ဧရာဝတီတိုင်း၊ သာပေါင်းမြို့နယ်က အမျိုးသားဒီမိုကရေစီအဖွဲ့ချုပ် (NLD) ပါတီရဲ့ လွှတ်တော်ကိုယ်စားလှယ် ၂ ဦး အပါအဝင် နိုင်ငံရေး တက်ကြွလှုပ်ရှားသူ ၆ ဦးကို မတ်လ ၂ ရက်နေ့မှာ စစ်ကောင်စီက ထောင်ဒဏ် ၂ နှစ်စီ ပြစ်ဒဏ်ချမှတ်လိုက်ပါတယ်။
ပြည်သူ့လွှတ်တော်ကိုယ်စားလှယ် ဦးသိန်းထွန်းနဲ့ တိုင်းလွှတ်တော်ကိုယ်စားလှယ် ကိုအောင်အောင်ဦးတို့ကို စစ်ကောင်စီက ပုသိမ်အကျဉ်းထောင် တရားရုံးမှာ ထောင် ၂ နှစ်စီ ချမှတ်ခဲ့တာလို့ နိုင်ငံရေးတက်ကြွလှုပ်ရှားသူတွေက ပြောပါတယ်။
နိုင်ငံရေး တက်ကြွလှုပ်ရှားသူတဦးက “ကိုယ်စားလှယ် ၂ ယောက်ပါတယ်၊ ၂ ယောက်လုံးက သာပေါင်းက ကိုယ်စားလှယ်တွေ။ ပြီးတော့ နိုင်ငံရေး တက်ကြွလှုပ်ရှားသူ ၄ ဦး ပါသေးတယ်၊ အဲ့ထဲမှာ အမျိုးသမီး ၁ ဦးပါတယ်။ အားလုံး ၂ နှစ်စီ ချမှတ်ခံရတာ” လို့ ပြောပါတယ်။
လွှတ်တော်ကိုယ်စားလှယ် ၂ ဦး အပါအဝင် နိုင်ငံရေး တက်ကြွလှုပ်ရှားသူ ၆ ဦးကို စစ်ကောင်စီက သဘာဝဘေးဆိုင်ရာ စီမံခန့်ခွဲမှု ဥပဒေ ပုဒ်မ ၂၅ နဲ့ တရားစွဲဆိုပြီး ထောင်ဒဏ် ၂ နှစ်စီ ချမှတ်ခဲ့တာလို့ ဆိုပါတယ်။
ပြီးခဲ့တဲ့နှစ် မတ်လ ၃၀ ရက်နေ့က လွှတ်တော်ကိုယ်စားလှယ် ၂ ဦး အပါအဝင် နိုင်ငံရေး တက်ကြွလှုပ်ရှားသူ ၆ ဦး ပုသိမ်မြို့မှာ လာရောက်တိမ်းရှောင်နေစဉ် စစ်ကောင်စီက ဝင်ရောက်ဖမ်းဆီးခဲ့ပြီး ၁ နှစ်ပြည့်ကာနီးမှာ ခုလို ပြစ်ဒဏ်အသီးသီး ချမှတ်လိုက်တာပါ။
ရှမ်းပြည်နယ် တောင်ပိုင်း ဆီဆိုင်မြို့ အောင်ချမ်းသာ ရပ်ကွက်အုပ်ချုပ်ရေးမှူး ဦးစံဝင်းမောင်ကို ဒီကနေ့ ထွေအုပ်က ဆီဆိုင်မြို့မရဲစခန်းမှာ သဘာဝဘေး အန္တာရယ်တားဆီးကာကွယ်ရေးဥပဒေနဲ့ အမှုဖွင့်လိုက်ပါတယ်။
ဦးစံဝင်းမေဟာင် ဟာဆီဆိုင်မြို့ စစ်အာဏာသိမ်းမှု ဆန့်ကျင်ရေးပြုလုပ်တာကို ဦးဆောင်တယ်လို့ ယူဆတဲ့အတွက် အမှုဖွင့်တာလို့ သိရပါတယ်။
ဦးစံဝင်းမောင်က “ကျနော့်ကို ထွေအုပ်က သဘာဝဘေးဥပဒ် အန္တရာယ် တားဆီးကာကွယ်ရေးဥပဒေပုဒ်မနဲ့ ရဲစခန်းမှာ အခုလေးတင်ဖွင့်လိုက်တယ်ဗျာ” လို့ ပြောပါတယ်။
မနေ့ညကတည်းက စစ်တပ်က ဦးစံဝင်းမောင်ကို ဖမ်းဆီးဖို့ သတင်းပေါက်ကြားပြီး တပ်က အရာရှိတစ်ဦးကို ဆက်သွယ်ပြီး လာဖမ်းဖို့စောင့်နေကြောင်း ပြောတဲ့အတွက် မဖမ်းဖြစ်ဘဲ ဒီကနေ့မှ အမှုဖွင့်ခံရတာပါ။
အမှုဖွင့်ခံရပေမယ် လာရောက်ဝန်းရံသူတွေက ပေးမဖမ်းတဲ့အတွက် လက်ရှိအချိန်ထိ လာရောက်ဖမ်းဆီးခြင်း မရှိသေးဘူးလို့ သိရပါတယ်။
ခွန်ရာဇာ
