မြန်မာနိုင်ငံကနေ သီရိလင်္ကာနိုင်ငံကို စက်တင်ဘာ  ၂ ရက်နေ့က  ဆန်တန်ချိန် ၁၀၀၀ လှူဒါန်းလိုက်တယ်လို့   စစ်တပ်သတင်းမှန်ပြန်ကြားရေးက သတင်းထုတ်ပြန်ပါတယ်။

ဆန်တန်ချိန် ၁၀၀၀ (အိတ်ရေ ၂၀၀၀၀) ကို ရန်ကုန်မြို့က Asia World Port Terminal မှာ စစ်ကောင်စီခန့်ထားတဲ့ စီးပွားရေးနဲ့ ကူးသန်းရောင်းဝယ်ရေးဝန်ကြီး ဦးအောင်နိုင်ဦးက လွှဲပြောင်းပေးခဲ့တာဖြစ်ပါတယ်။

သီရိလင်္ကာပြည်တွေအပေါ် မြန်မာအစိုးရ(စစ်ကောင်စီ)နဲ့ ပြည်သူတွေရဲ့ စာနာမှုကိုပြသတာဖြစ်ကြောင်း၊ နှစ်နိုင်ငံချစ်ကြည်ရေးနဲ့ပူးပေါင်းဆောင်ရွက်ရေးကို ပိုပြီးတိုးမြှင့် ဆောင်ရွက်နိုင်မယ်လို့ မျှော်လင့်ကြောင်း စစ်ကောင်စီဝန်ကြီးက ပြောခဲ့တယ်လို့ ဆိုပါတယ်။

သီရိလင်္ကာသံအမတ်ကြီးကလည်း အခုလို လှူဒါန်းဖို့  စီမံပေးခဲ့တဲ့ ဗိုလ်ချုပ်မှူးကြီးမင်းအောင်လှိုင်ကို ကျေးဇူးအများကြီးတင်ကြောင်း၊ စီးပွားရေး‌ အကျပ်အတည်းနဲ့ ရင်ဆိုင်နေရတဲ့ သီရိလင်္ကာနိုင်ငံရဲ့လတ်တလော အခြေအနေမှာ အခုလို လှူဒါန်းတာဟာ အထောက်အကူအများကြီးဖြစ်တယ်လို့ ပြောဆိုခဲ့ကြောင်း စစ်တပ်သတင်းမှာဖော်ပြပါတယ်။

မြန်မာပြည်တွင်းမှာ လက်ရှိ ဆန်၊ ဆီ၊ ဆား အခြေခံစားသောက်ကုန်ဈေးနှုန်းတွေ အဆမတန်ကြီးမြင့်မှုကြောင့် ပြည်သူတွေ စီးပွားရေးကျပ်တည်းနေပြီး စစ်ဘေးရှောင်တွေ စားနပ်ရိက္ခာပြတ်လပ် ထမင်းနပ်မှန်အောင် မစားနိုင်ဘဲ အခက်အခဲကြုံနေချိန်မှာ အာဏာသိမ််း စစ်ကောင်စီက နိုင်ငံခြားတိုင်းပြည်ကို ဆန်တန်ချိန် ၁၀၀၀ လှူဒါန်းလိုက်တာဖြစ်ပါတယ်။

Photo- DSINFO

သီရိလင်္ကာနဲ့ မြန်မာ နှစ်နိုင်ငံသဘောတူစာချုပ်အရ မြန်မာနိုင်ငံကနေ  ဆန် မက်ထရစ် တန် ၂၀,၀၀၀ တင်သွင်းဖို့ သီရိလင်္ကာအစိုးရက အတည်ပြုခဲ့ပါတယ်။

မကြာသေးမီက ပြုလုပ်တဲ့ အပတ်စဉ်  သီရိလင်္ကာအစိုးရအဖွဲ့ သတင်းစာရှင်းလင်းပွဲမှာ အဲ့ဒီဆုံးဖြတ်ချက်ကို ထုတ်ပြန်ခဲ့တာ ဖြစ်ပါတယ်။

သီရိလင်္ကာနိုင်ငံအတွင်း ပြတ်လပ်မှုမရှိပဲ လုံလောက်တဲ့ အရန်ဆန်တွေ သိုလှောင်ထားနိုင်စေဖို့နဲ့ လုံခြုံစိတ်ချရတဲ့ ဆန်သိုလှောင်မှုကို ထိန်းသိမ်းထားနိုင်စေဖို့အတွက် ၂၀၂၁ ခုနှစ် စက်တင်ဘာလ ၂၄ ရက်က ကျင်းပတဲ့ အစိုးရအဖွဲ့ အစည်းအဝေးမှာ အတည်ပြုချက် ရယူခဲ့တယ်လို့ ဆိုပါတယ်။

သီရိလင်္ကာ ကုန်သွယ်ရေးဝန်ကြီးရဲ့ အဆိုပြုချက်မှာ နှစ်နိုင်ငံ သဘောတူညီချက်အရ သီရိလင်္ကာနိုင်ငံတော်ကုန်သွယ်မှု (အထွေထွေ) ကော်ပိုရေးရှင်းမှတဆင့် ဆန် မက်ထရစ်တစ်တန်ကို အမေရိကန်ဒေါ်လာ ၄၆၀ တန်ဖိုးရှိကြောင်း သိရပါတယ်။