မွန်ပြည်နယ်၊ သထုံမြို့ အောက်ကျင်းရပ်ကွက်ရှိ သထုံခရိုင် လူမှုဝင်မှုကြီးကြပ်ရေးဦးစီးဌာန လ.ဝ.ကရုံးဟာ မနေ့ ဧပြီ ၃ ရက် နေ့လယ် ၃ နာရီခွဲလောက်မှာ မီးရှို့ခံလိုက်ရတယ်လို့ ဒေသခံတွေနဲ့ စစ်ကောင်စီ ဌာနဆိုင်ရာ ဝန်ထမ်းတွေက ပြောပါတယ်။

သထုံမြို့လယ်ကောင်မှာရှိတဲ့ လ,ဝ.က ရုံးထဲ လက်နက်ကိုင်ထားတဲ့ အမျိုးသား ၅ ဦး ဝင်ရောက်လာပြီး ရုံးထဲမှာရှိနေတဲ့ ရုံးဝန်ထမ်း ၄ ဦးကို လက်ပြန်ကြိုးတုပ်ပြီးနောက် နှစ်ထပ်ရုံး အဆောက်အဦ နေရာအနှံ့ မီးရှို့ကာ ပြန်လည်ထွက်ခွာသွားတယ်လို့ ဆိုပါတယ်။

လ.ဝ.ကရုံး မီးရှို့ခံရတာကြောင့် အဆောက်အဦ တခုလုံးနီးပါး မီးလောင်ပျက်စီးခဲ့ပြီး ရုံးအနီးက နေအိမ် ၂ လုံးမှာလည်း မီးအနည်းငယ် ကူးစက်လောင်ကျွမ်းမှု ဖြစ်ပေါ်ခဲ့ပါတယ်။

စစ်တပ်ထောက်ခံသူ တယ်လီဂရမ်အကောင့်မှာတော့ လ.ဝ.က ရုံး မီးရှို့ဖျက်ဆီးမှုကို ပြည်သူ့ကာကွယ်ရေးတပ်ဖွဲ့ PDF တွေ လုပ်ဆောင်ခဲ့တာလို့ ဝါဒဖြန့်တာတွေ ရှိနေပါတယ်။

သထုံခရိုင် PDF တာဝန်ခံ ကိုအေးမင်းထွန်းကတော့ လ.ဝ.က ရုံး မီးရှို့မှုကို လုပ်ဆောင်ခဲ့တာ မရှိကြောင်းနဲ့ ပြည်သူပိုင်နေအိမ်တွေတဲ့ နီးကပ်တဲ့ အဆောက်အဦတွေနဲ့ ပြည်သူပိုင် ပစ္စည်းတွေကို မီးရှို့တာတွေ လုပ်ဆောင်မှာ မဟုတ်ဘူးလို့ ဒီဗွီဘီကို ပြောပါတယ်။

လုံခြုံရေးတင်းကျပ်ထားတဲ့ သထုံမြို့ရဲ့ မြို့လယ်ကောင်မှာရှိတဲ့ သထုံခရိုင် လ.ဝ.က ရုံး မီးရှို့ခံရတဲ့ ဖြစ်စဉ်အပေါ်  ဒေသခံတွေကြားမှာ သုံးသပ်ချက်အမျိုးမျိုး ထွက်ပေါ်နေပါတယ်။

သထုံခရိုင် လ.ဝ.က ရုံးဟာ စစ်တပ်အာဏာသိမ်းပြီးနောက် ဒေသခံပြည်သူတွေထံကနေ ငွေကြေး အဆမတန် တောင်းယူတာတွေ ရှိနေတဲ့အတွက် ၂ ကြိမ်တိုင် ဗုံးဖောက်ခွဲ သတိပေးခံထားရဖူးပါတယ်။

ကေအန်ယူ တပ်မဟာ(၁) ထိန်းချုပ်နယ်မြေဖြစ်တဲ့ သထုံခရိုင် တဝေါသောရွာက တောင်သူတွေအနေနဲ့ စစ်ကောင်စီရဲ့ ထိုးစစ်တွေကြောင့် စပါးနေရာမှာ နနွင်းကို ပြောင်းလဲစိုက်ပျိုးလာတယ်လို့ ဒေသခံတွေက ပြောပါတယ်။

အဲဒီဒေသရဲ့ မြေစနစ်အရ တောင်ယာတစ်ခင်း စပါးစိုက်ပျိုးလို့ အိမ်ထောင်မိသားစုအတွက် မလောက်ငှသလို စစ်ကောင်စီဘက်က စစ်ကြောင်း မကြာခဏ ထိုးနေလို့ အခုလို နနွင်းပြောင်းစိုက်တာလည်း ပါတယ်လို့ နနွင်းလုပ်ငန်းလုပ်ကိုင်သူ ဒေသခံ CDM ဆရာမတစ်ဦးက ပြောပါတယ်။

ပြီးခဲ့တဲ့ နှစ်တွေက စစ်ကောင်စီက စစ်ကြောင်းထိုးတဲ့အချိန် စပါးတွေက ထားခဲ့ရပြီး စပါးက အချိန်လွန်ရင် မဖြစ်မနေ ရိတ်သိမ်းပေးရကာ နနွင်းကျတော့ ရိတ်သိမ်းစရာမလိုပဲ ဒီအတိုင်းပဲ ပစ်ထားခဲ့လို့ရတာကြောင့် အခုလို စိုက်ပျိုးဖြစ်တာလို့လည်းဆိုပါတယ်။

အရင်ကတော့ နနွင်းကို အိမ်သုံးဖို့အတွက် တစ်ပိုင်တစ်နိုင် စိုက်ပျိုးရာကနေ အခုခါမှာတော့ ပြန်လည်ရောင်းချဖို့အတွက် စိုက်ပျိုးလာကြပြီး နနွင်းကို ဧပြီနဲ့ မေလမှာ စတင်စိုက်ပျိုးကာ ၉ လအကြာမှာ ပြန်လည်တူးဖော်ရပြီး နနွင်း အစို ၁၀ ပိဿာကို အခြောက် ၂ ပိဿာထွက်ရှိပြီး ထွက်ပြီးသား နနွင်းတွေကို ပဲခူးမြို့ပေါ်ကို တင်ပို့ရောင်းချတယ်လို့ နနွင်းလုပ်ငန်းလုပ်ကိုင်သူ ဒေသခံတွေက ပြောပါတယ်။

စစ်တပ်အာဏာသိမ်းပြီး နောက်ပိုင်း ကေအဲန်ယူ ထိန်းချုပ်နယ်မြေတွေကို စစ်ကောင်စီတပ်က မကြာခဏ စစ်ကြောင်းထိုးနေတဲ့အတွက် တဝေါသောရွာ နဲ့ ရွာနီးစပ်က ဒေသခံတွေက မကြာခဏဆိုသလို နေရပ်စွန့်ခွာ ထွက်ပြေးနေရပါတယ်။