လို့ အမေရိကန်အခြေစိုက် သတင်းသမားများ ကာကွယ်စောင့်ရှောက်ရေးကော်မတီ (CPJ) ကပြောကြားခဲ့ပြီး ကမ္ဘာမှာ သတင်းသမားတွေကို ဖမ်းဆီးထောင်ချမှု ဒုတိယအဆိုးဆုံးနိုင်ငံဖြစ်တယ်လို့လည်း မှတ်ချက်ပြုထားပါတယ်။ 

အလားတူ စစ်အာဏာရှင်အနေနဲ့ ဖမ်းဆီးထိန်းသိမ်းခံနေရတဲ့ သတင်းသမားတွေအားလုံးကို ပြန်လွှတ်ပေးဖို့နဲ့ မြန်မာနိုင်ငံမှာ သတင်းသမားတွေကို မတရားဖမ်းဆီးတာ၊ ညှဉ်းပန်းနှိပ်စက်တာ၊ လိင်ပိုင်းဆိုင်ရာ စော်ကားတာတွေကို ရပ်တန့်ဖို့တောင်းဆိုတာတွေပါဝင်တဲ့ ဆုံးဖြတ်ချက်တရပ်ကို  ဥရောပ ပါလီမန်က ပြီးခဲ့တဲ့ရက်ပိုင်းကပဲ ဆုံးဖြတ်ချက်တရပ် ချမှတ်ထားပါတယ်။

အကြမ်းဖက်စစ်ကောင်စီဟာ ဖေ့စ်ဘွတ်ခ်နဲ့ တခြားဆိုရှယ်မီဒီယာတွေပေါ်မှာ သတင်းအမှားတွေနဲ့ ဝါဒဖြန့်ချိရေးပို့စ်တွေကို တပ်တွင်းလုပ်ငန်းစဉ်တာဝန်တရပ်အနေနဲ့ ရည်ရွယ်ချက်ရှိရှိ စေခိုင်းနေတယ်လို့ တပ်တွင်း သတင်းရင်းမြစ်ကနေ ပေါက်ကြားလာတဲ့ အချက်အလက်မှတ်တမ်းတွေအရ သိရပါတယ်။

ဒီလို ဝါဒဖြန့်ချိရေး သတင်းအမှားတွေကို ဆိုရှယ်မီဒီယာပေါ် ဖြန့်ဝေရတဲ့ လုပ်ငန်းစဉ်ကို တပ်ထဲက အမျိုးသမီးတွေကပါ ပြုလုပ်နေရတာကို ဒီဗွီဘီကရရှိထားတဲ့ တောင်ငူလေတပ်စခန်းဌာနချုပ်က  အမျိုးသမီးအရာရှိတွေ ပြုစုပြီးအထက်ကိုတင်ပြရတဲ့ စာရွက်စာတမ်းအထောက်အထားတွေမှာ တွေ့ရှိရပါတယ်။

ဒီစာရင်းမှာဆိုရင် တပ်တွင်းအမျိုးသမီးတဦးက တပတ်အတွင်း ပို့စ် ၁၅ ခုတင်ခဲ့ကြောင်း၊ တင်ခဲ့တဲ့ ပို့စ်တခုချင်းအကြောင်းအရအပြင်  like ၂၄၄ ခု နဲ့ share ၄၇ ခါရကြောင်းတွေကိုပါ သေးစိတ် အစီရင်ခံတင်ပြထားပါတယ်။

ဒီအချက်အလက်တွေအရ အမျိုးသမီးအရာရှိတစ်ဦး ဒါမှမဟုတ် တပ်ထဲက အမျိုးသမီးတစ်ဦး လူမှုကွန်ရက်အသုံးပြုပြီး ဝါဒဖြန့်တာဖြစ်ဖြစ် သတင်းအမှားဖြန့်တာ ဖြစ်ဖြစ် တစ်နေ့ကို post တစ်ခုနဲ့အထက် တင်ရတာကို လုပ်ငန်းစဉ်တစ်ခုလို လုပ်ဆောင်နေကြတာပါ။

ဒီလို လုပ်ငန်းကို အာဏာသိမ်းစစ်ခေါင်းဆောင်ရဲ့ ဇနီးဖြစ်သူက ဦးဆောင်ကာ အဖွဲ့တဖွဲ့ဖွဲ့စည်းပြီး တပ်ရင်းတပ်ဖွဲ့တွေထဲက အမျိုးသမီးတွေကို  နေ့စဉ်တာဝန်အဖြစ်ခိုင်းစေနေတာလို့လည်း အတည်ပြုလို့မရနိုင်သေးတဲ့ သတင်းတွေလည်း ထွက်နေပါတယ်။

ဖေ့စ်ဘွတ်ခ်လို ဆိုရှယ်မီဒီယာပလက်ဖောင်းတွေကို စစ်အာဏာသိမ်းပြီးနောက် ဖေဖော်ဝါရီ ၄ ရက်နေ့ကတည်းက အာဏာသိမ်းစစ်ကောင်စီကပဲ စတင်ပိတ်ပင် ကန့်သတ်ခဲ့ပါတယ်။

အခုချိန်ထိလည်း ကန့်သတ်ပိတ်ပင်ထားတဲ့ ဆိုရှယ်မီဒီယာ ပလက်ဖောင်းပေါ်မှာပဲ ဝါဒဖြန့်ချိရေးတွေကို လုပ်ငန်းစဉ်တစ်ရပ်အနေနဲ့ တပ်တွင်းမှာ အမျိုးသမီးတွေပါမကျန် ပြုလုပ်နေရတာ အထောက်အထားတွေနဲ့တကွ ပေါ်ထွက်လာတာဖြစ်ပါတယ်။

အခုလတ်တလောမှာတော့ ဖမ်းဆီးတရားစွဲဆိုခံထားရတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ပတ်သက်တဲ့ သတင်းအမှားတွေ၊ NUG ပြည်ထောင်စုဝန်ကြီးတွေနဲ့ ပတ်သက်တဲ့ သတင်းအမှားတွေ၊ ဒေသတွင်း PDF တွေနဲ့ပတ်သက်တဲ့ သတင်းအမှားတွေ၊ သတင်းထောက်တွေကို မဟုတ်မမှန် စွပ်စွဲထားတဲ့ ပို့စ်တွေ ဆိုရှယ်မီဒီယာပေါ်မှာ ပျံ့နှံ့နေပါတယ်။