မန္တလေးတိုင်း၊ အမရပူရမြို့နယ်၊ မြစ်ငယ်-ထုံးဘိုလမ်း၊ တောတွင်ကျေးရွာ၊ စိတ်ကျန်းမာရေး ဆေးရုံကြီး၊ ဝန်ထမ်းလိုင်းခန်းမှာ မေလ ၇ ရက် နေ့လယ်ပိုင်းက ဆေးရုံဝန်ထမ်းတဦး မီးစက်မီးခိုးရှူမိပြီး သေဆုံးသွားတယ်လို့ မြို့ခံကယ်ဆယ်ရေးအသင်းတွေက ပြောပါတယ်။
သေဆုံးသူဟာ စိတ်ကျန်းမာရေးဆေးရုံဝန်ထမ်း အသက် ၅၈ နှစ်အရွယ် သူနာပြုဆရာမတဦး ဖြစ်တယ်လို့ သိရပြီး အဲ့ဒီနေ့ ၁၁ နာရီခွဲလောက်က သေဆုံးနေတာကို လိုင်းခန်းနေသူတွေက တွေ့ခဲ့တာပါ။
မြို့ခံကယ်ဆယ်ရေးအသင်း တာဝန်ခံတဦးက “ဆေးရုံသူနာပြုဆရာမတယောက် သေဆုံးပါ။ ဧည့်ခန်းမှာပဲ ထိုင်လျက်အနေအထားနဲ့ ဆုံးသွားတာ။ လူကြီးပိုင်းထဲကပဲ။ ပြင်ပဒဏ်ရာတော့ မတွေ့ဘူး။ မန္တလေးဆေးရုံကြီး ရင်ခွဲရုံကို ပို့ဆောင်ပေးထားပါတယ်” လို့ ပြောပါတယ်။
သေဆုံးသူဟာ မီးပျက်နေတဲ့အချိန် အခန်းအတွင်း မီးစက်မောင်းထားပြီး အဲယားကွန်း ဖွင့်ထားခဲ့တယ်လို့ သိရပါတယ်။
မီးစက်ကထွက်တဲ့ မီးခိုးရှူမိတာနဲ့ အခန်းအတွင်း လေလုံနေတာကြောင့် အသက်ရှုကျပ် သေဆုံးသွားတယ်လို့ သိရပြီး စစ်ဆေးချက်အရ ရုပ်အလောင်းမှာ ပြင်ပဒဏ်ရာမရှိဘူးလို့ သိရပါတယ်။
သေဆုံးသူကို မန္တလေးဆေးရုံကြီး ပို့ဆောင်ထားပြီး လူသေဆုံးမှုအတွက် အမရပူရမြို့နယ် ရဲစခန်းမှာ သေမှုသေခင်းအမှတ် ဖွင့်လှစ်ဆောင်ရွက်နေတယ်လို့ သိရပါတယ်။
မွန်ပြည်နယ်၊ ရေးမြို့နယ် ရေးချောင်းတောင်မြစ်ကူးတံတားပေါ်မှာ ဇန်နဝါရီ ၁ ရက် ညနေက ကင်းတဲစောင့် စစ်ကောင်စီ ရဲတပ်သားထံက သေနတ်ကျည်ထွက်ပြီး သူနာပြုဆရာမအပါအဝင် ဒေသခံ ၂ ဦး ထိခိုက်ဒဏ်ရာရခဲ့တယ်လို့ တံတားနားနေသူတွေက ပြောပါတယ်။
ဆိုင်ကယ်ဖြတ်သန်းစီးနင်းခွင့် မပြုတဲ့ အဲဒီတံတားပေါ်မှာ ဆိုက်ကယ်တွန်းပြီး လာနေချိန် ကင်းတဲနားအရောက် သေနတ်ကျည် ထိမှန်ခဲ့တာကြောင့် အမျိုးသား ၁ ယောက်နဲ့ အမျိုးသမီး ၁ ယောက် ထိခိုက်ဒဏ်ရာရခဲ့တာဖြစ်ပါတယ်။
ဒေသခံတဦးက “တံတားကင်းရဲက ကျည်မတော်တဆ ထွက်တာလို့ ဆိုတယ်။ အရက်မူးနေတာလည်း ဖြစ်နိုင်တယ်။ ချောင်းတောင်ရွာက အမျိုးသားက လက်မှာ ကျည်ထိတယ်။ ဝယ်ဇင်ကျေးရွာက သူနာပြုဆရာမက ဝမ်းဗိုက် ကျည်ထိတယ်။ မသေဘူး။ ရေးဆေးရုံမှာ” လို့ ဆိုပါတယ်။
ဖြစ်စဉ်နဲ့ပတ်သက်လို့ သိရှိဖို့ ထပ်မံသိရှိဖို့ စစ်ကောင်စီရဲ့လက်အောက်ခံ ရဲတပ်ဖွဲ့ဝင်တွေကို ဆက်သွယ်မေးမြန်းလို့ မရသေးပါဘူး။
ချောင်းတောင် ရေးမြစ်ကူးတံတား လုံခြုံရေးတွေဟာ မကြာခဏဆိုသလို ဒေသကာကွယ်ရေး တပ်ဖွဲ့တွေရဲ့ အလစ်အငိုက် ပစ်ခတ်ခံရလို့ လုံခြုံရေးတင်းကျပ်ထားပြီး အခုရက်ပိုင်း ဆိုင်ကယ်တွေ စီးနင်းဖြတ်သန်းခွင့် မပြုပဲ တံတာပေါ်မှာ တွန်းပြီး သွားခိုင်းထားတယ်လို့ ဒေသခံတွေက ပြောပါတယ်။
၂၀၂၂ ခုနှစ်က ရေးချောင်းတောင်မြစ်ကူးတံတားပေါ်မှာ ခေါ်ဇာမြို့နေ အမျိုးသား တယောက် ဆိုင်ကယ်ဆင်း မတွန်းလို့ဆိုပြီး ပစ်ခတ်ခံရသလို လုံခြုံရေးကင်းအနား ချဉ်းကပ်လာသူဟုဆိုပြီး အမျိုးသား တယောက်လည်း ပစ်ခတ်ခံခဲ့ရပါတယ်။