မန္တလေး၊ အောင်မြေသာစံမြို့နယ်၊ ၈၆လမ်း (၂၁×၂၂) လမ်းကြားရှိ အောင်မြေသာစံမြို့နယ် သမဝါယမဦးစီးဌာနရှေ့ရှိ ကားတစီးပေါ်မှာ မေ ၁၀ ရက်က ပေါက်ကွဲမှုတခု ဖြစ်ပွားခဲ့တယ်လို့ မန္တလေးမြို့ခံတွေက ပြောပါတယ်။

မနက် ၁၁ နာရီခွဲလောက်က သမဝါယမရုံးရှေ့ ရပ်ထားတဲ့ အဖြူရောင် ဆူဇူကီး ဟိုက်ဂျက်ကား နောက်ခန်းကို ဆိုင်ကယ်တစီးပေါ်ကနေ လက်ပစ်ဗုံးနဲ့ ပစ်ပေါက်ခဲ့တာပါ။

မန္တလေးမြို့ခံတဦးက “၈၆ လမ်း သမဝါယမရုံး‌အရှေ့နားမှာ ဖြစ်တာ၊ ဦးစီးမှူးကားပေါ် ပေါက်ကွဲတာလို့ ပြောတယ်။ မြင်ရသလောက်တော့ ဗုံးစံတွေက ကားနောက်ဘီးနဲ့ အကာတော့ ထိထားတယ်။ ၁၁ နာရီခွဲ ကျော်ကျော်ကလေးပဲ၊ လမ်းတော့ ခဏပိတ်ထားကြတယ်” လို့ ပြောပါတယ်။

လက်ပစ်ဗုံးပေါက်ကွဲမှုကြောင့် ကားညာဘက်ခြမ်း၊ နောက်ဘီးတာယာနဲ့ လေကာမှန် ထိမှန်ပျက်စီးသွားပြီး အဆိုပါကားဟာ သမဝါယမဦးစီးမှူးရဲ့ကား ဖြစ်တယ်လို့ သိရပါတယ်။

စစ်ကောင်စီဝါဒဖြန့် တယ်လီဂရမ်ချန်နယ်တွေမှာ ဆူဇူကီးကားပေါ်ကို အမျိုးသား ၂ ဦးက တရုတ်ကြိုးဆွဲလက်ပစ်ဗုံးနဲ့ လာရောက်ပစ်ပေါက်တာလို့ ဖော်ပြထားပါတယ်။

ပေါက်ကွဲမှုဖြစ်ပွားပြီးချိန် အောင်မြေသာစံရဲစခန်းက လာရောက်စစ်ဆေးသွားတယ်လို့ သိရပြီး လက်ပစ်ဗုံး ပေါက်ကွဲမှုကြောင့် လူထိခိုက်သေဆုံးမှု မရှိဘူးလို့ သိရပါတယ်။

ရခိုင်ပြည်နယ်၊ ပေါက်တောမြို့နယ်၊ သမဝါယမဦးစီးမှူး ဒေါ်အုန်းတင်ဟာ မတ်လ ၂၄ ရက် ဒီနေ့မနက်ပိုင်းက ပေါက်တောမြို့၊ အလယ်ပိုင်းရပ်ကွက်ရှိ ဘဲသောက်သုံးရေကန်မှာ ရေနစ်သေဆုံးသွားတယ်လို့ ဒေသခံတွေထံက သိရပါတယ်။

ဒေါ်အုန်းတင် (၅၇ နှစ်)ရဲ့ အလောင်းကို မနက် ၆ နာရီ ၄၅ မိနစ်လောက်မှာ ကန်မှာ ရေလာခပ်ကြတဲ့သူတွေကတွေ့ခဲ့လို့ မီးသတ်ဌာနကို အကြောင်းကြားတဲ့အတွက် အလောင်းကို ပေါက်တောမြို့နယ် မီးသတ်တပ်ဖွဲ့ဝင်တွေက ဆယ်ယူခဲ့ကြောင်း ဒေသခံတဦးက ပြောပါတယ်။

“ရေကန်ထဲမှာ ရေနစ်သေဆုံးနေတဲ့ အလောင်းတလောင်းတွေ့တယ်ဆိုပြီး သွားကြည့်တာ။ မီးသတ်တပ်ဖွဲ့တွေ အလောင်းကို ဆယ်နေကြတယ်။ ရေနစ်သေဆုံးသွားတာက ပေါက်တောမြို့နယ် သမဝါယမဦးစီးမှူး ဒေါ်အုန်းတင်လို့ သိရတယ်ဗျ။”

သေဆုံးသူ ဒေါ်အုန်းတင်ဟာ အလယ်ပိုင်းရပ်ကွက်၊ မင်းစောမွန်လမ်းမှာ နေထိုင်ပြီး နေ့စဉ် မနက်အစောကြီး ရေခပ်ထွက်လေ့ရှိကြောင်း မျက်မြင်ဒေသခံတွေက ဆိုပါတယ်။

“သူက မနက်အစောကြီး အမြဲတမ်း အဲဒီကန်မှာ ရေခပ်လေ့ရှိတယ်ဗျ။ ရေခပ်ရင်းနဲ့ မတော်တဆ ရေနစ်တာမျိုး ဖြစ်နိုင်​တယ်” လို့ မျက်မြင်ဒေသခံက ပြောပါတယ်။

အလယ်ပိုင်းရပ်ကွက်ရှိတဲ့ သောက်သုံးရေကန်ဟာ အများပြည်သူ အသုံးပြုနေကြတဲ့ ရေကန်တခုလည်း ဖြစ်ပါတယ်။

အလောင်းမှာ ရိုးရိုးရေနစ်တာဖြစ်ပြီး ခန္ဓာကိုယ်ပေါ်မှာ ပြင်ပဒဏ်ရာ တစုံတရာ မတွေ့ရကြောင်း အလောင်းဆယ်ယူခဲ့ကြတဲ့ ပေါက်တောမီးသတ်တပ်ဖွဲ့ဝင်တွေထံက သိရပါတယ်။

လက်ရှိမှာ သေဆုံးသူ ဒေါ်အုန်းတင်ရဲ့အလောင်းကို ပေါက်တောဆေးရုံရှိ ရင်ခွဲရုံကို ပို့ဆောင်ထားတယ်လို့ ဒေသခံတွေက ပြောပါတယ်။

ဓါတ်ပုံ=ပေါက်တောမီးသတ်ဦးစီးဌာန