နောက်ဆုံးကျန်ရှိတဲ့ သမ္မတ သက်တမ်းအတွင်း မြောက်ကိုရီးယားနဲ့ သံတမန်ရေးအောင်မြင်မှုရဖို့ အင်တိုက်အားတိုက်ဆောင်ရွက်သွားမယ်လို့ တောင်ကိုရီးယား သမ္မတ မွန်ဂျေအင်းက ဇန်နဝါရီ ၃ ရက်မှာ ကတိပြုလိုက်ပါတယ်။

တောင်နဲ့မြောက် ကိုရီးယား နှစ်နိုင်ငံအကြား ငြိမ်းချမ်းရေး ကြေညာဖို့  အားထုတ်မှုတွေအပေါ် မြောက်ကိုရီးယားအစိုးရဘက်က လူသိထင်ရှား နှုတ်ဆိတ်နေပေမယ့် မွန်က ခုလို ကတိပြုလိုက်တာပါ။

တောင်ကိုရီးယား အစိုးရအနေနဲ့ ကိုရီးယားနှစ်နိုင်ငံအကြား ဆက်ဆံရေး ပုံမှန်ပြန်ဖြစ်အောင် လုပ်ပြီး ငြိမ်းချမ်းရေးအတွက် နောက်ကြောင်းပြန်လို့ မရလောက်တဲ့ လမ်းကြောင်းကို အဆုံးစွန်ထိ လုပ်ဆောင်သွားမယ်၊ နောက်အစိုးရ လက်ထက်မှာလည်း ဆွေးနွေးဖို့ ဆက်အားထုတ်ကြလိမ့်မယ် မျှော်လင့်တယ်လို့ မွန်က နှစ်သစ်မိန့်ခွန်းအတွင်း ပြောပါတယ်။

ဒါဟာ မေလမှာ ကုန်ဆုံးမယ့် ငါးနှစ်တာ သမ္မတ သက်တမ်းအတွင်း နောက်ဆုံး ပြောရတဲ့ နှစ်သစ်မိန့်ခွန်းလည်း ဖြစ်ပါတယ်။

မြောက်ကိုရီးယား ခေါင်းဆောင် ကင်မ်ဂျွန်အန်းကတော့ သူ့ရဲ့ နှစ်သစ်ကူးအကြိုည မိန့်ခွန်းထဲမှာ မွန်ဂျေအင်းရဲ့ ကိုရီးယားစစ်ပွဲ တရားဝင် အဆုံးသတ်ရေး ဆော်ဩချက်ကိုရော အမေရိကန်နဲ့ နျူကလီးယား ဖြုတ်သိမ်းရေး ဆွေးနွေးပွဲအကြောင်းကိုပါ ရည်ညွှန်း မသွားခဲ့ပါဘူး။ 

မွန်ဂျေအင်းဟာ ၂၀၁၈ နဲ့ ၂၀၁၉ မှာ ကင်မ်နဲ့ ထိပ်သီးညီလာခံ ကျင်းပခဲ့သူပါ။ 

မြောက်ကိုရီးယားကို နျူကလီးယား လက်နက်တိုက် စွန့်လွှတ်အညံ့ခံဖို့ နိုင်ငံတကာက တောင်းဆိုနေပြီး မြောက်ကိုရီးယား အစိုးရကလည်း အမေရိကန်နဲ့ တောင်ကိုရီးယားက ရန်လိုတဲ့ မူဝါဒတွေကို ဖယ်ရှားပြီး ဒဏ်ခတ်တာ ဖြေလျှော့ပေးဖို့ ဆော်ဩထားလို့ သဘောမတူနိုင် ဖြစ်နေကြတဲ့အတွက် ဆွေးနွေးပွဲတွေ ရပ်တံ့နေပါတယ်။