စကော့တလန်နိုင်ငံမှာ လစာငွေအပေါ် အငြင်းအခုန်ဖြစ်နေတဲ့ သန့်ရှင်းရေးလုပ်သားတွေရဲ့ သပိတ်မှောက်မှုဟာ မြို့ကြီးတွေဆီ ပျံ့နှံ့သွားပြီး မြို့တော် အက်ဒင်ဘရာ့ရဲ့ လမ်းအမြင့်ပိုင်းတွေမှာ လာမသိမ်းယူကြတဲ့ ပိုင်ရှင်မဲ့ အမှိုက်ပုံးတွေဆီက အမှိုက်တွေကြောင့် မြို့တော်ရဲ့ နိုင်ငံတကာ အနုပညာနဲ့ Fringe ပွဲတော်အတွင်း အနံ့အသက်တွေ နံစော်နေပါတယ်။
သြဂုတ် ၂၅ ရက်က လူမှုကွန်ရက်မှာ တင်ထားတဲ့ ဗွီဒီယိုဖိုင်မှာတော့ လမ်းပေါ်မှာ အမှိုက်ပုံးတွေ ပြည့်လျှံနေတာကို တွေ့ရပါတယ်။
ဒေသဆိုင်ရာအာဏာပိုင်တွေနဲ့ သမဂ္ဂခေါင်းဆောင်တွေအကြား လစာညှိနှိုင်းမှုတွေ ဆက်လုပ်ဆောင်နေပေမဲ့ ဩဂုတ် ၁၈ ရက်မှ စတင်တဲ့ အက်ဒင်ဘရာ့ရဲ့ အမှိုက်ပုံးသပိတ်ကို ပွဲတော်ပြီးဆုံးပြီး နောက်တနေ့ သြဂုတ် ၃၀ ရက်အထိ ဆက်လုပ်သွားဖို့ စီစဉ်ထားပါတယ်။
ဒေသန္တရအစိုးရအဖွဲ့ဟာ ၅ ရာခိုင်နှုန်း ပိုပေးဖို့ ကမ်းလှမ်းချက်ကို ငြင်းပယ်ခဲ့ပြီးနောက် ပိုကောင်းတဲ့ လစာငွေ သဘောတူညီချက်အတွက်လည်း အပိုရန်ပုံငွေကို ထပ်ခွဲပေးဖို့မရှိကြောင်း ရှင်းလင်း ပြောကြားခဲ့တယ်လို့ စည်းလုံးညီညွတ်သော အလုပ်သမားသမဂ္ဂအဖွဲ့က အခုသီတင်းပတ်အတွင်း ပြောကြားခဲ့ပါတယ်။
အာဘာဒီးန် နဲ့ စကော့တလန်ရဲ့ အကြီးဆုံးမြို့ ဂလပ်စ်ဂိုးအပါအဝင် တခြားဒေသ တစ်ဒါဇင် ကျော်မှာလည်း အလားတူ သပိတ်တွေ စတင်နေပြီဖြစ်ပါတယ်။
သပိတ်တွေဟာ စကော့တလန်မြို့တော်ကို လူပေါင်းသန်းချီ အာရုံဆွဲဆောင်နိုင်တဲ့ အက်ဒင်ဘရာ့ရဲ့ နှစ်စဉ် ကျင်းပနေကျ Fringe ပွဲတော်နဲ့ တိုက်ဆိုင်နေပါတယ်။
စကော့တလန် ပထမ၀န်ကြီး Nicola Sturgeon ကတော့ သူ့အစိုးရအဖွဲ့ဟာ ဒီအငြင်းပွားမှုအပေါ် စိတ်ဝင်စားမှု မရှိဘူးလို့ အတိုက်အခံ နိုင်ငံရေးသမားတွေရဲ့ ဝေဖန်မှုကို ခံနေရပြီး ဒေသဆိုင်ရာ မြို့တော်ကောင်စီတို့ကို အပြစ်တင်ထားပါတယ်။
အက်ဒင်ဘရာ့မြို့တော် ကောင်စီကတော့ သပိတ်တွေ ပြီးဆုံးတာနဲ့ ချက်ခြင်း ရှင်းလင်းရေး စတင်ဖို့ စီစဉ်နေကြောင်း ပြောကြားခဲ့ပါတယ်။
