မွန်ပြည်နယ်ထဲမှာ အခုရက်ပိုင်းတွေအတွင်း ကိုယ့်ကိုယ်ကိုယ် အဆုံးစီရင်မှု ၂ မှုဖြစ်ပွားခဲ့ပြီး မြို့နယ် ၂ မြို့နယ်ထဲမှာ ဖြစ်ပွားခဲ့တာလို့ ဒေသခံလူမှုကယ်ဆယ်ရေးအဖွဲ့တွေထံက သိရပါတယ်။
မတ်လ ၁၆ ရက် မွန်းလွဲပိုင်းက ရေးမြို့၊ ရန်ကြီးအောင်ရပ်နေ အသက် ၅၁ နှစ် အရွယ် အမျိုးသားတယောက်ဟာ နေအိမ်တွင်းမှာဘဲ ကိုယ့်ကိုယ်ကိုယ် ဆွဲကြိုးချ အဆုံးစီရင်သွားခဲ့တယ်လို့ လူမှုကယ်ဆယ်ရေးသမားတွေက ပြောပါတယ်
မတ် ၁၇ ရက် မနက် ၃ နာရီခွဲလောက်ကလည်း မော်လမြိုင်မြို့ ဖက်တန်းရပ်ကွက် ဒေါင်းမင်းရပ်နေအိမ်မှာ အသက် ၄၀ အရွယ် သားသမီး ၄ ယောက်ရဲ့မိခင် အမျိုးသမီးတယောက်ဟာ ကိုယ့်ကိုယ်ကိုယ် ဆွဲကြိုးချအဆုံးစီရင်မှုဖြစ်ပွားခဲ့တယ်လို့ လူမှုကယ်ဆယ်ရေးအဖွဲ့ဝင် ဒေသခံတယောက်က ပြောပါတယ်။
အခုလို အဆုံးစီရင်မှုတွေဟာ စစ်တပ်အာဏာသိမ်းပြီး ၂ နှစ်တာကာလအတွင်းမှာ အများဆုံးဖြစ် လာပြီ စိတ်ဖိစီးမှုတွေကြောင့်နဲ့ စိတ်ကျရောဂါကြောင့် ဖြစ်တယ်လို့ ကယ်ဆယ်ရေးသမားတွေက ပြောပါတယ်။
အခုလို ကိုယ့်ကိုယ်ကိုယ် အဆုံးစီရင်သူတွေထဲမှာ အသက် ဆယ်ကျော်သက်အရွယ်နဲ့ အသက် ၅၀ ကျော်ကြားမှာ ပိုမိုအဖြစ်များပြီးတော့ အိမ်ထောင်ရေး လူမှုရေးကိစ္စနယ်ပယ်ပြဿနာတွေကြောင့် အဖြစ်များလာခဲ့တယ်လို့ စိတ်ကျန်းမာရေးကျွမ်းကျင်သူတွေထံက သိရပါတယ်။
ချင်းပြည်နယ်၊ ဖလမ်းမြို့နယ်၊ ဗားရ်ကျေးရွာရဲစခန်းက ရဲအုပ်တဦး နိုဝင်ဘာ ၂၅ ရက် မနက်အစောပိုင်းက ကိုယ့်ကိုယ်ကိုယ် သေနတ်နဲ့ပစ်ပြီး သတ်သေသွားတယ်လို့ ဒေသခံအမျိုးသားတဦးက ဒီဗွီဘီကို ပြောပါတယ်။
“ရဲအုပ်ရဲမင်းထွဋ် အသက်က ၃၀ ကျော်လောက်ရှိမယ်။ ဒီနေ့မနက် ၅ နာရီ ဝန်းကျင်လောက်က ကိုယ့်ကိုယ်ကိုယ် သေနတ်နဲ့ပစ်ပြီး သတ်သေသွားတာ။”
ရဲအုပ်ရဲမင်းထွဋ် ဘာကြောင့်သတ်သေရတယ်ဆိုတဲ့ အကြောင်းရင်းကိုတော့ မသိရှိရသေးပါဘူး။
ဗားရ်ကျေးရွာဟာ ဖလမ်းမြို့ကနေ ကလေးမြို့ကို လာတဲ့လမ်းမှာရှိပြီး ဖလမ်းမြို့ကနေ ၃ မိုင်ခန့်ဝေးတဲ့ မဏိပူရမြစ်ကိုဖြတ်တဲ့ တံတားဘေးမှာရှိတဲ့ ကျေးရွာတရွာ ဖြစ်ပါတယ်။
ဖလမ်းမြို့နယ်မှာ ဒေသတွင်း ပြည်သူ့ကာကွယ်ရေးတပ်တွေနဲ့ စစ်ကောင်စီတပ်တွေ မကြာခဏ တိုက်ပွဲဖြစ်ပွားနေကာ စစ်ဘေးရှောင်တွေလည်း အများအပြားရှိနေပြီး အခြေခံစားသောက်ကုန်နဲ့ ဆေးဝါးအကူအညီတွေ လိုအပ်နေတယ်လို့ တော်လှန်ရေးနဲ့ နီးစပ်သူတဦးက ဆိုပါတယ်။
