ချင်းပြည်နယ် ဖလမ်းမြို့နယ်မှာ ဧပြီလ ၁၀ ရက်နေ့ မနက်ပိုင်းမှာ စစ်ကောင်စီတပ်စခန်း ၁ခု သိမ်းပိုက်ခံရပြီးနောက် လေကြောင်းတိုက်ခိုက်မှုတွေပြုလုပ်ခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ဖလမ်းမြို့နယ်က စစ်ကောင်စီရဲ့ ဗာရ်းစခန်းကို ဧပြီ ၁၀ ရက် မနက် ၅ နာရီလောက်ကနေ စတင်တိုက်ခိုက်ခဲ့ပြီး အချိန် ၁ နာရီခွဲလောက်အကြာမှာ စခန်းတခုလုံးကို သိမ်းပိုက်မီးရှို့ဖျက်ဆီးနိုင်ခဲ့တယ်လို့ ချင်းအမျိုးသားအဖွဲ့ချုပ် CNDF/CNO ရဲ့ ပြောရေးဆိုခွင့်ရှိသူ ကိုကျူံးငိုင်းက ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၁၆ ယောက်လောက်သေဆုံးပြီး ၁၁ ယောက်လောက်ကို အရှင်ဖမ်းမိထားကာ စခန်းမှာရှိတဲ့ လက်နက် ၁၉ လက်လောက်နဲ့ ခဲယမ်းတွေကို သိမ်းဆည်းနိုင်ခဲ့တယ်လို့ ဆိုပါတယ်။

“စခန်းသိမ်းပြီး နာရီဝက်လောက်အကြာမှာ ဂျက်ဖိုက်တာ ၁ စီးနဲ့ ၃ ကြိမ်လာတယ်။ ဗုံး ၆ ကြိမ်ချသွားတယ်။ ကျနော်တို့ဘက်က ရဲဘော်တယောက်ကတော့ လက်ပစ်ဗုံးဖြုတ်လိုက်တဲ့အချိန်မှာ ကိုယ့်ကိုယ်ကိုယ် မတော်တဆဖြစ်ပြီးတော့ ကျဆုံးခဲ့တယ်” လို့ ကိုကျူံးငိုင်းက ပြောပါတယ်။

ဒါ့အပြင် တိုက်ပွဲနဲ့ သက်ဆိုင်ခြင်းမရှိတဲ့ ဝေဘူလမြို့ကို မနက် ၁၁ နာရီလောက်က အကြောင်းမဲ့လေကြောင်းတိုက်ခိုက်ခဲ့တာကြောင့် ပြည်သူ ၉ ယောက်သေဆုံးကာ ၅ ယောက်လောက် ဒဏ်ရာရရှိခဲ့တယ်လို့ ဆိုပါတယ်။

မကွေးတိုင်း မင်းတုန်းမြို့နယ်မှာလည်း ဧပြီ ၁၀ ရက်နေ့ မနက်ပိုင်းက ကျောက်တိုင်ရဲစခန်း အနီးကပ်တိုက်ခိုက်ခံရပြီး ၂ ယောက်သေဆုံးကာ ၄ ယောက် အပြင်းထန် ဒဏ်ရာရရှိခဲ့တယ်လို့ Eagle Force ရဲ့ ပြန်ကြားရေးတာဝန်ခံ ကိုမြတ်က ပြောပါတယ်။ 

“ကျောက်တိုင်ရဲစခန်းမှာက စခ၊ ရခ ပူးပေါင်း ၁၅ ယောက်လောက်ရှိမယ်။ အဲဒါကို သရက်ခရိုင်တပ်ရင်း (၄) Eagle Force၊ ကျောင်းသားလက်ရုံးတပ်တော် SAF၊ လွတ်မြောက်ရေးတပ်တော် W.O.L.F တို့ ပူးပေါင်းပြီး အနီးကပ် ချည်းကပ်ပြီး ကျနော်တို့ဘက်က စတင် ပစ်ခတ်ခဲ့တာ။ သူတို့ဘက်ကလည်း ပြန်လည်ပစ်ခတ်တာတွေရှိပြီး လမ်းတဖက်ကနေ ပစ်ခတ်ရတာဆိုတော့ ခရီးသွားပြည်သူတွေရဲ့ ကားတချို့က တိုက်ပွဲ နားကပ်လာလို့ ပစ်ခတ်တဲ့ အရှိန်လျော့သွားပြီး သတ်မှတ်တဲ့အချိန်လွန်သွားပြီး ကျည်ဆန်လည်းမလုံလောက်တော့လို့ ပြန်လည်ဆုတ်ခွာခဲ့ကြတယ်။” 

စခန်းကို ဝင်ရောက်သိမ်းပိုက်ဖို့ သွားရောက်တိုက်ခိုက်ခဲ့တာဖြစ်ပြီး မသိမ်းပိုက်နိုင်ခဲ့ဘဲ မင်းတုန်းဇာတိ ရဲတပ်သားဇင်ဘိုကို အပါဝင် ၂ ယောက်သေဆုံး၊ ၄ ယောက် ဒဏ်ရာရရှိကာ မကွေးဆေးရုံကို သယ်သွားတယ် သတင်းကြားတယ်လို့ ပြောပါတယ်။

မကွေးတိုင်း မြိုင်မြို့နယ်မှာ ဧပြီ ၈ ရက်နေ့ ညနေက စစ်ကောင်စီစစ်ကြောင်း ဒရုန်းနဲ့ဗုံးကြဲတိုက်ခိုက်ခံရပြီး  ၆ ယောက်ထက်မနည်း အပြင်းထန် ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။

မြိုင်မြို့နယ် ညောင်ရွာကျေးရွာမှာ စစ်ကောင်စီရဲ့ အင်အား ၈၀ လောက်ပါတဲ့ ဘီလူးစစ်ကြောင်းကို ဧပြီ ၈ ရက် ညနေ ၅ နာရီ ၅၃ မိနစ်မှာ ဒရုန်းနဲ့ အီနာဂါဗုံးသီး ၂၈ လုံး ဖြုတ်ချတိုက်ခိုက်ခဲ့တာလို့ မြိုင်ပကဖ တပ်ရင်း ၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

စစ်ကြောင်းကတော့ ပုလဲမြို့နယ် ပန်းရွာကို Mi35 တိုက်ခိုက်ရေးရဟတ်ယာဥ်နဲ့ ပစ်ခတ်ပြီး ထောက်ပို့ ရဟတ်ယဥ် ၂ စီးနဲ့ လာချသွားတဲ့ စစ်ကြောင်းဖြစ်ပြီး ဘီးလူးစစ်ကြောင်းလို့ အမည်ပေးထားတယ်လို့ ဆိုပါတယ်။

အဲဒီတိုက်ခိုက်မှုကို မြိုင်ပကဖ တပ်ရင်း ၁၊ ၂၊ သူရိန်တပ်ဖွဲ့နဲ့ Black Cobra တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က ၆ ယောက်အပြင်းထန် ဒဏ်ရာရရှိကာ ပြည်သူ့ကာကွယ်ရေးတပ်က ရဲဘော်တွေ ထိခိုက်မှုမရှိခဲ့ဘူးလို့ ဗိုလ်လက်ယာက ပြောပါတယ်။

အဲဒီစစ်ကြောင်းဟာ မြိုင်မြို့နယ် အိုင်းမကျေးရွာကိုလည်း ဧပြီ ၈ ရက် မနက်မှာ  မီးရှို့ဖျက်ဆီးခဲ့တာကြောင့် နေအိမ် ၁၈ လုံး မီးလောင်ကျွမ်းခဲ့တယ်လို့ ဒေသခံတွေက ပြောပါတယ်။

တိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းတွေမှာ စစ်ကောင်စီရဲ့ မြေပြင်စစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အထိနာနေတာကြောင့် စစ်ကောင်စီဘက်က လေကြောင်းတိုက်ခိုက်တာတွေ ဆက်တိုက်ပြုလုပ်လာနေတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ကရင်အမျိုးသားအစည်းအရုံး (KNU) တပ်မဟာ (၁) သထုံခရိုင် ဘီးလင်းမြို့နယ်ရှိ စစ်ကောင်စီ လက်အောက်ခံ ကရင်နယ်ခြားစောင့် (BGF) တပ်စခန်းကို KNLA ပူးပေါင်းတပ်ဖွဲ့က တိုက်ခိုက်သိမ်းပိုက်ခဲ့တယ်လို့ သထုံခရိုင် PDF တာဝန်ခံက ဒီဗွီဘီကို ပြောပါတယ်။

ပြီးခဲ့တဲ့ မတ် ၂၂ ရက်နေ့ မနက် ၅ နာရီအချိန်လောက်မှာ တပ်အင်အား ၂၀ ကျော် တပ်စွဲနေထိုင်နေတဲ့ လယ်ဆော့လော့ BGF တပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA)၊ PDF ပူးပေါင်းတပ်က ဝင်ရောက်တိုက်ခိုက်ခဲ့ပါတယ်။

အဲဒီတိုက်ခိုက်မှုကြောင့် နှစ်ဖက်တိုက်ပွဲ အချိန် ၁ နာရီကျော်ကြာ ဖြစ်ပွားပြီးနောက် KNLA ပူးပေါင်းတပ်ဖွဲ့က BGF စခန်းကို သိမ်းပိုက်ရရှိခဲ့ပါတယ်။

စခန်းသိမ်းတိုက်ပွဲမှာ BGF တပ်ဖွဲ့ ၆ ဦး သေဆုံးပြီး သေနတ် ၅ လက်အပါအဝင် လက်နက်ခဲယမ်းနဲ့ ဆက်စပ်ပစ္စည်းတချို့ကိုလည်း KNLA ပူးပေါင်းတပ်ဖွဲ့က သိမ်းဆည်းနိုင်ခဲ့တယ်လို့ သထုံခရိုင် PDF တာဝန်ခံ ကိုအေးမင်းထွန်းက ပြောပါတယ်။

စခန်းသိမ်းတိုက်ပွဲ‌အတွင်း BGF တပ်ဖွဲ့ဝင်တချို့ ထွက်ပြေးတာတွေ ရှိသလို သေဆုံးသွားတဲ့ အလောင်းတွေကိုလည်း လာရောက်ကောက်ယူတာ မရှိဘူးလို့ ဆိုပါတယ်။

BGF စခန်းသိမ်းတိုက်ပွဲမှာ KNLA ပူးပေါင်းတပ်ဖွဲ့ဘက်မှ PDF ရဲဘော်တဦး ဦးခေါင်းရှပ်ထိဒဏ်ရာ (မစိုးရိမ်ရ) ရရှိခဲ့တယ်လို့ သိရတယ်။

KNU သထုံခရိုင်ထဲက BGF တပ်စခန်းတွေဟာ ‌ကျေးရွာနေ ပြည်သူတွေ မကြာခဏ ဖမ်းဆီးပြီး ငွေညှစ်တာနဲ့ သူတို့ စခန်းကို KNLA ပူးပေါင်းတပ်‌တွေ လာပစ်ရင် ကျေးရွာထဲ လက်နက်ကြီး ပစ်ခတ်မယ်လို့ အမြဲလို ခြိမ်းခြောက်နေတာပါ။

ပြီးခဲ့တဲ့နှစ်တုန်းကလည်း ဘီးလင်းမြို့နယ်ရှိ ကြသောင်းဆိပ် BGF တပ်စခန်းကို KNLA ပူးပေါင်းတပ်က တိုက်ခိုက်သိမ်းပိုက်ပြီး မီးရှို့ဖျက်ဆီးထားပါတယ်။