ပဲခူးတိုင်း၊ အုတ်ဖိုမြို့နယ်မှာ CDM သူနာပြုဆရာမတယောက်ကို စစ်ကောင်စီတပ်ဖွဲ့ဝင်တွေက မသတ်ခင်မှာ အဓမ္မပြုကျင့်ခဲ့တယ်ဆိုတဲ့ အထောက်အထားတွေနဲ့ အလောင်းပြန်တွေ့ခဲ့တယ်လို့ အုတ်ဖို PDF အဖွဲ့က ပြောပါတယ်။
ဖေဖော်ဝါရီ ၁၆ ရက်က အုတ်ဖိုမြို့နယ်မှာ CDM သူနာပြုဆရာမတယောက်ကို စစ်ကောင်စီတပ်တွေက တောစပ်တနေရာမှာ သတ်ဖြတ်ခဲ့တာဖြစ်ပြီး အလောင်းပြန်မတွေ့လို့ PDF တပ်ဖွဲ့တွေ နယ်မြေရှင်းလင်းရေးလုပ်ရင်းနဲ့ အုတ်ဖိုမြို့နယ်၊ ထန်းပင်ကုန်းအရှေ့ဘက်၊ တောစပ်မှာအလောင်းကို ပြန်ရှာတွေ့ခဲ့တယ်လို့ အုတ်ဖို PDF အဖွဲ့ တာဝန်ရှိသူတယောက်က ပြောပါတယ်။
''သူတို့က မသတ်ခင်ကို ဝိုင်း Rape လုပ်ခဲ့တာ၊ အင်္ကျီနဲ့ ထမိန်စကပ်တွေမှာ အထောက်အထားတွေ့ရတယ်။ ပတ်၀န်းကျင် မလှမ်းမကမ်းမှာ စိုက်ခင်း တချို့တော့ရှိတယ်။ အဲ့ဒိစိုက်ခင်းက လူတွေက ဘယ်သူတွေလုပ်သွားတယ်ဆိုတာကို သိကြတယ်။ ဒါပေမဲ့ ဘယ်သူမှ နာမည်မပြောရဲကြဘူး။ လက်ရှိ စစ်ကောင်စီတပ်က သူတို့ရွာမှာ တပ်စွဲထားတုန်း၊ Rape လုပ်တဲ့အထဲမှာ ပျူတွေလည်း ပါတယ်လို့တော့ ပြောတယ်။''
သူနာပြုဆရာမဟာ အုတ်ဖိုမြို့နယ်၊ အုတ်ရှစ်ကုန်းကျေးရွာအုပ်စု၊ ကျပ်ကွင်းကျေးရွာမှာ နေထိုင်သူဖြစ်ပြီး သူ့အမျိုးသားကကတော့ သူတို့ လက်ထပ်ပြီး ၃ လအကြာမှာ ဆန္ဒပြရာမှာပါဝင်ခဲ့မှုနဲ့ စစ်ကောင်စီက ဖမ်းမိသွားပြီးအခုထိ သာယာ၀တီထောင်ထဲမှာ ပုဒ်မ ၅၀၅ နဲ့ ထောင်ဒဏ် ၃ နှစ်ချခံထားရပါတယ်။
သူနာပြုဆရာမဟာ ဇန်နဝါရီ ၂၉ ရက်နေ့က PDF စခန်းတခုမှာ သွားရောက် မီးဖွားပေးပြီးအပြန်မှာ အဖမ်းခံလိုက်ရကာ သူနဲ့အတူ လုံခြုံရေးထည့်ပေးလိုက်တဲ့ ရဲဘော် ၂ ယောက်ဟာလည်း ပစ်သတ်ခံလိုက်ရပါတယ်။
ဆရာမကိုတော့ စစ်ကြောရေးမှာ ၁၀ ရက်ကျော် အစစ်ဆေးခံရပြီး၊ PDF စခန်းကို လိုက်ပြပေးဖို့ စစ်တပ်က ခေါ်သွားပြီး စခန်းပြပေပေးဖို့ ငြင်းဆန်ခဲ့တာကြောင့် တောစပ်ကိုခေါ်ပြီး အဓမ္မပြုကျင့်ကာ ပစ်သတ်ခဲ့တာလို့ မိသားစုကပြောပါတယ်။
မိသားစုဝင်တယောက်က “တကယ်တော့ သူက PDF လည်း မဟုတ်ဘူး၊ တောထဲနေတဲ့သူလည်း မဟုတ်ဘူး။ လတ်တလော CDM လုပ်ပြီးတိမ်းရှောင်နေတာ။ အခုက တောင်ပေါ်က PDF စခန်းမှာ စစ်ဘေးရှောင်နေတဲ့အထဲမှာ ကိုယ်၀န်သည် တယောက်ပါလာပြီး မီးဖွားဖို့ လိုအပ်တာကြောင့် သူ့ကို သွားခေါ်ရတာ။ အဲ့ဒါအပြန်မှာလမ်းမှာ မိသွားတာ။ အဲ့ဒါကို သူသွားခဲ့တဲ့ PDF စခန်းနေရာကို လိုက်ပြခိုင်းတာကို မပြတဲ့အတွက် အခုလို ရက်ရက်ဆက်ဆက် မုဒိမ်းကျင့်ပြီး သတ်လိုက်တာ” လို့ ပြောပါတယ်။
သူနာပြုဆရာမကို အဓမ္မပြုကျင့်သတ်ဖြတ်ခဲ့တဲ့ကိစ္စနဲ့ ပတ်သက်ပြီး စစ်ကောင်စီတပ်တွေဘက်ကိုတော့ ဆက်သွယ်မေးမြန်းနိုင်ခြင်းမရှိပါဘူး။
CDM သူနာပြုဆရာမရဲ့ အလောင်းကို ဖေဖော်ဝါရီ ၂၃ ရက်က ထန်းပင်ကုန်းရွာအလွန် ၆ မိုင်အကွာလောက်အကွာ၊ တောထဲက ချောက်ကမ်းပါးတခုထဲ လွှင့်ပစ်ထားတာကို ပြန်ရှာတွေ့ခဲ့တာဖြစ်ပြီး အုတ်ဖို PDF ကပဲ သင်္ဂြိုဟ်ပေးခဲ့တယ်လို့ သိရပါတယ်။
ပဲခူးတိုင်း၊ အုတ်ဖိုမြို့နယ်မှာ CDM သူနာပြုဆရာမ တယောက်ကို စစ်ကောင်စီတပ်တွေက ဖမ်းမိသွားပြီး PDF စခန်းကို လိုက်ပြခိုင်းရာမှာ ငြင်းဆန်တဲ့အတွက် စစ်ကောင်စီတပ်တွေက ပစ်သတ်လိုက်တယ်လို့ ဒေသခံတွေက ပြောပါတယ်။
CDM သူနာပြုဆရာမ မေဇွန်မိုးဟာ စစ်တပ်ရန်ကနေ တိမ်းရှောင်နေရင်း လွတ်မြောက်နယ်မြေတခု ကိုရောက်သွားပြီး အဲဒီက ဒေသခံ PDF တွေကို သူတတ်ထားတဲ့ဆေးပညာနဲ့ အကူအညီပေးရင်း နေထိုင်ခဲ့ရာက မြို့ကိုပြန်အသွားမှာဖမ်းမိသွားတာလို့ အုတ်ဖို PDF အဖွဲ့ တာဝန်ရှိသူက ပြောပါတယ်။
“ပြီးခဲ့တဲ့ ဇန်နဝါရီ ၂၉ ရက်နေ့က အုတ်ဖိုကိုပြန်သွားတာ၊ သူနဲ့အတူ ရဲဘော်နှစ်ယောက်ပါ ထည့်ပေးလိုက်တာ။ အဲဒါ ကျောက်ဖြူတောင်ဂိတ်မှာ အဖမ်းခံလိုက်ရတာ။ ပထမတော့ ရဲဘော်တွေက ခံပစ်တော့ ဆရာမကလွတ်သွားတယ်။ ရဲဘော် ၂ ယောက်ကတော့ ပစ်သတ်ခံလိုက်ရတယ်။ အဲဒီမှာ ဆရာမကို တောနင်းရှာကြတာ၊ အဲဒီည ၁၁ ခွဲကျမှ စိန်ပတ်လည်နားက တဲတစ်လုံးမှာ ပြန်ဖမ်းမိသွားတာ၊ အဲ့ဒိကနေ ဖမ်းသွားပြီးပျောက်နေတာ၊ အဲ့ဒါ ပြီးခဲ့တဲ့ ဖေဖော်ဝါရီလ ၁၆ ရက်နေ့ကျမှ အဲ့ဒိနေရာကိုပဲ ပြန်ခေါ်လာပြီး၊ တောစပ်မှာ မျက်စိကို အဝတ်စည်းပိတ်ထားပြီး ထွက်ပြေးခိုင်းတယ်။ ပြီးတော့ နောက်ကနေ သေနတ်နဲ့ ၃ ချက်ပစ် ပြီး သတ်လိုက်တာ။”
သူနာပြု ဆရာမ မေဇွန်မိုးနဲ့ သူ့အမျိုးသား ကိုအောင်ဇင်တို့ဟာ စစ်တပ်အာဏာသိမ်းပြီးကတည်းက ဆန္ဒပြပွဲတွေမှာ ဦးဆောင်ပါခဲ့တာကြောင့် စစ်ကောင်စီက သူတို့အိမ်ကို ဝင်ရောက်ဖမ်းဆီးရာမှာ ကိုအောင်ဇင်ကို ဖမ်းမိသွားပြီး ဆရာမ မေဇွန်မိုးကတော့ လွတ်မြောက်သွားခဲ့တာပါ။
သူနဲ့အတူ CDM လုပ်ထားတဲ့ သူနာပြုဆရာမတယောက်က “အခုလည်း ဆရာမအလောင်းကို သူတို့ဘယ်မှာ ဘာလုပ်လိုက်လဲမသိရဘူး။ ဘာမှ အကြောင်းလည်းမကြားဘူး။ နောက်မှ အုတ်ဖို ရဲစခန်းနဲ့ နီးစပ်သူတွေဆီကနေသိရတာက ဆရာမက တောထဲမှာထွက်ပြေးလို့ သေနပ်နဲ့ပစ်လိုက်ရကြောင်း၊ သူက သူနေခဲ့တဲ့ PDF စခန်းနေရာကိုမပြောလို့ သတ်လိုက်တာဖြစ်ကြောင်းသိရတာ” လို့ ပြောပါတယ်။
သေနတ်နဲ့ တောစပ်မှာပစ်သတ်ပြီး အလောင်းကို ခုတင် ၁၀၀ စစ်ဆေးရုံကို သယ်သွားတယ်လို့ အုတ်ဖိုဒေသခံတယောက်ထံက သိရပါတယ်။
သူနာပြု ဆရာမမေဇွန်မိုးရဲ့ ခင်ပွန်းဖြစ်သူ ကိုအောင်ဇင်ကတော့ ပုဒ်မ ၅၀၅ နဲ့ သာယာဝတီထောင်မှာ ထောင်ဒဏ် ၃ နှစ်ချခံထားရပြီး လွတ်ရက်စေ့ကာနီးနေပြီဖြစ်ပါတယ်။
