ရခိုင်ပြည်၊ မောင်တောမြို့နယ် မောင်တော-အငူမော်လမ်းရှိ ကျောက်ပန္ဒူနယ်ခြားစောင့် ရဲကင်းစခန်းမှာ ဧပြီ ၁၁ရက် မွန်းလွဲ ၂ နာရီလောက်က တပ်ဖွဲ့ဝင်အချင်းချင်းခိုက်ရန်ဖြစ်ပွားပြီး လက်ပစ်ဗုံး ပစ်ခွဲမှုကြောင့် ၁ ဦး သေဆုံးခဲ့ပြီး ဒုရဲအုပ် ၁ ဦး ခြေထောက်မှာ ဒဏ်ရာ ပြင်းထန်ရရှိခဲ့တယ်လို့ ကျောက်ပန္ဒူနယ်ခြားစောင့်စခန်း တာဝန်ရှိသူတွေဆီက သိရပါတယ်။

"အချင်းချင်း စကားများရန်ဖြစ်ကြတယ်။ ဒုတပ်ကြပ်က လက်ပစ်ဗုံးဖွင့်ပြီးခွဲလိုက်တာ။ တပ်သားတယောက်က ပွဲချင်းပြီး သေဆုံးသွားတယ်။ ဒုရဲအုပ်တဦးက အရေးပေါ်ခြေဖြတ်လိုက်ရတယ်" လို့ ကျောက်ပန္ဒူနယ်ခြားစောင့်စခန်း တာဝန်ရှိသူတဦးက ပြောပါတယ်။

ရဲဒုတပ်ကြပ်မြင့်ဇော်က လက်ပစ်ဗုံးနဲ့ ပစ်ခွဲခဲ့တာကြောင့် ရဲတပ်သားသောင်းဦးဝေ သေဆုံးသွားပြီး ဒု ရဲအုပ် သန်းမျိူးခိုင်က ခြေထောက်မှာ ပြင်းထန်ဒဏ်ရာရခဲ့တာလို့ သိရပါတယ်။

"သေဆုံးသူကိုတော့ ဒီနေ့ မောင်တောဆေးရုံကနေ မောင်တောသုဿန်ကို ပို့ဆောင်သင်္ဂြိုဟ် လိုက်တယ်။ ဒုရဲအုပ်က နခခ ၅ အင်းဒင်စခန်းမှာ ဆေးကုသခံယူနေတယ်။ လက်ပစ်ဗုံးပစ်ဖောက်သူကိုတော့ ပြင်ဖြူစခန်းမှာ ထိန်းသိမ်းထားတယ်" လို့ နယ်ခြားစောင့်စခန်း တာဝန်ရှိသူက ပြောပါတယ်။

၂၀၂၃ ခုနှစ် ဇန်နဝါရီ ၆ ရက်နေ့ကလည်း မောင်တောမြို့နယ်မြောက်ပိုင်း ဒုံးညိုနယ်ခြားစောင့် စခန်းမှာ အချင်းချင်း ဖဲကစားရာမှ ခိုက်ရန်ဖြစ်ပြီး လက်ပစ်ဗုံးကို ဖဲဝိုင်းထည့် ပစ်ထည့်ခဲ့တာကြောင့်  ဒုတပ်ကြပ် သက်ပိုင်ထွန်းနဲ့ ဒုတပ်ကြပ်လင်းလင်းတို့ သေဆုံးပြီး ၅ ဦး ပြင်းထန်ဒဏ်ရာတွေ ရရှိခဲ့တယ်လို့ သိရတယ်။

တနင်္သာရီတိုင်း၊ ကော့သောင်းခရိုင်၊ ခမောက်ကြီးမြို့နယ် ရှမ်းကိုးရွာအုပ်စုရှိ ဝိုင်ဒင်းကျေးရွာမှာ ပြီးခဲ့တဲ့ရက်က တိုက်ပွဲဖြစ်ပွားခဲ့ပြီး စစ်ကောင်စီတပ်သား ၈ ယောက်သေဆုံးကာ ၅၀ လောက် ဒဏ်ရာရတယ်လို့ ကော့သောင်းခရိုင် ပြည်သူ့ကာကွယ်‌ရေးတပ်ရဲ့ ထုတ်ပြန်ချက်အရ သိရပါတယ်။

ဖေဖော်ဝါရီ ၂၁ ရက် မွန်းလွဲ ၁၂ နာရီခွဲလောက်က အဆိုပါ ရှမ်းကိုးရွာအုပ်စုထဲက ဝိုင်းဒင်းကျေးရွာကို စစ်ကောင်စီတပ်က လက်နက်ကြီးပစ်ခတ်ပြီး အင်အား ၁၇ဝ လောက်နဲ့ စစ်ကြောင်းထိုး ဝင်ရောက်လာတာကြောင့် ဒေသတွင်း ပြည်သူ့ကာကွယ်ရေး ပူပေါင်းတပ်ဖွဲ့နဲ့ နှစ်ဖက် အပြန်အလှန် ပစ်ခတ်မှုဖြစ်ပြီး တိုက်ပွဲပြင်းထန်ခဲ့ပါတယ်။

အဲဒီတိုက်ပွဲမှာ ပြည်သူ့ကာကွယ်ရေးပူးပေါင်းတပ်ဖွဲ့ဘက်ကလည်း ရဲဘော် ၂ ဦး ထိခိုက်ဒဏ်ရာရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒေသခံပြည်သူတဦးက “လက်ရှိအခြေအနေကတော့ ငြိမ်သက်နေပါပြီ။ ဝိုင်ဒင်းရွာသားတွေကတော့ ထိုင်းနိုင်ငံဘက်ကို ရှောင်တိမ်းနေရတယ်ဗျာ။ ရွာသားတွေ ထိခိုက်မှုမရှိဘူး။ လောလောဆယ်တော့ ထိုင်းဘက်မှာ တိမ်းရှောင်နေကြတုန်းပဲ” လို့ ပြောပါတယ်။

နှစ်ဖက် အပြန်အလှန် ပစ်ခတ်မှုဖြစ်ပြီးနောက် ညနေ ၃ နာရီခွဲလောက်မှာ စစ်ကောင်စီဘက်က အထိနာပြီး ပြန်လည်ဆုတ်ခွာသွားတယ်လို့ သိရပါတယ်။

ဒါ့အပြင် စစ်ကောင်စီတပ်က လက်နက်ကြီးပစ်ခတ်မှုကြောင့် အဲဒီကျေးရွာက ဒေသခံပြည်သူ အများအပြား ထိုင်းနိုင်ငံ ရနောင်းမြို့ဘက်ကို ထွက်ပြေးတိမ်းရှောင်နေရတယ်လို့ သိရပါတယ်။

ကော့သောင်းခရိုင်၊ ခမောက်ကြီးမြို့နယ်ရှိ ဝိုင်ဒင်းကျေးရွာ၊‌‌ အေးမြမင်္ဂလာ‌ကျေးရွာနဲ့ တပ်ဦးမြိုင်ကျေးရွာတွေကို ကေအန်ယူနဲ့ ပြည်သူ့ကာကွယ်ရေး ပူးပေါင်းတပ်ဖွဲ့တွေ နယ်မြေစိုးမိုးထားနိုင်ပြီးနောက်ပိုင်း အဆိုပါဒေသတွေမှာ စစ်ရေးတင်းမာလာကာ စစ်ကောင်စီဘက်က အင်အားအများအပြားနဲ့ ဝင်ရောက်တိုက်ခိုက်တာတွေ ပြုလုပ်လာတယ်လို့ သိရပါတယ်။