ဂျာမနီနဲ့ ကနေဒါ တာဝန်ရှိသူတွေဟာ ၂၀၂၅ ခုနှစ်မှာ ဂျာမနီကို သန့်စင်တဲ့ လောင်စာတင်ပို့ရေး ရည်ရွယ်ပြီး ဟိုက်ဒရိုဂျင်မဟာမိတ် သဘောတူစာချုပ်ကို သြဂုတ် ၂၃ ရက်မှာ လက်မှတ်ရေးထိုးခဲ့ပါတယ်။
ဂျာမနီအဓိပတိ အိုလာ့ဖ်ရှို့လ်ဇ်ဟာ သြဂုတ် ၂၁ ရက်က စတင်ခဲ့တဲ့ ပထမဆုံး ကနေဒါနိုင်ငံ တရားဝင်ခရီးစဉ်အတွင်း သဘောတူညီမှု ရရှိခဲ့တာဖြစ်ပါတယ်။
ဒီသဘောတူညီချက်ဟာ လူလတ်တန်းစား အလုပ်အကိုင်တွေနဲ့ ဒေသဆိုင်ရာ တိုးတက်မှုတို့ကို ဖန်တီးပေးမှာဖြစ်ပြီး ရာသီဥတုပြောင်းလဲမှုကို တိုက်ဖျက်မှာဖြစ်ကြောင်း ကနေဒါဝန်ကြီးချုပ် ဂျပ်စတင်ထရူးဒိုးက နယူးဖောင်လန်မှာ ကျင်းပတဲ့ပွဲအတွင်း ပြောကြားခဲ့ပါတယ်။
ဟိုက်ဒရိုဂျင်မဟာမိတ်အဖွဲ့ကနေတဆင့် ကနေဒါနဲ့ ဂျာမနီတို့ဟာ ဟိုက်ဒရိုဂျင် စီမံကိန်းတွေမှာ ရင်းနှီးမြှုပ်နှံမှုတွေကို ဆွဲဆောင်ဖို့ မူဝါဒတွေကို ညှိနှိုင်းဆောင်ရွက်နေချိန် အတွင်းမှာပဲ အတ္တလန္တိတ်ဖြတ်ကျော် ထောက်ပံ့ရေးစင်္ကြံတခုကို တည်ထောင်ဖို့လည်း ရည်ရွယ်ထားပါတယ်။
ကနေဒါနဲ့ ဂျာမန်ကုမ္ပဏီတွေဟာ ဟိုက်ဒရိုဂျင်နည်းပညာဈေးကွက်မှာ ကောင်းမွန်စွာ ရပ်တည်နေကြပေမဲ့ တခြားနိုင်ငံတွေက ထုတ်လုပ်သူတွေ အထူးသဖြင့် တရုတ်၊ အမေရိကန်တို့ဟာ သူတို့ရဲ့ ထုတ်လုပ်မှုစွမ်းရည်ကို ချဲ့ထွင်တာကနေ စျေးကွက်ဝေစုကို ပိုမိုရရှိနေကြကြောင်း ဂျာမန်အဓိပတိက ပြောပါတယ်။
ကနေဒါကုမ္ပဏီတွေဟာ ဂျာမနီမှာ စွမ်းအင်စီမံကိန်းတွေကို အကောင်အထည်ဖော်နေပြီ ဖြစ်ကြောင်းလည်း အိုလာ့ဖ် ရှို့လ်ဇ်က ပြောသွားပါတယ်။
