အီရတ်ပါလီမန်ဟာ အောက်တိုဘာ ၁၃ ရက်မှာ သမ္မတအဖြစ် ကာ့ဒ်နိုင်ငံရေးသမား အက်ဗ်ဒူ လာတစ်ဖ် ရာရှစ်ဒ်ကို ရွေးချယ်လိုက်ပြီး သမ္မတအသစ်ဟာ ချက်ချင်းပဲ မိုဟာမက်ဒ် ရှီယာ အယ်လ်-ဆူဒါနီကို ဝန်ကြီးချုပ်အဖြစ် ရွေးချယ်ခဲ့ပါတယ်။

ဒါဟာ ပြီးခဲ့တဲ့နှစ် အောက်တိုဘာလက ကျင်းပခဲ့တဲ့ အမျိုးသားရွေးကောက်ပွဲအပြီး တနှစ်တာ ရှေ့မတိုးနောက်မဆုတ် ဖြစ်နေတာတွေကို အဆုံးသတ်လိုက်တာပါ။

အစဉ်အဆက် ကာ့ဒ်လူမျိုးက နေရာယူထားတဲ့ သမ္မတရာထူးဟာ ကြီးကျယ်ခမ်းနားတဲ့ ရာထူးအဆင့်ပေမဲ့ ရာရှစ်ဒ်ကို မဲပေးမှုဟာ ရွေးကောက်ပွဲကတည်းက နိုင်ငံရေးသမားတွေ မလုပ်ဆောင်နိုင်ခဲ့တဲ့ အစိုးရသစ်တရပ်ဖွဲ့ဖို့ အဓိကခြေလှမ်း ဖြစ်ပါတယ်။

အသက် ၇၈ နှစ်အရွယ် ရာရှစ်ဒ်ဟာ ၂၀၀၃ ခုနှစ်မှ ၂၀၁၀ ခုနှစ်အထိ အီရတ် ရေအရင်းအမြစ်ဝန်ကြီးအဖြစ် တာဝန်ထမ်းဆောင်ခဲ့ပါတယ်။

ဗြိတိသျှပညာတတ် အင်ဂျင်နီယာ ရာရှစ်ဒ်ဟာ ဒုတိယသက်တမ်းအတွက် အရွေးခံနေတဲ့ သမ္မတဟောင်း ဘာဟမ် ဆာလိကို အနိုင်ရရှိခဲ့ပြီး အီရတ်သမ္မတသစ် ဖြစ်လာတာပါ။

သူဟာ အစိုးရဖွဲ့ဖို့ အီရန်-ဘက်မလိုက်အစုအဖွဲ့တွေရဲ့ မဟာမိတ်ဖြစ်တဲ့ ညှိနှိုင်းရေးမူဘောင်လို့ လူသိများတဲ့ အကြီးဆုံး ပါလီမန်အစုအဖွဲ့ကနေ နာမည်တင်သွင်းလာတဲ့ ဆူဒါနီကို ဖိတ်ခေါ်ခဲ့ပါတယ်။

အသက် ၅၂ နှစ်အရွယ် ဆူဒါနီဟာ အရင်က အီရတ်နိုင်ငံရဲ့ လူ့အခွင့်အရေးဝန်ကြီး ရာထူးအပြင် အလုပ်သမားနဲ့ လူမှုရေးဝန်ကြီးအဖြစ်လည်း တာဝန်ထမ်းဆောင်ခဲ့ဖူးပါတယ်။

ဆူဒါနီဟာ အခုအခါ အစိုးရအဖွဲ့ ဖွဲ့စည်းဖို့ ရက်ပေါင်း ၃၀ အချိန်ရပြီးတော့ သူ့အစိုးရအဖွဲ့ကို လွှတ်တော်ကိုတင်ပြပြီး အတည်ပြုချက် ရယူရမှာပါ။

အခုနှစ်အတွင်း စတုတ္ထမြောက် သမ္မတအဖြစ် ရွေးချယ်တင်မြှောက်ဖို့ မဲခွဲဆုံးဖြတ်မှုဟာ အောက်တိုဘာ ၁၃ ရက်က အီရတ်မြို့တော် Green Zone တဝိုက်မှာ ဒုံးကျည် ၉ စင်း ကျရောက်လာခဲ့ပြီးနောက် သိပ်မကြာခင်မှာပဲ ကြိုးပမ်းခဲ့တာဖြစ်ပါတယ်။

တိုက်ခိုက်မှုအတွင်း လုံခြုံရေးတပ်ဖွဲ့ဝင်တွေ အပါအဝင် အနည်းဆုံး လူ ၁၀ ယောက် ဒဏ်ရာရခဲ့ကြောင်း လုံခြုံရေးနဲ့ ဆေးဘက်ဆိုင်ရာ သတင်းရင်းမြစ်တွေအရ သိရပါတယ်။

သီရိလင်္ကာနိုင်ငံရဲ့သမ္မတသစ်အဖြစ် ရာနေးလ် ဝစ်ကရာမက်ဆင်းဂ်ဟာ ဇူလိုင် ၂၁ ရက် ဒီကနေ့ နိုင်ငံတော် တရားသူကြီးချုပ်ရှေ့မှာ ကျမ်းသစ္စာ ကျိန်ဆိုခဲ့ပါတယ်။

ဇူလိုင် ၂၀ ရက်က သီရိလင်္ကာလွှတ်တော်တွင်း မဲပေးရွေးချယ်ရာမှာ ပါလီမန်အမတ် ၂၂၅ ဦး ထဲက ၁၃၄ မဲနဲ့  ဝစ်ကရာမက်ဆင်းဂ်က အနိုင်ရခဲ့ပြီးနောက်မှာ နိုင်ငံကနေ ထွက်ပြေးသွားတဲ့ ဂိုတာဘာယာ ရာဂျာပက်ဆာနေရာမှာ ဆက်ခံသူ ဖြစ်လာပါတယ်။ 

ရွေးကောက်ခံ သမ္မတသစ်ကို သတင်းထောက်တွေက ရာဂျာပက်ဆာနဲ့မိတ်ဆွေတွေလားလို့ မေးမြန်းခဲ့တဲ့အပေါ် သူဟာ ဩဇာညောင်းတဲ့ ရာဂျာပက်ဆာ မိသားစုကို အမြဲတမ်း ဆန့်ကျင်ခဲ့ကြောင်းနဲ့ ပါတီမတူတဲ့ သမ္မတဟောင်းနဲ့ အလုပ်အတူလုပ်ခဲ့တိုင်း မိတ်ဆွေလို့ မဆိုလိုကြောင်း သတင်းထောက်တွေကို တုံ့ပြန်ပြောကြားသွားပါတယ်။ 

ဝန်ကြီးချုပ်သက်တမ်း ၆ ကြိမ်ရှိခဲ့ဖူးတဲ့ ဝါရင့်နိုင်ငံရေးသမားကြီး ဝစ်ကရာ မက်ဆင်းဂ်က သူဟာ ပြည်သူတွေရဲ့မိတ်ဆွေဖြစ်ပြီး ဆယ်စုနှစ်တွေ ချီနေတဲ့ တိုင်းပြည်ရဲ့ အဆိုးရွားဆုံး စီးပွားရေးအကျပ်အတည်းအတွက် ထွက်ပေါက်ရဖို့ နည်းလမ်း ရှာမှာဖြစ်ကြောင်း သတင်းထောက်တွေကို ပြောကြားခဲ့ပါတယ်။

လူဦးရေ ၂၂ သန်းရှိတဲ့ နိုင်ငံဟာ ဆိုးရွားတဲ့ ဘဏ္ဍာရေးအကျပ်အတည်းကြောင့် ပြိုလဲခဲ့ရပြီး လောင်စာဆီ၊ စားနပ်ရိက္ခာနဲ့ ဆေးဝါးတွေ အပါအဝင် မရှိမဖြစ်လိုအပ်တဲ့ပစ္စည်းတွေ ပြတ်လပ်သွားတဲ့အထိ ဖြစ်စေပြီး နိုင်ငံခြားငွေ ရှားပါးမှုလည်း ဖြစ်ခဲ့ရပါတယ်။

Photo- Reuters