စစ်ကိုင်းတိုင်း ကလေးခရိုင်အမှတ် ၄ ပြည်သူ့ကာကွယ်ရေးတပ်ဖွဲ့ (PDF Kalay တပ်ရင်း ၄) က လာမည့် သီတင်းကျွတ် လပြည့်နေ့မှာ တေးဂီတဖျော်ဖြေပွဲလုပ်မယ်လို့ ကလေး PDF တပ်ရင်း ၄ က တာဝန်ခံရဲဘော်တဦးက ပြောပါတယ်။
လက်နက်ခဲယမ်း၀ယ်ယူဖို့ ရန်ပုံငွေလိုအပ်နေပြီး ပြည်သူတွေဆီက ဆက်တိုက်ဆိုသလို အလှူငွေကောက်ခံနေရတာ အားနာတာကြောင့််အခုဖျော်ဖြေပွဲကို စီစဉ်ရတာဖြစ်ကြောင်း၊ ရဲဘော်တွေအနေနဲ့ ဖျော်ဖြေပွဲကို အင်တာနက်နဲ့ နည်းပညာ အခက်အခဲပေါင်းများစွားကြားက တောတွင်းရှိ ပစ္စည်းတွေနဲ့ ကြိုးစားထားကြကာ တခြားတာ၀န်တွေ ရှိနေသတဲ့ကြားက ကိုယ်တိုင်တီးခတ် သီဆိုဖျော်ဖြေမှာဖြစ်ပြီး အောက်တိုဘာ ၉ (သီတင်းကျွတ်လပြည့်နေ့) မှာ Telegram Channel မှတဆင့် တင်ဆက်မယ်လို့ ဆိုပါတယ်။
“ကြာလာတော့ အရင်လိုမျိုး ပြည်သူအပေါ်အလှူခံဖို့ အင်မတန်အားနာနေရတယ်။ ဒါကြောင့် တိုက်ပွဲ တိုက်တာမဟုတ်တဲ့ တခြားကျနော်တို့တတ်နိုင်တဲ့ အရာတခုခုကို ပြန်ပေးပြီး ရန်ပုံငွေရှာဖိုကြိုးစားရင်း ဒီအစီအစဥ်လေးကို လုပ်ဖြစ်သွားတာပါ။"
ဖျော်ဖြေပွဲမှာ သီချင်း ၁၂ ပုဒ် သီဆိုဖျော်ဖြေမှာဖြစ်ပြီး အခြားသောအစီအစဉ်အချို့လည်း ထည့်သွင်းထားကြောင်း။ ကြည့်ရှုအားပေးလိုတဲ့ ပြည်သူတွေအနေနဲ့ လက်မှတ် တစောင်ကို ငွေကျပ် ၂၅,၀၀၀ နှုန်းနဲ့ ဝယ်ယူအားပေးနိုင်ကြောင်း၊ ဖျော်ဖြေပွဲမှ ရလာမယ့် ရန်ပုံငွေတွေကို တပ်ရင်း ၄ အတွက်လိုအပ်တဲ့ ပစ်အားကောင်းသော လက်နက်များ ဝယ်ယူမည်ဖြစ်ပြီး အဆိုပါလက်နက်တွေဟာ စစ်ကောင်စီနဲ့ ဖြစ်ပွားတဲ့ ထိတွေ့တိုက်ပွဲတွေမှာ အလွန်အရေးပါကြောင်း ပြောပါတယ်။
ရဲဘော်တွေ ခက်ခက်ခဲခဲ စီစဉ်တင်ဆက်မယ့် အခုဖျော်ဖြေပွဲကို ပြည်တွင်းပြည်ပရှိ ပြည်သူတွေ ပါဝင်ပေးကြဖို့နဲ့ ပြည်တွင်းရှိ ပြည်သူများအတွက်သာမက ပြည်ပရှိ ပြည်သူများအတွက် အမေရိကန် ၁၀ ဒေါ်လာ၊ စင်ကာပူ ၁၅ ဒေါ်လာ၊ ကိုရီးယား ၁၅,၀၀၀ ဝမ်၊ ဂျပန် ၁၅၀၀ ယမ်းနဲ့ ထိုင်းဘတ် ၃၀၀ အသီးသီးသတ်မှတ်ထားပြီး PDF Kalay တပ်ရင်း ၄ ရဲ့ ဖေ့ဘုတ်စာမျက်နှာကတဆင့် ဝယ်ယူအားပေးနိုင်ကြောင်း၊ ပြည်သူတွေအနေနဲ့ လက်မှတ် ၁ စောင်မှစပြီး မိမိတတ်နိုင်သလောက် ၀ယ်ယူအားပေးရင်း ရဲဘော်တွေနဲ့အတူ ဂီတသံစဥ်ကို ခံစား နားဆင်ပြီး တော်လှန်ရေးအတွက် အားဖြည့်ပါ၀င်ပေးကြဖို့ တောင်းဆိုထားပါတယ်။
အာဏာသိမ်းစစ်ကောင်စီဟာ လာမယ့် အောက်တိုဘာလအတွင်း သီတင်းကျွတ်ကာလမှာ နိုင်ငံရေးအကျဉ်းသားတချို့အပါအဝင် အကျဉ်းသားတွေကို လွတ်ငြိမ်းချမ်းသာခွင့်ပေးနိုင်တယ်လို့ အကျဉ်းကျခံနေရသူတွေရဲ့ မိသားစုတွေနဲ့ ရှေ့နေတွေက ခန့်မှန်းပြောပါတယ်။
မြန်မာနိုင်ငံအနှံ့ အကျဥ်းထောင်အသီးသီးမှာ နိုင်ငံရေးပြစ်မှုနဲ့တခြားအမှုတွေကို လာမယ့် အောက်တိုဘာအတွင်းမှာ လွတ်ပေးနိုင်တယ်လို့ ရှေနေတစ်ဦးက ဒီဗွီဘီ ကိုပြောပါတယ်။
"အမှုကြီးမဟုတ်တဲ့သူတွေ အကြမ်းဖက်ဥပဒေပုဒ်မ မဟုတ်တဲ့သူတွေ လွတ်နိုင်တယ်လို့ ပြောသံတွေကြားတယ်။ ကျန်းမာရေးချို့တဲ့နေသူတွေလည်း ပါတယ်။”
လှိုင်သာယာမြို့နယ်က ဆန္ဒပြပွဲတစ်ခုမှာ ဖမ်းဆီးခံရပြီး ပုဒ်မ ၅၀၅ နဲ့ ထောင်ဒဏ် ၃ နှစ်ချထားရသူရဲ့ မိသားစုဝင်တွေကို လာမယ့်အောက်တိုဘာလ လွတ်ငြိမ်းခွင့်မှာ ပါလာနိုင်တယ်လို့ ရှေနေကဖုန်းဆက်တယ်လို့ မိသားစုဝင်တစ်ဦးက ဒီဗွိဘီ ကိုပြောပါတယ်။
"အခုလာမယ့် သီတင်းကျွတ်လွတ်ငြိမ်းမှာ သားလေးပါတယ်လို့ ရှေနေကဖုန်းဆက်တော့ ပြောလိုက်တာ။ ဟုတ်မဟုတ်တော့ သူလည်းကြားတာကိုပြောတာပေါ့။ အဲ့သတင်းမှန်တယ်ဆိုရင် အကုန်လုံးကို လွတ်စေချင်တယ်"လို့ ပြောပါတယ်။
စစ်ကောင်စီလက်အောက်ခံ ပြည်ထဲရေးဝန်ကြီးက အခုရက်ပိုင်းအတွင်း အကျဥ်းထောင်တချို့ကို သွာရောက်စစ်ဆေးခဲ့ပြီးတဲ့နောက် လွတ်ငြိမ်းချမ်းသာခွင့်သတင်းတွေ ထွက်လာတယ်ဖြစ်တယ်လို့ အကျဥ်းဦးစီးနဲ့နီးစပ်သူတစ်ဦးက အခုလိုရှင်းပြပါတယ်။
"အခုရက်ပိုင်း ပြည်ထဲရေးဝန်ကြီး အကျဥ်းထောင်တွေကိုလာစစ်တာရှိတယ်။ အဲဒီမှာ စည်းကမ်းနဲ့ ညီညွတ်အောင်နေတဲ့သူတွေ ပုဒ်မ ၅၀၅ လို အမှုတွေကို မှတ်ချက်ပေးတာရှိတယ်။ ပြီးခဲ့တဲ့ရက်က ထားဝယ်ထောင်မှာ လျှော့ရက်နဲ့လွတ်ငြိမ်းပေးတာရှိတယ်။ အသံတွေကတော့ကြားနေတာပဲ သီတင်းကျွတ်မှာ လွတ်ငြိမ်းရှိတယ်"လို့ ပြောပါတယ်။
ပြီးခဲ့တဲ့ စက်တင်ဘာ ၂၂ ရက်ကလည်း ထားဝယ်အကျဥ်းထောင်ကနေ နိုင်ငံရေးကျဥ်းသား ခုနှစ်ယောက်ကို ပြစ်ဒဏ်လျော့ချ လွတ်ရက်စေ့နဲ့ ပြန်လည်လွှတ်ပေးခဲ့တာလည်း ရှိပါတယ်။
အာဏာသိမ်းစစ်ကောင်စီက တစ်နှစ်ကျော်ကာလအတွင်း လွတ်ငြိမ်းချမ်းသာခွင့် ၅၇,၀၀၀ ကျော်ပေးခဲ့ရာ နိုင်ငံရေးကြောင့် အကျဥ်းကျနေသူ ၁၅၀၀ ဝန်းကျင်ပါခဲ့ပြီး ကျန်သူတွေမှာ ခိုးဆိုးလုယက်နဲ့ မူးယစ်ဆေးဝါးအမှုနဲ့ ထောင်ကျနေသူများဖြစ်ပါတယ်။
၂၀၂၁ ခုနှစ် အာဏာသိမ်းချိန်မှ ၂၀၂၂ ခုနှစ် စက်တင်ဘာလ ၂၆ ရက်အထိ ဖမ်းဆီးချုပ်နှောင်ခြင်းခံထားရသူ စုစုပေါင်း ၁၂၅၀၀ ဦးရှိပြီး ဒီအထဲက ၁၄၉၁ ဦး မှာ ထောင်ဒဏ်ချမှတ်ခြင်းခံထားရကာ ပြန်လည်လွတ်မြောက်လာသူဦးရေ ၃၁၂၁ ဦး ရှိတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ထံက သိရပါတယ်။
