အမေရိကန်နဲ့ တောင်ကိုရီးယားတို့ဆီက ခြိမ်းခြောက်မှုတွေကို တန်ပြန်ဖို့ ထောက်လှမ်းရေးဂြိုဟ်တုကို ဦးစားပေးလုပ်ဆောင်ဖို့ စီစဉ်ထားတဲ့အတိုင်း ပထမဆုံး သူလျှိုဂြိုဟ်တုကို လွှတ်တင်ဖို့ မြောက်ကိုရီးယားခေါင်းဆောင် ကင်မ်ဂျုံအန်းက တာဝန်ရှိသူတွေကို အမိန့်ပေးခဲ့တယ်လို့ နိုင်ငံပိုင်မီဒီယာက ဧပြီ ၁၉ ရက်မှာ ဖော်ပြပါတယ်။
ဧပြီ ၁၈ ရက်က ပြုံယမ်းမြို့တော် အမျိုးသားလေကြောင်းဆိုင်ရာ ဖွံ့ဖြိုးတိုးတက်ရေးနဲ့ စီမံခန့်ခွဲရေးဌာနဆီ သွားရောက်လည်ပတ်ချိန်မှာ ကင်မ်ဂျုံအန်းက ဂြိုဟ်တုကို စီစဉ်ထားတဲ့အတိုင်း ဖြန့်ကျက်ဖို့ တိုက်တွန်းခဲ့တာပါ။
နိုင်ငံရဲ့ ထောက်လှမ်းရေးစွမ်းရည်ကို မြှင့်တင်ဖို့ မတူညီတဲ့ ပတ်လမ်းတွေမှာ ကင်းထောက်ဂြိုဟ်တု အများအပြားကို လွှတ်တင်ဖို့ အမိန့်ပေးခဲ့တယ်လို့ နိုင်ငံပိုင်သတင်းဌာန KCNA က ပြောပါတယ်။
မြောက်ကိုရီးယားအစိုးရပိုင် ရုပ်မြင်သံကြား KRT ကတော့ သမီးနဲ့အတူရှိနေတဲ့ ကင်မ်ဂျုံအန်းက ဂြိုဟ်တုဖြစ်ပုံရတဲ့ မှုန်ဝါးဝါးအရာတခုရှေ့မှာ တာဝန်ရှိသူတွေနဲ့ စကားပြောဆိုနေတဲ့ ဓာတ်ပုံတွေကို ထုတ်ပြန်ခဲ့ပါတယ်။
မြောက်ကိုရီးယားဟာ ဒီဇင်ဘာလတုန်းက သူလျှိုဂြိုဟ်တုအတွက် အရေးကြီးတဲ့ နောက်ဆုံးအဆင့်ကို စမ်းသပ်ခဲ့တယ်လို့ ပြောပါတယ်။ ဧပြီလမှာ လွှတ်တင်ဖို့ ပြင်ဆင်တာတွေ အပြီးသတ်မယ်လို့လည်း ပြောပါတယ်။
ဂြိုဟ်တုထုတ်လုပ်မှု ပြီးစီးသွားပြီလို့ KCNA က ပြောပေမဲ့ လွှတ်တင်မယ့်ရက်ကို အတိအကျ မဖော်ပြခဲ့ပါဘူး။
