အီသီယိုပီးယားနိုင်ငံမှာ တစ်ဂရေးဒေသက သူပုန်တွေက အမ်ဟာရာဒေသထဲက ရွာတရွာမှာ အရပ်သား အယောက် ၁၂၀ ကို ၂ ရက်အတွင်း သတ်ခဲ့တယ်လို့  ဒေသခံအရာရှိတွေက ရိုက်တာ သတင်းဌာနကို စက်တင်ဘာ ၈ ရက်မှာ ပြောပါတယ်။

ဒါဘတ်မြို့ကနေ ၆ မိုင်ဝေးတဲ့ ရွာမှာ စက်တင်ဘာ ၁ ရက်နဲ့ ၂ ရက်နေ့တွေက သတ်ခဲ့တာလို့ ဒါဘတ်မြို့ အုပ်ချုပ်ရေးမှူးနဲ့ ဂွန်ဒါမြို့ ပြောခွင့်ရတို့က ပြောပါတယ်။

တစ်ဂရေးတပ်ကတော့ အမ်ဟာရာဒေသန္တရအစိုးရရဲ့ စွပ်စွဲချက်လို့ ပြောရင်း ငြင်းဆိုပယ်ချတဲ့ ကြေညာချက်ကို ထုတ်ပြန်ခဲ့ပါတယ်။ အရပ်သားတွေကို သတ်ဖြတ်မှုမှာ ဘယ်လို ပါဝင်ပတ်သက်မှုမှ မရှိဘူးလို့လည်း ငြင်းပါတယ်။

ဒါဟာ တစ်ဂရေးတပ်တွေက အမ်ဟာရာပိုင်နက်ကို သိမ်းပိုက်အပြီး အရပ်သား သတ်ဖြတ်မှုနဲ့ပတ်သက်လို့ ပထမဆုံးအစီရင်ခံစာ ဖြစ်လာပါတယ်။ တစ်ဂရေးတပ်တွေက စီးနင်းချိန်က စပြီး ဒေသတွင်းက ပြည်သူ ထောင်သောင်းချီဟာ အိုးအိမ်စွန့်ခွာ ထွက်ပြေးခဲ့ကြပါတယ်။

အလောင်း ၁၂၀ ကို ပြန်ရထားကာ အားလုံးအပြစ်ကင်းတဲ့ လယ်သမားတွေဖြစ်ပြီး တကယ်သေဆုံးတဲ့ အရေအတွက် ပိုများနိုင်တဲ့အပြင် ပျောက်နေတဲ့ သူတွေ ရှိသေးတယ်လို့ ဒေသခံ အုပ်ချုပ်ရေးမှူးက ရိုက်တာသတင်းဌာနကို ဖုန်းနဲ့ ပြောပါတယ်။

ရွာသင်္ချိုင်းကို သွားကြည့်ပြီးပြီ သေဆုံးသူတွေထဲမှာ အမျိုးသမီးတွေ သက်ကြီးရွယ်အိုတွေနဲ့ ကလေးတွေလည်း ပါတယ်လို့ ဂိုဒါမြို့ ပြောခွင့်ရက ပြောပါတယ်။

တစ်ဂရေးတပ်တွေ အဲဒီဒေသထဲမှာ အချိန်တိုလေး ရှိနေချိန်မှာ သတ်ဖြတ်တာတွေ ဖြစ်ခဲ့တာ ဖြစ်ပြီး ခုတော့ ဒီဒေသဟာ အီသီယိုပီးယား ပြည်ထောင်စုတပ်ရဲ့ ထိန်းချုပ်မှု အောက်မှာ ရောက်နေ ပြီလို့ သူက ဆက်ပြောပါတယ်။

အခြေအနေကို သီးခြား လွတ်လွတ်လပ်လပ် စစ်ဆေး အတည်ပြုနိုင်တာတော့ မဟုတ်ပါဘူး။  တစ်ဂရေးသူပုန်တပ်ကတော့ ဒေသတွင်း ရက်စက်ယုတ်မာမှု အားလုံးကို လွတ်လွတ်လပ်လပ် စုံစမ်းစစ်ဆေးဖို့ ကြေညာချက် ထုတ်ပြန် ဆော်သြ ထားပါတယ်။

ရွာသားတွေက တစ်ဂရေးတပ်တွေကို တိုက်ခိုက်ခဲ့တယ်လို့ ဂွန်ဒါမြို့အစိုးရက ရိုက်တာ သတင်းဌာနဆီပေးပို့တဲ့ ရုပ်သံ လူတွေ့ မေးမြန်းခန်းမှာ ပြောထားပါတယ်။

တစ်ဂရေး သူပုန်တပ်နဲ့ တိုက်ပွဲမှာ ပူးပေါင်းဖို့ အီသီယိုပီးယားအစိုးရက ပြည်သူတွေကို အရင်လက တိုက်တွန်းခဲ့ပါတယ်။