ရန်ကုန်မြို့က  သုသာန် ၄ ခုမှာ  ဇူလိုင် ၂၆ ရက်နေ့အတွက် မီးသင်္ဂြိုဟ်ခဲ့တဲ့ ရုပ်အလောင်း ၄၅၀ ကျော်ရှိခဲ့ပြီး သေဆုံးနှုန်း ၂ ရက်ဆက်တိုက် ကျဆင်းလာတယ်လို့ နာရေး အကူအညီပေးနေတဲ့ ပရဟိတအဖွဲ့တွေက ပြောပါတယ်။

ဒီနေ့ရေဝေးမှာ ရုပ်အလောင်း ၁၅၀ ဝန်းကျင်၊ ထိန်ပင်မှာ ၁၅၀ ဝန်းကျင်၊ ကျီစုမှာ ၆၀ ကျော်၊ ကျူချောင်းမှာ ၁၀၀ ကျော် စုစုပေါင်း ရုပ်အလောင်း ၄၅၀ ကျော် မီးသင်္ဂြိုဟ်ခဲ့ရပါတယ်။ 

ဇူလိုင် ၂၀ ရက်နေ့တုန်းက သုသာန်လေးခုမှာ ရုပ်အလောင်း ၁၂၀၀ ကျော် ၁၃၀၀ နီးပါး အထိ မီးသင်္ဂြိုဟ်ခဲ့ရတာဖြစ်တဲ့အတွက် သေဆုံးနှုန်း သိသိသာသာပြန်ကျလာတာဖြစ်တယ်လို့ ရေဝေး၊ သုသာန်မှာ နာရေးကူညီပေးနေတဲ့ ပရဟိတသမားတစ်ဦးက ပြောပါတယ်။

သုသာန်တွေမှာ မီးသင်္ဂြိုဟ်ရတဲ့ရုပ်အလောင်းအရေအတွက်နည်းပါးလာတာဟာ ကောင်းမွန်တဲ့အခြေအနေဆိုပေမယ့် ကိုဗစ်ရောဂါကို သတိထားဖို့လိုအပ်နေသေးတယ်လို့ ပရဟိတသမားတွေကပြောပါတယ်။

အရပ်သားအစိုးရလက်ထက်က ချမှတ်ထားတဲ့ ကိုဗစ်ဆိုင်ရာစည်းကမ်းတွေကို ကိုယ်ပိုင်အသိနဲ့ လိုက်နာကြဖို့လည်း တိုက်တွန်းပါတယ်။

သေဆုံးနှုန်းပြန်ကျလာတာတွေ့ရပေမယ့် ရုပ်အလောင်းတွေကို လေ့လာကြည့်တဲ့အခါ ကလေး၊ လူငယ်နဲ့ လူလတ်ပိုင်းတွေ ပါဝင်တာကို တွေ့နေရတဲ့အတွက် မပေါ့ဆဖို့ ကျီစုသုသာန်မှာ နာရေးကူညီပေးနေတဲ့ ပရဟိတသမားတစ်ဦးကလည်း ပြောပါတယ်။

“ကိုဗစ်ရောဂါပိုးဟာ မာယာများပြီး သူ့ရဲ့လက္ခဏာတွေ၊ ခံစားရတာတွေ၊ သေဆုံးပုံတွေဟာ တစ်ယောက်နဲ့တစ်ယောက်မတူကြတဲ့အတွက် ပြည်သူအားလုံး သတိထားကြဖို့လိုပါတယ်”။ 

ရန်ကုန်မှာ ကိုဗစ်ရောဂါပိုးကူးစက်နှုန်းမြင့်မားနေပေမယ့် အရှေ့ဒဂုံ၊ ရွှေပြည်သာနဲ့ လှိုင်သာယာမြို့နယ်က စက်ရုံလုပ်သားတွေဟာ လူစုလူဝေးနဲ့အလုပ်ပြန်ဆင်းနေတာကို တွေ့ရတဲ့အတွက် ရောဂါပြန့်ပွားမှု ထပ်ဖြစ်မှာကို စိုးရိမ်တယ်လို့ ပရဟိသမားတွေကပြောပါတယ်။

မြန်မာနိုင်ငံမှာ ကိုဗစ်-၁၉ ရောဂါကူးစက်ခံရသူပေါင်း ၂၇၀,၀၀၀ နီးပါးနဲ့ သေဆုံးသူပေါင်း ၇,၀၀၀ ကျော်ရှိလာခဲ့ပြီလို့ စစ်ကောင်စီ ကျန်းမာရေးနဲ့ အားကစားဝန်ကြီးဌာနက  ဇူလိုင် ၂၅ ရက်ညမှာ ထုတ်ပြန်ပါတယ်။

ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၁၂,၄၇၄ ခုကို စစ်ဆေးခဲ့ရာမှာ ရောဂါကူးစက်မှုအသစ် ၄,၉၉၈ ယောက် တွေ့ရှိခဲ့တာမို့ ပိုးတွေ့နှုန်း ၄၀ ရာခိုင်နှုန်းကျော် ရှိပြီး တရက်တည်းသေဆုံးသူအရေအတွက်ကတော့ ၃၅၅ ယောက် ရှိပါတယ်။

စစ်ကောင်စီကျန်းမာရေးဌာနက နေ့စဉ်ထုတ်ပြန်တဲ့ကို ဗစ်ပိုးကူးစက်မှုနဲ့ သေဆုံးနှုန်းထက် မြေပြင်မှာ တကယ်တမ်း ကူးစက်သေဆုံးနှုန်းများနေတုန်းပဲဖြစ်တယ်လို့ ပရဟိတသမားတွေက ပြောပါတယ်။

Photo- ဘိုစိန်လူမှုကူညီကယ်ဆယ်ရေးအဖွဲ့ (ရန်ကုန်)

ဇူလိုင် ၂၀ ရက်နေ့ တရက်တည်း ရန်ကုန်မြို့ ရေဝေး၊ ထိန်ပင်၊ ကျီစု၊ ကျူချောင်းသုဿာန်လေးခုမှာ မီးသင်္ဂြိုဟ်တဲ့ ရုပ်အလောင်းစုစုပေါင်း ၁၂၀၀ ကျော် ၁၃၀၀ နီးပါးရှိလာတယ်လို့ အကူအညီပေးနေတဲ့ ပရဟိတအဖွဲ့တွေကပြောပါတယ်။ 

သေဆုံးသူအများစုက ကိုဗစ်သံသယလူနာတွေဖြစ်ပြီး အောက်စီဂျင်မရလို့ သေဆုံးတာတွေ့ရတယ်လို့ ဆိုပါတယ်။ 

ဇူလိုင် ၂၀ ရက်နေ့မှာ ပရဟိတကားတွေမလုံလောက်တဲ့အတွက် ပြည်သူတွေက အိမ်စီးကားတွေနဲ့ ရုပ်အလောင်းတွေကို  သုဿာန်တွေကိုပို့ဆောင်ရတဲ့အထိ များပြားခဲ့တာလို့ ပရဟိတသမားတဦးက ပြောပါတယ်။

"ဒီနေ့သေတယ်။ ထိန်ပင်မှာများနေလို့ ရေဝေးကို ပြောင်းလိုက်သေးတယ်။ အားလုံးပေါင်းလိုက်ရင် မှန်းခြေ ထိန်ပင်မှာ လေးရာနီးပါးရှိမယ်။ ရေဝေးမှာလည်း လေးရာကျော်မယ်။ ကျီစုတို့ ကျူချောင်းတို့မှာလည်း များတယ်။ အားလုံးပေါင်းလိုက်ရင် ၁၂၀၀ ကျော် ၁၃၀၀ နီးပါးရှိလိမ့်မယ်။ ဘယ်လိုလုပ်ကြမလဲ တို့မြန်မာပြည်ကြီးကုန်တော့မယ်လူတွေ။"

ဇူလိုင် ၂၀ ရက်နေ့ ညနေ ၆ နာရီအထိ ရေဝေးမှာ မီးသင်္ဂြိုဟ်တဲ့ ရုပ်အလောင်း ၃၉၆ လောင်းအထိရှိနေပြီး ညပိုင်းအထိဆိုရင် စုစုပေါင်း ၄၅၀ လောက်အထိဖြစ်လာလိမ့်မယ်လို့ ပရဟိတသမားတစ်ယောက်ကပြောပါတယ်။ 

ပရဟိတကားတွေဟာ တစ်နေကုန်တန်းစီနေရပြီး အလှည့်တစ်ခါရောက်ဖို့ အချိန်တစ်နာရီခွဲလောက်တန်းစီစောင့်ရတယ်လို့ ပရဟိတသမားတဦးက ပြောပါတယ်၊

"၆ နာရီအတိမှာ ၃၉၆ လောင်း ကျန်သေးတယ် မပြီးသေးဘူးနော်။ စာရင်းမပိတ်သေးဘူးနော်။ မှန်ခြေ ၄၅၀ လောက်ဖြစ်မယ်ထင်တယ်။ အနည်းဆုံး ၄၅၀ လောက်ဖြစ်မယ်ထင်တယ် ရေဝေးတစ်ခုတည်းတင်။ အရင်က အများဆုံး အလောင်း ၁၀၀ လောက်ပဲ သင်္ဂြိုဟ်ခဲ့ရတဲ့စက်တွေ၊ အခု ၄၅၀ လောက်ကို ဘယ်လိုသင်္ဂြိုဟ်လဲ မပြောတတ်တော့ဘူး။ တချို့ဆိုရင် ကိုယ်ပိုင်ကားတွေ၊ ပရိုဘောက်စ်တွေ၊ ဟိုက်ဂျက်တွေနဲ့ လာပို့တဲ့သူတွေလည်းတွေ့တယ်။ တန်းစီရတယ်။ ကိုယ့်အလှည့်ရောက်ဖို့ အနည်းဆုံးတစ်နာရီ တစ်နာရီခွဲ စောင့်ရတယ်။"

ဇူလိုင် ၁၂ရက်နေ့ကနေ ၁၈ ရက်နေ့အထိ ရန်ကုန်မြို့က သုဿာန်တွေမှာ တစ်ရက်ကို ရုပ်အလောင်း ၆၀၀ ကျော် ၇၀၀ နီးပါးသင်္ဂြိုဟ်ခဲ့ရပြီး တစ်ရက်ထက်တစ်ရက် ရုပ်အလောင်းပိုများလာတာပါ။ 

စစ်ကောင်စီလက်အောက်ခံကျန်းမာရေးဌာနကထုတ်ပြန်တဲ့ နေ့စဉ် ကိုဗစ်ကူးစက်ခံရတဲ့နှုန်းနဲ့ သေဆုံးနှုန်းတွေထက် မြေပြင်မှာ သေဆုံးနှုန်း ပိုများနေတယ်လို့ ပရဟိတအဖွဲ့တွေက ဆိုကြပါတယ်။ဓာတ်ပုံ - SeinWin Than