ရှမ်းပြည်နယ်တောင်ပိုင်း မိုးဗြဲမြို့နယ်က  ၆ ရက်တိုက်တာ တိုက်ပွဲအတွင်း စစ်ကောင်စီတပ်သား ၆၀ ကျော်သေဆုံးပြီး အများအပြားဒဏ်ရာရရှိခဲ့တယ်လို့ ကရင်နီအမျိုးသားများကာကွယ်ရေးတပ် (KNDF) က ထုတ်ပြန်ပါတယ်။

မိုးဗြဲမြို့နယ်မှာ ဖေဖော်ဝါရီ ၁၆ ရက်ကစပြီး စစ်ကောင်စီတပ် ထိုးစစ်ဆင်တာကြောင့် ကရင်နီပူးပေါင်းတပ်ဖွဲ့တွေနဲ့ တိုက်ပွဲ ပြင်းထန်နေတာပါ။

စစ်ကောင်စီတပ်က မိုး‌‌ဗြဲမြို့အတွင်းမှာ တပ်စွဲထားပြီး မိုး‌ဗြဲမြို့နဲ့ အနီးတဝိုက် လွယ်ယင်းမင်္ဂလာနဲ့  ဟိုက်ကွီဆည်စစ်ကြောင်း၊ မိုး‌ဗြဲမြို့မစစ်ကြောင်း၊ လွိုင်ကော်ဘုရားဖြူစစ်ကြောင်း စုစုပေါင်း စစ်ကြောင်း ၃ ခုနဲ့ ထိုးစစ်ဆင်နေတာကြောင့် ကရင်နီပူးပေါင်းတပ်နဲ့တိုက်ပွဲဖြစ်ပွားခဲ့တာပါ။

ဖေဖော်ဝါရီ ၁၆ ရက်‌မှ ၂၁ ရက်နေ့အထိ မိုးဗြဲမြို့တိုက်ပွဲအတွင်း အတည်ပြုနိုင်တဲ့ စစ်ကောင်စီတပ်ဘက်က သေဆုံးစာရင်းမှာ ၆၁ ဦးဖြစ်ပြီး အများအပြားထိခိုက်မှုခဲ့ကြောင်းနဲ့ လက်နက်ငယ်တချို့ကို သိမ်းဆည်းရမိခဲ့တယ်လို့  KNDF ထုတ်ပြန်ချက်မှာ ဖော်ပြထားပါတယ်။

တိုက်ပွဲအတွင်း စစ်ကောင်စီတပ်ဘက်က တိုက်လေယာဥ်တွေ၊  သံချပ်ကာ အမြောက်ကားတွေအပြင် တာဝေးပစ်လက်နက်ကြီးနဲ့ တိုက်ခိုက်ခဲ့ပါတယ်။

ဇန်နဝါရီ ၁၆ ရက်မှ ၂၁ ရက်နေ့အထိ တိုက်လေယာဥ်၊  ရဟတ်ယာဥ်နဲ့ လေကြောင်းတိုက်ခိုက်မှု  ၂၁ ကြိမ်ပြုလုပ်ခဲ့သလို   မိုး‌ဗြဲအခြေစိုက် ခမရ-၄၂၂၊ လွိုင်ကော်အခြေစိုက် ခလရ-၂၅၀နဲ့ ခလရ -၂၆၁၊ ဒီးမော့ဆိုမြို့နယ် အခြေစိုက် ခမရ - ၄၂၇ တို့က တာဝေးပစ် ၁၂၀ မမ၊ ၈၀ မမ အမြောက်တွေနဲ့ တစ်နေ့ကို အကြိမ် ၁၀၀ လောက် ပစ်ခတ်ခဲ့တယ်လို့ ဖော်ပြပါတယ်။

ဒါ့အပြင် မိုးဗြဲမြို့  ဝါရီဆူးဖလိုင် တိုက်ပွဲအတွင်း  ဖေဖော်ဝါရီ ၁၇ ရက်က စစ်ကောင်စီရဲ့ သံချပ် ကာကား ၂ စီးနဲ့ ၁၉ ရက်‌မှာလည်း  လက်နက်ခဲယမ်းထောက်ပို့ကား ၃ စီးကို ကရင်နီ ပူးပေါင်းတပ်ဖွဲ့တွေက တိုက်ခိုက်မီးရှို့ဖျက်ဆီးနိုင်ခဲ့တယ်လို့ ဆိုပါတယ်။

မိုးဗြဲမြို့နဲ့ ဝါရီဆူးဖလိုင်ကျေးရွာတိုက်ပွဲအတွင်း စစ်ကောင်စီတပ်က ဝါရီဆူးဖလိုင်နဲ့ ဝီသဲကူးကျေးရွာတွေက နေအိမ်တွေကို မီးရှို့ဖျက်ဆီးခဲ့သလို ဝါရီဆူးဖလိုင် ရွာသားတချို့ကိုလည်း ဖမ်းဆီးပြီး လူသားဒိုင်းအဖြစ်အသုံးပြုခဲ့တယ်လို့ KNDF ထုတ်ပြန်ချက်မှာ ဖော်ပြပါတယ်။

ဒါ့အပြင် စစ်ကောင်စီဘက်က မိုး‌‌ဗြဲမြို့နဲ့ အနီးတဝိုက် ကျေးရွာတွေကို လက်နက်ကြီးတွေနဲ့ ပစ်ခတ်ခဲ့တာကြောင့် အရပ်သားပြည်သူ  ၁၀ ဦးထက်မနည်း သေဆုံးခဲ့တယ်လို့ ဆိုပါတယ်။

တိုက်ပွဲအတွင်း KNDF ရဲဘော် ၈ ဦးနဲ့ ပြည်သူ့ကာကွယ်ရေးမဟာမိတ်တပ်ဖွဲ့ဝင်ရဲဘော်တချို့ ကျဆုံးခဲ့ရကြောင်းလည်း ဖော်ပြထားပါတယ်။

ထိုင်းနိုင်ငံ၊ တာ့ခ်ခရိုင်ထဲကို မြန်မာစစ်ကောင်စီတပ်ဘက်က ပစ်ခတ်လိုက်တဲ့ လက်နက်ကျည်တွေ ကျရောက်ပြီးနောက်  နယ်စပ်မှာ ထိုင်းစစ်တပ်က သံချပ်ကာကားတွေနဲ့ လုံခြုံရေး အသင့်ပြင်ထားပါတယ်။ 

မဲဆောက်နဲ့ မျက်နှာချင်းဆိုင် ကရင်ပြည်နယ် မြဝတီမြို့နယ်ထဲမှာ ကေအန်ယူ ပူးပေါင်းတပ်တွေနဲ့ စစ်ကောင်စီတပ်တွေကြား တိုက်ပွဲဖြစ်ပြီး လက်နက်ကျည်တွေဟာ ဒီမနက်မှာတော့ ထိုင်းဘက်ခြမ်းကို ကျရောက်လာတာ ဖြစ်ပါတယ်။

အဆိုပါနေရာကို အမှတ် ၃၄၆ နယ်ခြားစောင့်ရဲတပ်ဖွဲ့က သွားရောက်စစ်ဆေးရာမှာ တာ့ခ်ခရိုင် ဖုပ်ဖရမြို့နယ် မော်လ်ချိုင်းကျေးရွာထဲကို RPG လက်နက်ကြီး ၅ ကြိမ်ကျ ရောက်ခဲ့ကြောင်း၊ ထိုင်းရွာသားပိုင်နေအိမ်တစ်လုံး ခေါင်မိုးပေါက်သွားပြီး အိမ်ပရိဘောဂ ပစ္စည်းပျက်စီးကာ ထိခိုက်ဒဏ်ရာရသူတော့ မရှိဘူးလို့  AEC အာဆီ ယံ ထိုင်းသတင်းမှာ ဖော်ပြပါတယ်။ 

မြန်မာဘက်ခြမ်းက လက်နက်ကျည်ကျလာတဲ့နေရာဟာ နှစ်နိုင်ငံနယ်နိမိတ်နဲ့ မီတာ ၁၀၀ ကျော် ၂၀၀ ခန့်အကွာသာ ကွာဝေးတာကြောင့် အနီးအနားနေရွာသားတွေကို နယ်ခြားစောင့်တပ်က သတိနဲ့နေဖို့မှာကြားထားပြီး အမှတ်၃၄ ထိုင်းနယ်ခြားစောင့်တပ်ကလည်း V-150 အမျိုးအစား သံချပ်ကာကား ၂ စီးနဲ့အတူ မဲဆောက်မြို့နယ်ထဲမှာ လုံခြုံရေးအင်အားလာရောက်ဖြည့်တင်းထားတယ်လို့  သတင်းမှာဖော်ပြပါတယ်။ 

မဲဆောက်မြို့ မြန်မာ-ထိုင်းချစ်ကြည်ရေး အမှတ်(၁)တံတား တောင်ဘက်ကစပြီး ထိုင်းနိုင်ငံ မဟာဝမ်းတိုက်နယ်အထိ ထိုင်းနယ်စပ်ရဲဗိုလ်မှူး သြလချိုင်းအောင်းဆင်စုံဘွန်း ဦးဆောင်တဲ့ အမှတ်(၃၄၆)ထိုင်းနယ်စပ်ရဲနဲ့ ဗိုလ်မှူး အက်ကဖုန်း လုထောင်း ဦးဆောင်တဲ့ အမှတ် (၃၄၅)ထိုင်းနယ်စပ်ရဲတပ်ဖွဲ့ နှစ်ခုပူးပေါင်းပြီး နယ်စပ်ကို ကာကွယ်ဖို့ သံချပ်ကာ စစ်ကား(V -150)  ၂ စီးနဲ့ စတင်လှည့်ကင်းနေတာဖြစ်ပါတယ်။ 

ဒီမတိုင်ခင် ပြီးခဲ့တဲ့ ဒီဇင်ဘာ ၁၉ ရက်ကလည်း မဲဆောက်မြို့နယ် မယ်တောင်းအုပ်စု ဒွန်းချိုင်းကျေးရွာရှိ ထိုင်းရွာသားပိုင်စိုက်ခင်းတွေထဲ လက်နက်ကျည် ၇ ကြိမ်လောက်ကျရောက်ပြီး ကြံခင်းတွေ မီးလောင်သွားလို့ ထိုင်းစစ်တပ်က မီးခိုးငွေ့ ကျည် ၅ ချက်ဖောက်ပြီး သတိ ပေးခဲ့ပါသေးတယ်။ 

စစ်ကောင်စီတပ်တွေဟာ ခုရက်ပိုင်းအတွင်း ကေအန်ယူကို လေယာဉ်တွေပါအသုံးပြုပြီး တိုက်ခိုက် ဗုံးကြဲခဲ့ပါတယ်။ ဒီကိစ္စနဲ့ပတ်သက်ပြီး ထိုင်းလေတပ်ဗိုလ်ချုပ်ကြီး နာ့ဖားတေ ထူပတေမီး ကတော့ မြန်မာစစ်တပ်လေယာဉ်တွေဟာ ထိုင်းပိုင်နက်ထဲ ဝင်ရောက်လာခြင်းမရှိသေးကြောင်း၊ ထိုင်းလေတပ်အနေနဲ့ မြန်မာ့ပြည်တွင်းရေးကိစ္စကို ဝင်ရောက်စွက်ဖက်မှာမဟုတ်ဘဲ မိမိနိုင်ငံ ပိုင်နက်ကိုတော့ အတတ်နိုင်ဆုံး ကာကွယ်စောင့်ရှောက်သွားမယ်လို့ သတင်းထောက်တွေကို ပြောကြောင်း ဘန်ကောက်ပို့စ်သတင်းမှာ ဖော်ပြပါတယ်။

တချိန်တည်းမှာပဲ  ကရင်ပြည်နယ်  ဘားအံမြို့ကနေ  မြဝတီမြို့ဘက်ကို စစ်ကောင်စီတပ်တွေက စစ်ကားကြီးတွေနဲ့ စစ်အင်အားဖြည့်တင်းဖို့ လာနေတယ်လို့လည်း သတင်းတွေ    ထွက်ပေါ်နေပါတယ်။