ကချင်ပြည်နယ်၊ မြစ်ကြီးနားမြို့နယ် နောင်နန်းကျေးရွာအုပ်စု၊ လမြန်ကျေးရွာမှာ  မေ ၈ ရက် နေ့လယ်ပိုင်းက  နေအိမ်မှာ ရေတွင်းတူးနေစဉ် တွင်းထဲကို ပြုတ်ကျပြီး သားအဖနှစ်ဦး သေဆုံးခဲ့တယ်လို့ ဒေသခံတွေက ပြောပါတယ်။        

သုံးလက်စရေတွင်းကို ပြန်တူးဖော်ရာက သားဖြစ်သူ ရေတွင်းထဲ ပြုတ်ကျစဉ် ဖခင်ဖြစ်သူက ဆင်းဆယ်ရာမှာ တွင်းထဲ ပြုတ်ကျပြီး  သားအဖ နှစ်ဦးလုံး အောင်ဆီဂျင်ပြတ် သေဆုံး သွားတာလို့  သိရပါတယ်။           

ဒေသခံ တဦးက "ရေတွင်းက အိမ်သုံးရေတွင်း။ ရေခန်းလို့ သားအဖနှစ်ဦး တူးနေတာ။ သားက တွင်းထဲ ကြိုးနဲ့ အရင်ဆင်းတယ်။ ကြိုးပြတ်သွားပြီး ရေတွင်းထဲကျတဲ့ သားကို ဆင်းကယ်ရာကနေ ဖခင်ပါ တွင်းထဲပြုတ်ကျပြီး နှစ်ယောက်စလုံး အောက်ဆီဂျင်ပြတ် သေတာ" လို့ ပြောပါတယ်။             သားအဖနှစ်ဦး ရေတွင်းထဲ  ပြုတ်ကျစဉ် မိသားစုနဲ့ အနီးနားဝန်းကျင်က လူမှုကူညီရေးအသင်း တွေကို ဖုန်းဆက်အကြောင်းကြားခဲ့ပြီး လူမှုကူညီရေးအသင်းအဖွဲ့တွေ လာရောက် ကယ်ဆယ်ချိန်မှာ သားအဖ နှစ်ဦးစလုံး သေဆုံးနေကြတာပါ။                

ကူညီကယ်ဆယ်ရေးလုပ်ခဲ့တဲ့ အမျိုးသား တဦးက "လူမှုကယ်ဆယ်ရေးအဖွဲ့က ရောက်လာချိန် သားအဖနှစ်ဦး အသက် မရှိတော့ဘူး။ ကယ်ဆယ်ရေးအဖွဲ့က ပတ်ဝန်းကျင်က သူတွေနဲ့ အလောင်း သယ်ထုတ်ခဲ့ရတယ်”လို့ ပြောပါတယ်။              

မြစ်ကြီးနားမြို့နယ် နောင်နန်းကျေးရွာအုပ်စု၊ လမြန်ကျေးရွာဟာ  ၂၀၁၄ သန်းခေါင်စာရင်းအရ  ကျား ၃၆၆၉ ဦး၊ မ ၄၂၆၁ဦး  နေထိုင်တဲ့ ကျေးရွာတစ်ခု ဖြစ်ပါတယ်။

မကွေးတိုင်း၊ မကွေးမြို့၊ ဆူးကောက်စမ်းကျေးရွာ မြောက်ဘက်လယ်ကွင်းမှာ ဧပြီ ၂၂ ရက် ညနေ ၅ နာရီခွဲလောက်က မိုးကြိုး ပစ်ခံရလို့ သားအဖနှစ်ဦး နေရာတင် ပွဲချင်းပြီး သေဆုံးခဲ့တယ်လို့ နယ်ခံပရဟိတ အသင်းနဲ့ ရွာခံတွေထံက သိရပါတယ်။ 

ရောင်စုံမေတ္တာလူမှူကူညီရေးအသင်းတာဝန်ရှိသူက "ည ၁၀ နာရီလောက်မှ ဖုန်းဆက် အကူအညီ တောင်းတာ။ မကွေးမြို့နဲ့ဆို ဆယ်မိုင်လောက်ဝေးတယ်။ သေဆုံးသူအမည်တော့ မသိရသေးဘူ” လို့ ဆိုပါတယ်။

မိုးကြိုးပစ်ခံရလို့ အဖေဖြစ်သူ ၅၈ နှစ်၊ သားဖြစ်သူ ၃၅ နှစ်နဲ့အတူပါလာသော ခွေးတကောင်လည်း လယ်ကွင်းအတွင် သေဆုံးခဲ့ကာ ရုပ်အလောင်းတွေကို မကွေးမြို့ ပြည်သူ့ဆေးရုံကြီး ရင်ခွဲရုံသို့ပို့ဆောင်ပေးခဲ့တယ်လို့ ဆိုပါတယ်။

"ဖြစ်တာက ညနေ ၅ နာရီကျော်လောက်ထဲက။ ရပ်ရွာလူကြီး အကြောင်းကြားပြီး ရဲတွေ စောင့်နေရတာနဲ့ကြာသွားတာ။ သူတို့ စစ်ချက်ယူပြီးမှ ပရဟိတအသင်းတွေကို အကြောင်းကြားပြီး ဆေးရုံပို့တော့ ညည့်နက်ချိန်ရောက်သွားတာ”လို့ ရွာခံ တဦးက ပြောပါတယ်။

မြန်မာနိုင်ငံတဝန်း အပူချိန်မြင့်တက်နေပြီး အချိန်အခါမဟုတ် မိုးကြီးခြင်း လေပြင်းတိုက်ခိုက်ခြင်း မိုးကြိုးပစ်တာတွေ ဖြစ်ပေါ်ခဲ့ကာ ဧပြီ ၂၁ရက် ညနေပိုင်းက နေပြည်တော် လယ်ဝေးမြို့နယ် ကျေးရွာ ၃ ရွာမှာ လေပြင်းတိုက်ခံရပြီး ၆ ဦး သေဆုံးခဲ့ပါတယ်။

Photo ရောင်စုံ မေတ္တာ လူမှူကူညီရေးအသင်း