ဧရာဝတီတိုင်း၊ သာပေါင်းမြို့နယ်မှာ နိုဝင်ဘာ ၂၄ ရက်က အရက်အတူသောက်ရင်း ဓားထိုးခံရလို့ အမျိုးသား တယောက်  သေဆုံးခဲ့တယ်လို့ ရဲတပ်ဖွဲ့အသိုင်းအဝိုင်းက သိရပါတယ်။

ဆီဆုံကျေးရွာအုပ်စု၊ အောက်ဒညင်းကုန်းကျေးရွာမှာ နေထိုင်တဲ့ ဦးအောင်ကြိုင်ဟာ တရွာတည်းနေသူတွေနဲ့ အရက်အတူသောက်စားရင်း စကားများရာကနေ သက်ခိုင်စိုးက ဓားနဲ့ထိုးခဲ့လို့ သေဆုံးခဲ့တာလို့ ရဲမှတ်တမ်းတွေအရ သိရပါတယ်။

ရဲတပ်ဖွဲ့ဝင်တဦးက “ဖြစ်တာက ရွာထဲကအိမ်မှာ၊ သူက သွားရောက်ရင်း ဓားထိုးခံရတာ၊ သောက်စားရင်း မူးလာတော့ စကားများတယ်။ အဲ့မှာ ဒေါသစိတ်မထိန်းနိုင်တော့ ဓားနဲ့ထိုးလိုက်တဲ့ပုံစံပါ” လို့ ပြောပါတယ်။

တရွာတည်းနေ အသက် ၃၂ နှစ်အရွယ် သက်ခိုင်စိုးရဲ့ ဓားနဲ့ထိုးခံရပြီး သေဆုံးခဲ့တဲ့ ဦးအောင်ကြိုင်ကို သာပေါင်းပြည်သူ့ဆေးရုံကြီး ပို့ဆောင်ထားပါတယ်။

ဦးအောင်ကြိုင် သေဆုံးအောင် ဓားနဲ့ထိုးခဲ့တဲ့ သက်ခိုင်စိုးကို သာပေါင်းမြို့မရဲစခန်းမှာ (ပ) ၈၉/၂၀၂၂၊ ရာဇသတ်ကြီးပုဒ်မ ၃၀၂ နဲ့ အမှုဖွင့်စစ်ဆေးနေပါတယ်။

ဧရာဝတီတိုင်း၊ သာပေါင်းမြို့နယ်၊ ကျောက်ဖြာကျေးရွာက ဒေသခံပြည်သူတွေ ညအိပ်ခရီးမသွားဖို့  စစ်ကောင်စီတပ်သားတွေက တားမြစ်ထားတယ်လို့ သိရပါတယ်။ 

ကျွန်းကြီးကုန်းကျေးရွာအုပ်စုရှိ ကျောက်ဖြာကျေးရွာကို စစ်ကောင်စီတပ်သားတွေက ဒီဇင်ဘာ ဒုတိယပတ်လောက်မှာ ဝင်ရောက်စီးနင်းခဲ့ပြီးနောက်ပိုင်း ခုလို ညအိပ်ခရီးမထွက်ဖို့ တားမြစ်ခဲ့တာ လို့ ဒေသခံတွေက ပြောပါတယ်။ 

“လူငယ်တစ်ယောက်ကို အရင် ဝင်ဖမ်းတာ အင်အားအများကြီးနဲ့ ရွာထဲဝင်ဖမ်းတာ အဲ့လိုဖြစ်ပြီး တပတ်လောက်ကြာမှအုပ်ချုပ်ရေးမှူးက လိုက်ပြောတာ ညအိပ်ခရီးမသွားဖို့၊ မဖြစ်မနေသွားမယ်ဆို ခွင့်ပြုချက် ယူပြီးသွားရမယ်ဆိုပြီးတော့ လိုက်အော်တာ” လို့ ဒေသခံတဦးက ပြောပါတယ်။

ဒေသခံပြည်သူတွေ ညအိပ်ခရီးမသွားဖို့ တားမြစ်တာတွေလိုက်အော်ပြီး နောက်တစ်နေ့ ကျေးရွာဝင်လမ်းမှာ စစ်ကောင်စီတပ်သားတွေ အရပ်ဝတ်တွေနဲ့ ကင်းပုန်းဝတ်တာ၊ စစ်ဆေးတာတွေ ပြုလုပ်လာတယ်လို့ ဆိုပါတယ်။

စစ်ကောင်စီက လူငယ်တဦးက ဖမ်းဆီးပြီး ညအိပ်ခရီးမသွားဖို့ တားမြစ်ထားတဲ့ ကျောက်ဖြာကျေးရွာမှာ အိမ်ခြေ ၅၀ ကျော်ရှိပြီး လက်ရှိအချိန်မှာ စားဝတ်နေရေး အခက်ကြုံနေတယ်လို့ သိရပါတယ်။