အာဏာသိမ်းစစ်ကောင်စီက ဖွင့်လှစ်တဲ့ လပွတ္တာမြို့နယ်၊ ရှမ်းချောင်းကျေးရွာ စာသင်ကျောင်းမှာ ကျောင်းသားသူကျောင်းသားတွေကို နေ့စဉ် ကျောင်းဆင်းချိန်သန့်ရှင်းရေးလုပ်ခိုင်းနေလို့ အိမ်ပြန်နောက်ပြီး မိဘတွေ စိတ်ပူနေရတယ်လို့ ဒေသခံတွေထံက သိရပါတယ်။ 

ရှမ်းချောင်းကျေးရွာ အလယ်တန်းကျောင်း(ခွဲ)မှာ နေ့စဉ်ဆိုသလို စစ်ကောင်စီဩဇာခံ ဆရာ ဆရာမတွေက ကျောင်းသား ကျောင်းသူတွေကို ကျောင်းဆင်းချိန်သန့်ရှင်းရေးလုပ်ခိုင်းလို့ ကျောင်းသားတွေ နေအိမ်ကို  ၆ နာရီလောက်မှပြန်ရောက်တယ်လို့ ဒေသခံကျောင်းသားမိဘတွေက ပြောပါတယ်။

ကျောင်းသားမိဘတဦးက “ကလေးတွေကိုမေးကြည့်တော့ ကျောင်းမှာ သန့်ရှင်းရေးနဲ့ ဗာဟီရကိစ္စတွေလုပ်နေရတယ်ပြောတယ်။ ကျောင်းမှာက ဒါရဝမ် (ခြံလုပ်သား) မရှိဘူးလေ။ မဖြစ်တဲ့အဆုံးမလို့သာ ကျောင်းတက်ခိုင်းရပေမဲ့ အဲ့လိုမျိုး ကလေးတွေကို ခိုင်းတာမျိုးတော့ မခံချင်ဘူး မဖြစ်သင့်ဘူးထင်တယ်”လို့ ပြောပါတယ်။ 

ကျောင်းသား ကျောင်းသူတွေကို စာသင်ခန်းတွေကို သန့်ရှင်းရေးလုပ်ဖို့နဲ့ ကျောင်းအိမ်သာတွေကိုပါ ဆေးဖို့ ကျောင်းအုပ်ကြီးကိုယ်တိုင်က စေခိုင်းထားတာလို့ ဆိုပါတယ်။ 

ရှမ်းကျောင်းကျေးရွာမှာရှိတဲ့ အလယ်တန်းကျောင်း(ခွဲ)မှာ ရှမ်းကျောင်းကျေးရွာနေ ဒေသခံရွာသားတွေရဲ့ သားသမီးတွေ ကျောင်းတက်သလို တခြားကျေးရွာက ကလေးတွေလည်း ကျောင်းလာတက်နေကြပြီး  ကျောင်းသား ကျောင်းသူ ၁၀၀ ကျော်ရှိတယ်လို့ သိရပါတယ်။

ထိုင်း-မြန်မာ အမှတ် (၁) ချစ်ကြည်ရေးတံတား မေလ ၅ ရက် ဖွင့်လှစ်နိုင်ဖို့ ထိုင်းတာဝန်ရှိသူတွေ မဲဆောက်မြို့မှာ ဧပြီ ၃၀ ရက်က ဆွေးနွေးခဲ့ကြအပြီး ကြိုတင်ပြင်ဆင်တဲ့အနေနဲ့ တံတားထိပ်မှာ ဒီနေ့ သန့်ရှင်းရေးလုပ်နေကြပါတယ်။

ထိုင်း လဝက (တောမော) အရာရှိတဦးကတော့ လာမယ့် မေ ၅ ရက်မှာ ဖွင့်လှစ်ဖို့ စီစဉ်ထားတယ်လို့ ဒီဗွီဘီ သတင်းထောက်ကို ပြောပါတယ်။ 

မြဝတီ- မဲဆောက် အမှတ်(၁) ချစ်ကြည်ရေးတံတားပေါ်မှာ ဧပြီ ၂၃ ရက်နေ့ ည ၁၀ နာရီခွဲလောက်က အင်အားပြင်း ဗုံးပေါက်ကွဲမှု ဖြစ်ခဲ့တာကြောင့် ထိုင်းဘက်ခြမ်းမှာ ဒီနေ့အထိ လုံခြုံရေးကို တင်းတင်းကျပ်ကျပ် ချထားပါတယ်။ 

မြန်မာဘက်ခြမ်း ဗုံးပေါက်ကွဲခဲ့တဲ့ နေရာကိုလည်း အာဏာပိုင်တွေက ရှင်းလင်းနေပြီးပြီလို့ သိရပြီး မေ ၅ အမီ တံတားဖွင့်နိုင်ရေး ပြင်ဆင်မှု ရှိမရှိကိုတော့ ရှင်းရှင်းလင်းလင်း မသိရသေးပါဘူး။ 

မြန်မာအလုပ်သမားအရေး လုပ်ဆောင်နေသူ ကိုသားကြီးကတော့ ထိုင်းဘက်ကတော့ သေချာနေပြီး မြန်မာဘက်က ခွင့်ပြုမှသာ တံတားပြန်ဖွင့်ရေး ဖြစ်မြောက်လာနိုင်မယ်လို့ ဆိုပါတယ်။ 

ကိုဗစ်ကပ်ရောဂါကြောင့် ထိုင်း-မြန်မာ  နှစ်နိုင်ငံ နယ်စပ်ကုန်သွယ်ရေး ဂိတ်တွေကို ၂၀၂၀ ဇူလိုင်လလောက်ကစပြီ ပိတ်ထားတာကြောင့် နှစ်ဖက်ကုန်သည်တွေ နစ်နာဆုံးရှုံးနေပြီး အမြန်ဆုံး ပြန်လည်ဖွင့်လှစ်ပေးဖို့ လိုလားနေကြတာပါ။