ရန်ကုန်မြို့၊ မင်္ဂလာဒုံမြို့နယ်၊ ကုန်းတလဘောင်ကျေးရွာမှာ မြို့နယ် NLD ဗဟိုအလုပ်အမှုဆောင် ဦးဝင်းနိုင်ရဲ့ ညီမနဲ့ သမီးဖြစ်သူတို့ ဒီနေ့မနက်က သေနတ်နဲ့အနီးကပ်ပစ်သတ်ခံရတယ်လို့ ဒေသခံတွေက ပြောပါတယ်။

ဒီနေ့မနက် မနက် ၉ နာရီလောက်မှာ လူသုံးဦးက ကားနဲ့ရောက်လာပြီး ကုန်းတလဘောင်၊ နွယ်နီ စျေးလမ်းအနီးရှိ ဦးဝင်းနိုင်ရဲ့ ညီမစျေးဆိုင်အတွင်း ဝင်ရောက်ပစ်ခတ်ခဲ့တာလို့ ဆိုပါတယ်။

ဒေသခံတဦးက "ပထမအနုကြမ်းစီးတာလို့ထင်တာ၊ အခုသိရသလောက်က အကြောင်းမဲ့ကိုလာပြီး ပစ်သတ်တဲ့သဘောပဲ။ ကလေးမလေးက နေရာတင်ဆုံးတယ်။ သူ့အမေကတော့ အရေးပေါ်၊ အခြေအနေမကောင်းဘူး။ ဆုံးပြီလို့လည်းကြားတယ်" လို့ ပြောပါတယ်။

ပစ်ခတ်ခံရတဲ့သားအမိမှာ မိခင်ဖြစ်သူက အသက် ၄၀ အရွယ်ဖြစ်ပြီး သမီးဖြစ်သူကတော့ ၈ နှစ်သာ ရှိသေးတယ်လို့ သိရပါတယ်။

အခုလို သေနတ်နဲ့ ပစ်သတ်သွားသူတွေဟာ ပျူစောထီးတွေဆိုပြီး ဒေသခံတွေက ပြောဆိုနေပေမယ့် ဒီဗွီဘီက သီးခြားအတည်ပြုမရသေးပါဘူး။

ပစ်ခတ်မှုဖြစ်ပြီးနောက်မှာ စစ်ကောင်စီစစ်သားနဲ့ရဲတွေ ခဏတာ လာရောက်စစ်ဆေးပြီး ပြန်သွားခဲ့တယ်လို့လည်း အဲဒီရပ်ကွက်မှာနေထိုင်သူတဦးက ပြောပါတယ်။

မြို့နယ် NLD ဗဟိုအလုပ်အမူဆောင် ဦးဝင်းနိုင်ဟာ စစ်အာဏာသိမ်းမူပြီးကတည်း ရှောင်တိမ်းနေရသူတဦး ဖြစ်တယ်လို့ ဆိုပါတယ်။

အဲဒီကုန်းတလဘောင်ကျေးရွာမှာ ပြီးခဲ့တဲ့နှစ်က စစ်ကောင်စီခန့်အုပ်ချုပ်ရေးမှူးနဲ့ ရာအိမ်မှူးတဦး သေနတ်နဲ့ပစ်သတ်ခံရတဲ့ဖြစ်စဥ်ရှိခဲ့ပါတယ်။ 

ရခိုင်ပြည်နယ် ပေါက်တောမြို့နယ် ညောင်ပင်ချိုင်ကျေးရွာမှာ ဧပြီ ၂၈ ရက်နေ့ညနေက ဓာတ်ဆီဘူး၌ ဆီဖြည့်နေစဉ် မီးလောင်မှုဖြစ်ပွားပြီး သားမိ ၂ ဦး သေဆုံးခဲ့တယ်လို့ ကျေးရွာသားတွေက ပြောပါတယ်။

မီးလောင်မှုကြောင့် သေဆုံးသွားသူများမှာ ဒေါ်သန်းနွဲ့ (၅၃နှစ်) နဲ့ သမီးဖြစ်သူ မနန္ဒလင်း (၂၂နှစ်) တို့ဖြစ်ကြပါတယ်။

အခုသေဆုံးမှုဖြစ်ပွားခဲ့တဲ့ နေအိမ်မှာ ကုန်စုံဆိုင်ရောင်းကြပြီး ဓာတ်ဆီဂါလန်ဘူးမှ ၁လီတာရေသန့်ပုလင်းကို ဖြည့်နေစဉ်မှာ မီးဖိုက မီးကူးပြီး လောင်ကျွမ်းသွားတာလို့ ညောင်ပင်ချိုင်ကျွေးရွာသားတဦးက ပြောပါတယ်။

"သူတို့ရဲ့ အိမ်မှာက ကုန်စုံဆိုင်ရောင်းတယ်။ မနေ့ညနေ့ပိုင်း ၇ နာရီလောက်မှာ သမီးဖြစ်သူက ထမင်းချက်နေတာလို့ သိရတယ်။ အမေဖြစ်သူက ဂါလန်ဘူးကြီးက ဓာတ်ဆီတွေကို ၁ လီတာရေသန့်ပုလင်းတွေမှာ ဖြည့်နေတာ။ မီးဖို့နဲ့လည်း သိပ်နီးတာမဟုတ်ဘူး။ မနေ့ကတော့ လေကပြင်းတော့ မီးက လေအဟုန်းနဲ့ ကူစက်သွားနိုင်တာဖြစ်ဖို့များတယ်။ အဲဒီမှာ ဓာတ်ဆီးဘူးကြီးက မီးလောင်ပြီး ထပေါက်တော့ အဲဒီက တဆင့်မီးလောင်ကျွမ်းမှုဖြစ်သွားတာဖြစ်တယ်။ အစတော့ သမီးဖြစ်သူက ကြောက်ပြီး ထွက်ပြေးလာတာ အပြင်ရောက်တော့ အမေဖြစ်သူ ကျန်ခဲ့တာသိတော့ သွားကယ်တာမှာ မီးထဲက ထွက်မရောက်နိုင်တော့ဘဲ သေဆုံးသွားကြတာဖြစ်တယ်။" 

အဲဒီမီးလောင်မှုကို ရွာသားတွေက ဝိုင်းဝန်ငြှိမ်းသတ်ခဲ့တာကြောင့် တခြားအိမ်တွေကို ကူးစက်မှု မရှိခဲ့ဘဲ ည ၈ နာရီလောက်မှာ မီးငြိမ်သွားတယ်လို့ ရွာသားတွေကပြောပါတယ်။

အခုသေဆုံးသွားတဲ့ သားအမိ ၂ ဦးရဲ့ ရုပ်အလောင်းတွေကို ဧပြီ ၂၉ ရက်နေ့မှာ မြှုပ်နှံသွားမယ်လို့ သိရပါတယ်။

မနန္ဒလင်းဟာ စစ်တွေ တက္ကသိုလ်မှာ သမိုင်းမေဂျာအထူးပြုနဲ့ ပညာသင်ကြားနေတာဖြစ်ပြီး နွေရာသီကျောင်းပိတ်ထားတာကြောင့် အိမ်ကိုရောက်နေတာလို့ ရွာသားတွေက ပြောပါတယ်။

မီးလောင်မှုဖြစ်သွားတဲ့ အိမ်မှာ သွပ်မိုး၊ ဝါးထရံကာ မြေထိုင်အိမ်တစ်အိမ်နဲ့ ကုန်စုံဆိုင်တစ်ဆိုင်ဆုံးရှုံးခဲ့ပြီး ဆုံးရှုံးမှုတန်ဖိုး သိန်း ၂၀၀ နီးပါးခန့်ရှိနိုင်တယ်လို့ သိရပါတယ်။

ရခိုင်ပြည်နယ်မှာ ၂၀၂၃ ခုနှစ် ဇန်နဝါရီ ၁ ရက်နေ့မှ မတ် ၃၁ ရက်နေ့အထိ မီးလောင်မှု ၃၄ ကြိမ် ဖြစ်ပွားခဲ့ပြီး နေအိမ် ၄၀ ကျော်နဲ့ ဆိုင်ခန်းတချို့ပျက်စီးခဲ့ကာ ဘုန်းကြီး ၁ ပါးအပါဝင် လူ ၄ ဦး သေဆုံးခဲ့တယ်လို့ ရခိုင်ပြည်နယ် မီးသတ်ဦးစီးဌာနရဲ့ စာရင်းတွေအရ သိရပါတယ်။

ရခိုင်ပြည်နယ်မှာ ၂၀၂၃ ခုနှစ်မှာ မီးလောင်မှု ဖြစ်ပွားမှုကြောင့် အခုသေဆုံးသူ ၂ ဦးအပါဝင် သေဆုံးသူ ၆ ဦးအထိရှိလာပြီ ဖြစ်ပါတယ်။

နွေရာသီမှာ ရာသီဥတုပူပြင်းလာတာကြောင့် မီးအန္တရာယ်အထူး သတိပြုကြဖို့ ပြည်နယ်မီးသတ်ဦးစီဌာနက ဆော်သြော်တာတွေရှိနေပါတယ်။