မန္တလေးတိုင်း၊ သပိတ်ကျင်းမြို့နယ်၊ တကောင်းတိုက်နယ်၊ ရွှေကိုးပင်လမ်းပေါက်မှာ မေလ ၂ ရက် ည ၉ နာရီက စစ်​ကောင်စီတပ်သားတွေ လိုက်ပါလာတဲ့ ကားတစီး မိုင်းဆွဲတိုက်ခိုက်ခံရပြီး စစ်သား ၃ ဦး သေဆုံးခဲ့တယ်လို့ သိရပါတယ်။

စစ်ကောင်စီတပ်သား ၇ ဦးပါလာပြီး အင်းနက်ရွာက ထွက်လာတဲ့ Double Cup Four Wheels ကားအဖြူတစီးကို မိုင်း ၄ လုံးဆွဲ တိုက်ခိုက်ခဲ့တယ်လို့ တကောင်းပကဖ သတင်းနဲ့ ပြန်ကြားရေးတာဝန်ခံ မာမီက ပြောပါတယ်။

“၇ ယောက်ပါတာ၊ ၃ ယောက်က ပွဲချင်းပြီး၊ ၃ ယောက်က ဒဏ်ရာရတာ၊ ရှေ့ကမောင်းတဲ့သူက ခံသာသွားတာ၊ နောက်က ၄ ယောက်ပါတာ၊ ၃ ယောက်သေတယ်။ မိုင်းလေးလုံး တခါတည်းကွဲပြီး ကားပါပျက်စီးသွားတာ။ တည့်ထိသွားတာ။ ကားပါ တခါတည်း ထိုးရပ်သွားတာ။ စစ်သားတွေလည်း လွင့်ထွက်သွားတယ်။”

စစ်ကောင်စီတပ်က ပျက်စီးသွားတဲ့ကားနဲ့ သေဆုံးသွားတဲ့ စစ်သား ၃ ဦးနဲ့ ဒဏ်ရာရစစ်သား ၃ ဦးကို မနေ့ညက ပြန်သယ်သွားပြီး တကောင်းဆေးရုံကို သယ်ဆောင်သွားတယ်လို့ သိရပါတယ်။

အဆိုပါ မိုင်းဆွဲတိုက်ခိုက်မှုကို တကောင်းပကဖနဲ့ လျှပ်စီးပြောက်ကျားတပ်ဖွဲ့တို့ လုပ်ဆောင်ခဲ့ကြောင်း တကောင်းပကဖက ထုတ်ပြန်ထားပါတယ်။

မကွေးတိုင်း၊ မြိုင်မြို့နယ်မှာလည်း မေ ၂ ရက် မနက်က ရဲနဲ့ ပျူစောထီးတွေ မိုင်းဆွဲတိုက်ခိုက်ခံရပြီး ရဲတပ်ကြပ် ၁ ယောက် အပါအဝင် ၂ ယောက်သေဆုံးကာ ၁ ယောက် အပြင်းအထန် ဒဏ်ရာရရှိခဲ့တယ်လို့ မြိုင် ပကဖကနေ သိရပါတယ်။

မြိုင်မြို့နယ်၊ သရက်ကန် ပျူစောထီးရွာနဲ့ စိုတော ပျူစောထီးရွာကြားမှာ မေ ၂ ရက် မနက် ၆ နာရီလောက်က ပျူစောထီးတွေ ကူးသန်းသွားလာနေတယ်လို့ အတွင်းသတင်းရတာကြောင့် ဒေသကာကွယ်ရေးပူးပေါင်းတပ်ဖွဲ့တွေက မိုင်းထောင်တိုက်ခိုက်ခဲ့တာလို့ မြိုင်ပကဖ တပ်ရင်း-၁၊ တပ်ခွဲ-၂ ဂဠုန်တပ်ဖွဲ့ရဲ့ တိုက်ခိုက်ရေးတာဝန်ခံ ရဲဘော်ဇေယျာက ဒီဗွီဘီကို ပြောပါတယ်။

“သရက်ကန်ရွာမှာက စစ်ကောင်စီတပ်သားတွေ၊ ရဲတွေနဲ့ ပျူစောထီး အင်အား ၈၀ လောက် အထိုင်ချ တပ်စွဲထားတာဗျ။ သရက်ကန်နဲ့ စိုတောရွာက မီတာ ၆၀၀ လောက်ပဲ ကွာတာ။ အဲဒီ ၂ ရွာ ကူးသန်းသွားလာနေတုန်း သတင်းအတိအကျရလို့ တိုက်ခိုက်ခဲ့တာ။”

အဲဒီတိုက်ခိုက်မှုအတွင်းမှာ ရဲတပ်ကြပ်တယောက်နဲ့ ပျူစောထီးတယောက် သေဆုံးပြီး ပျူစောထီးတယောက်ကတော့ အပြင်းအထန် ဒဏ်ရာရရှိခဲ့တယ်လို့ ဆိုပါတယ်။

အဲဒီနောက် အလောင်းတွေဘေးမှာ ပတ်ပတ်လည်ဝိုင်းနေတဲ့ စစ်ကောင်စီတပ်သားတွေနဲ့ ပျူစောထီးတွေကိုလည်း ဒရုန်းနဲ့ အီနာဂါဗုံးသီး ၃ လုံး ဖြုတ်ချတိုက်ခိုက်ခဲ့ပြီး ထိခိုက်တဲ့ အခြေအနေကိုတော့ အတိအကျ မသိရသေးဘူးလို့ ပြောပါတယ်။

မြိုင်မြို့နယ်၊ ဖလံကိုင်းရေနံမြေမှာ ဧပြီ ၂၉ ရက် မနက်ပိုင်းက စစ်ကောင်စီစစ်ကြောင်း တိုက်ခိုက်ခံရပြီး တပ်ကြပ်ကြီး ၂ ယောက်သေဆုံးကာ ၅ ယောက် ဒဏ်ရာရရှိခဲ့တယ်လို့ မြိုင် ပကဖကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မန္တလေးတိုင်း၊ သပိတ်ကျင်းမြို့နယ် နီကယ်စက်ရုံကနေ တကောင်းဘက်ဆင်းလာတဲ့ စစ်ကောင်စီတပ်စစ်သားတွေ လိုက်ပါလာတဲ့ ကားကို ဧပြီ ၂၉ ရက်က မိုင်းနှစ်ကြိမ်ဆွဲ တိုက်ခိုက်ခဲ့တယ်လို့ တကောင်းပကဖ က သိရပါတယ်။ 

စစ်ကောင်စီတပ်စစ်သား ၅၀ ကျော်လိုက်ပါလာတဲ့ တွဲကားအနီတစ်စီးကို မြနန္ဒာအနီးမှာ နေ့လယ် ၁ နာရီဝန်းကျင်က ရှေ့ထွက်မိုင်း ၅ လုံး၊ ပဒေသာမိုင်း ၇ လုံးနဲ့ မိုင်းဆွဲတိုက်ခိုက်ခဲ့ပြီး မတောင်အကျော်နားမှာ မိုင်း ၂ လုံးနဲ့ ထပ်မံဖောက်ခွဲတိက်ခိုက်ခဲ့တယ်လို့ တကောင်းပကဖ သတင်းနှင့်ပြန်ကြားရေးတာဝန်ခံက ပြောပါတယ်။ 

"၁၅ ယောက်လောက်သေကြတယ်လို့ပြောနေတာ။ ကားကတော့ဘေးဖရိန်ပဲထိတာမို့ ကားကသွားလို့ရတယ်၊ တော်တော်တော့ စုတ်ပြတ်သွားတာ။ ကားပေါ်ကစစ်သားတွေက ပြန်ကိုမပစ်နိုင်ဘူး၊ ဆဲဆိုသွားတယ်။"

စစ်ကောင်စီတပ်စစ်သားတွေ လိုက်ပါလာတဲ့ကား မိုင်းနှစ်ကြိမ်ဆွဲတိုက်ခိုက်ခံရတာကြောင့် ၁၅ ယောက်လောက် သေဆုံးတယ်လို့ သိရပြီး ဒီဗွီဘီအနေနဲ့ အတည်မပြုနိုင်သေးပါဘူး။ 

သပိတ်ကျင်းမြို့နယ်အတွင်း သတ်မှတ်ချိန်ကျော်လွန်ပြီး ကားလမ်းအသုံးပြုတာ၊ မိုးကာအုပ်တာ၊ ၃ စီး ကားတန်းသွားလာတာ၊ ကားပေါ်မှာ ကုန်ပစ္စည်းတခုမှမပါဘဲလာတာ စတာတွေ မပြုလုပ်ဖို့  တကောင်း ပြည်သူ့ကာကွယ်ရေးတပ်ဖွဲ့ (ပကဖ) က သတိပေးထားပါတယ်။

မကွေးတိုင်း  ပေါက်မြို့နယ်၊ မန်ကျည်းဂုဏ်ကုန်းရွာအနောက်ဘက်‌ တောထဲမှာ တပ်ဖျောက်ထား တဲ့ စစ်ကောင်စီ စစ်ကြောင်းကို ဧပြီ ၂၈ ရက်မှာ Drone နဲ့ ဗုံးကြဲ တိုက်ခိုက်ခဲ့တယ်လို့ Anonymous Special Task Force -Pauk အဖွဲ့ ပြောရေးဆိုခွင့်ရှိသူတဦးက  ပြောပါတယ်။

ဧပြီ ၂၅ ရက်ကစပြီး မန်ကျည်းဂုဏ်ကုန်းရွာအနောက်ဘက် တောထဲမှာ တပ်ဖျောက်ထားတဲ့ စစ်ကောင်စီစစ်ကြောင်းက ဧပြီ ၂၈ မှာ မန်ကျည်းဂုဏ်ကုန်းရွာ မြောက်ဘက်တောထဲမှာ ပြန်လည် တွေ့ရှိခဲ့တဲ့အတွက်ဒရုန်းနဲ့ ဗုံးသီး ၃ လုံး ကြဲချတိုက်ခိုက်ခဲ့တာလို့ သိရပါတယ်။

Anonymous Special Task Force -Pauk က ပြောရေးဆိုခွင့်ရှိသူက "ဒီကောင်တွေထဲက ၁ ကောင် သေတယ်။ နောက်ထပ် ၁ ကောင်က ဒဏ်ရာ ပြင်းထန်ရတယ်" လို့ ပြောပါတယ်။

အဆိုပါ စစ်ကောင်စီစစ်ကြောင်းက ပေါက်မြို့နယ်ထဲကို စစ်ကြောင်းဝင်လာစဥ် ဖလံကိုင်းရွာက ရွာသား ၃ ဦးကို ဓားစာခံအဖြစ် ဖမ်းဆီးသွားခဲ့ပြီး ဖလံကိုင်းရွာ ဘုန်းကြီးကျောင်းမှာ တပ်စွဲ သွားခဲ့သေးတယ်လို့ ဆိုပါတယ်။

Anonymous Special Task Force -Pauk က ပြောရေးဆိုခွင့်ရှိသူက "ဒီကောင်တွေက ဖလံကိုင်းရွာကိုလည်း မွှေတယ်။ ရွာသား ၃ ဦးလည်း ဖမ်းသွားတယ်၊ အခုတော့ ၃ ဦးလုံး ပြန်လွတ်လာပြီ။ စစ်ကောင်စီ သေဆုံး ဒဏ်ရာရတာကိုလည်း သူတို့ပဲပြောပြခဲ့တာပါ" လို့ ဆိုပါတယ်။

လက်ရှိမှာတော့ စစ်ကောင်စီစစ်ကြောင်းဟာ ညောင်စင်ရွာရဲ့ အရှေ့တောင်ဘက်တောထဲမှာ တပ်စွဲနေတယ်လို့ သိရပြီး လှုပ်ရှားမှုကို မျက်ခြေမပြတ်စောင့်ကြည့်နေပြီး ကျေးရွာနေလူထုကို လည်း စစ်ကောင်စီစစ်ကြောင်း နားမသွားဖို့ မေတ္တာရပ်ခံထားပါတယ်။