ထောင်ဒဏ် ၂ နှစ် အမိန့်ချမှတ်ခံထားရတဲ့ မွန်ပြည်နယ် ဝန်ကြီးချုပ် ဒေါက်တာအေးဇံကို စစ်ကောင်စီက စွဲဆိုထားတဲ့ အဂတိအမှု ၆ မှုအတွက် ဖေဖော်ဝါရီ ၁၀ ရက်နေ့မှာ ရုံးထုတ်စစ်ဆေးခဲ့တယ်လို့ တရားရုံးနဲ့ နီးစပ်သူတွေက DVB ကို ပြောပါတယ်။
ဝန်ကြီးချုပ် ဒေါက်တာအေးဇံကိုတော့ ဖမ်းဆီးထိန်းသိမ်းထားတဲ့ ကျိုက်မရောဗဟိုအကျဉ်းထောင်ရှိ အထူးတရားရုံးမှာ ရုံးထုတ်စစ်ဆေးခဲ့တာပါ။
ရုံးချိန်းမှာတော့ ဝန်ကြီးချုပ် ဒေါက်တာအေးဇံဘက်က တင်သွင်းထာတဲ့ တရားခံပြ သက်သေ မွန်ပြည်နယ် သယံဇာတနဲ့ သဘာဝပတ်ဝန်းကျင်ထိန်းသိမ်းရေး ဝန်ကြီး ဒေါက်တာမင်းကြည်ဝင်းကို စစ်ဆေးမေးမြန်းခဲ့တာပါ။
ဝန်ကြီး ဒေါက်တာမင်းကြည်ဝင်းကိုတော့ စစ်ကောင်စီက ဖေဖော်ဝါရီ ၁ ရက်နေ့မှာ ဖမ်းဆီးထိန်းသိမ်းပြီးနောက် ၄ ရက်အကြာမှာ ပြန်လွှတ်ပေးထားတာပါ။
လက်ရှိမှာတော့ ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ ရွေးကောက်ပွဲမှာ မလျော်သြဇာသုံးမှု အမှု ၃ မှု၊ အဂတိမှု အမှု ၉ မှု၊ စုစုပေါင်း အမှု ၁၂ မှုနဲ့ တရားရင်ဆိုင်နေရတာပါ။
ဝန်ကြီးချုပ် ဒေါက်တာအေးဇံကို ပြီးခဲ့တဲ့ ဒီဇင်ဘာ ၁၇ ရက်နေ့မှာ စစ်ကောင်စီက နိုင်ငံ့ဝန်ထမ်းတွေ CDM လှုပ်ရှားမှုမှာ ပါဝင်ပေးဖို့ တိုက်တွန်းခဲ့တယ်ဆိုတဲ့ စွပ်စွဲချက်နဲ့ ရာဇသတ်ကြီး ဥပဒေ ပုဒ်မ ၅၀၅(ခ) ဖြင့် ထောင်ဒဏ် ၂ နှစ် အမိန့်ချမှတ်ထားတာပါ။
နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)နဲ့ တရားစွဲထားတဲ့ ကချင်ပြည်နယ်က သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီး ဦးဒါရှီလဆိုင်းကို မတ်လ ၅ ရက်နေ့ နေ့လယ်က ဒုတိယအကြိမ် video conferencing နဲ့ ရုံးထုတ်ခဲ့ပြီး အာမခံမရရှိခဲ့ဘူးလို့ တရားလွှတ်တော်ရှေ့နေ ဦးသက်ထွန်းဦးက ပြောပါတယ်။
“ဒီနေ့မှာ video conferencing နဲ့ အမှုကို ဆောင်ရွက်တာပေါ့။ ဘယ်နေ့မှာ အမှုကို ဘယ်လိုစစ်သွားမယ်ဆိုပြီး ရုံးချိန်းသတ်မှတ်တာပါ။ အသက် ၁၆ နှစ်အောက် မဟုတ်ဘူး၊ အမျိုးသမီး မဟုတ်ဘူး၊ ဖျားနာနေတဲ့သူ မဟုတ်ဘူး၊ ချည့်နဲ့နေတဲ့သူ မဟုတ်တဲ့အတွက် ဦးဒါရှီလဆိုင်းကို အာမခံမပေးနိုင်ဘူးဆိုပြီး အမိန့်ချခဲ့တယ်။”
ရွေးကောက်ခံအစိုးရ တက်လာတဲ့အထိ အစိုးရရုံးတွေကို ရုံးပိတ်ရက် သတ်မှတ်တယ်လို့ ကချင်ပြည်နယ် ဝန်ကြီးချုပ်ကိုယ်စား လက်မှတ်ရေးထိုး ထုတ်ပြန်ခဲ့တဲ့အပေါ်မှာ တရားစွဲခံရတာပါလို့ ဦးဒါရှီလဆိုင်းထံကနေ သိရပါတယ်။
ဦးဒါရှီလဆိုင်းကို မြစ်ကြီးနား ဒုမြို့နယ်အုပ်ချုပ်ရေးမှူး ဦးမင်းရန်နိုင်က တရားလိုပြုလုပ် တရားစွဲထားတာဖြစ်ပြီး မတ်လ ၉၊ ၁၆၊ ၂၃ နဲ့ ၃၀ ရက်နေ့တွေမှာ ထပ်မံရုံးထုတ်စစ်ဆေးသွားမယ်လို့ သိရပါတယ်။
