ကရင်ပြည်နယ်၊ သံတောင်ကြီးမြို့နယ်မှာ ဒေသခံတချို့ မိုင်းအန္တရာယ်နဲ့ ရင်ဆိုင်နေရပြီး မိုင်းနင်းမိတဲ့ ဒေသခံအများစုက ဆင်းရဲနွမ်းပါးကြတာကြောင့် ဆေးဝါးကုသဖို့ အလှူငွေ အရေးပေါ် လိုအပ်နေတယ်လို့ သိရပါတယ်။
ဖေဖော်ဝါရီ ၉ ရက်က သံတောင်ကြီးမြို့နယ်၊ သပြေညွန့်ကျေးရွာသူ မဝင်းမာဟာ တောထဲ ထင်းသွားခုတ်ရင်း မိုင်းနင်းမိခဲ့ရာကနေ ဘယ်ခြေတဖက် ပြင်းထန်တဲ့ ဒဏ်ရာကြောင့် ဖြတ်ခဲ့ရပြီး ယာပေါင်နဲ့ ယာလက်တွေကအစ မိုင်းယမ်းမှုန့် ထိမှန်ဒဏ်ရာတွေနဲ့ လမ်းကူးဆေးရုံမှာ ဆေးကုသမှု ခံယူနေရပါတယ်။
၂၀၂၂ ခုနှစ် ၁၀ လပိုင်းကလည်း မဝင်းမာရဲ့ အမျိုးသားဖြစ်သူ စောတီးတီဟာလည်း ခြံသွားရင်း မိုင်းနင်းမိလို့ နေပြည်တော်ဆေးရုံအထိ သွားရောက် ဆေးကုသမှာ ခံယူခဲ့ရပါတယ်။
စောတီးတီတော့ ပြင်းထန်ဒဏ်ရာအခြေအနေ မဟုတ်တဲ့အတွက် ယာခြေမပဲ ဖြတ်ခဲ့ရပါတယ်လို့ အနီးကပ် ကူညီပေးသူက ပြောပါတယ်။
မ၀င်းမာက "ကလေးတဖက် စားဝတ်နေရေးတဖက် မိသားစုအရေး ရုန်းကန်နေရတဲ့အချိန် အခုလိုဝေဒနာပြင်းထန်စွာ ခံစားနေရတော့ ၀င်ငွေလည်း မရှိတော့ဘူး။ ယောက်ျားလည်း အရင်က မိုင်းထိထားတော့ ပင်ပန်းတဲ့အလုပ် သိပ်မလုပ်နိုင်တော့ဘူး။ ဆေးကုသဖို့ ဆေးဖိုးဝါးခလည်း လိုအပ်နေတယ်" လို့ ပြောပါတယ်။
မြန်မာပြည်တွင်းမှာ နှစ်ပေါင်း ၇၀ ကျော်ကြာ ပြည်တွင်းစစ်မှာ မြေမြှုပ်မိုင်းတွေကြောင့် တိုင်းရင်းသားဒေသတွေမှာ ဒေသခံတွေ မကြာခဏမိုင်းနင်းမိလို့ ထိခိုက်ဒဏ်ရာရတာ သေဆုံးတာတွေရှိခဲ့ပြီး စစ်အာဏာသိမ်းပြီးနောက်မှာလည်း မြေမြှုပ်မိုင်းထိသူတွေ ပိုမိုများပြားလာပါတယ်။
ကရင်ပြည်နယ်၊ သံတောင်မြို့နယ်၊ ၁၆ မိုင်ရေပူစခန်းအောက် (သံတောင်-သံတောင်ကြီး) ကားလမ်းဘေးမှာ ဘုရင့်နောင်တပ်နယ်မှူးလိုက်ပါလာတဲ့ကားကို ဇူလိုင် ၇ ရက် ညနေ ၃ နာရီလောက်က စောင့်ပြီးတိုက်ခိုက်ခဲ့တယ်လို့ သံတောင် ပြည်သူ့ကာကွယ်ရေးတပ်ဖွဲ့(PDF)က ပြောပါတယ်။
အဆိုပါတိုက်ခိုက်မှုမှာ စစ်ကောင်စီရဲ့ တပ်ကြပ်အဆင့်အပါအဝင်တပ်ဖွဲ့ဝင် ခြောက်ယောက် သေဆုံးခဲ့တယ်လို သံတောင်ပြည်သူ့ကာကွယ်ရေးတပ်ဖွဲ့တာဝန်ရှိသူကပြောပါတယ်။
“တပ်နယ်မှူးကားကို စောင့်ဆိုင်းပြီးတိုက်ခိုက်ခဲ့တာ။ သူတို့က လမ်းကင်းတောင်မချဘူး။ လမ်းကင်းချရင် အများသိမှာစိုးလို့။ သူများမသိအောင် လစ်ရင်လစ်သလိုသွားတယ်။ ကျနော်တို့ပစ်ခတ်ပြီးတော့ ပြန်မဆင်းရဲတော့ ညမိုးချုပ်မှ ပြန်ဆင်းလာတယ်။ တပ်တွင်းသတင်း ရင်းမြစ်ဆီက ခြောက်ယောက်သေတယ်လို့ သိရတာ။ ဒီနေ့မှ သတင်းတိတိကျကျရတယ်။”
ပြီးခဲ့တဲ့ မတ် ၈ ရက်ကလည်း သံတောင်ကြီးမြို့နယ် သောက်ရေခပ်ကျေးရွာနဲ့ သကွဲပလိုကျေးရွာအကြားမှာ စစ်ကောင်စီရဲ့ လစာနဲ့ရိက္ခာပို့ စစ်ယာဉ်တန်းကား ၅ စီးဟာ အမည်မသိလက်နက်ကိုင်အဖွဲ့ရဲ့ ကြားဖြတ်တိုက်ခံခဲ့ရပြီး စစ်ကောင်စီတပ်ဖွဲ့ဝင် ၃ ဦးသေဆုံးပြီး အများအပြားထိခိုက်ဒဏ်ရာရရှိခဲ့ပါတယ်။
စစ်ယာဉ်တန်း ကြားဖြတ်တိုက်ခိုက်ခံရပြီးနောက် စစ်ကောင်စီတပ်တွေဟာ ကဆောပလို အောက်ကျေးရွာအတွင်းဝင်ရောက်ပြီး ဒေသခံရွာသားတယောက်ကို ပစ်သတ်ခဲ့သလို ကက်သလစ်ဘုရား ကျောင်းပိုင်ဆိုင်ပစ္စည်းတွေနဲ့ နေအိမ် ၃ လုံးကို မီးရှို့ဖျက်ဆီးခဲ့ပါတယ်။
စစ်ကောင်စီရဲ့ အရာရှိအပါအဝင် စစ်သားနဲ့ ရဲတပ်ဖွဲ့ဝင်တွေဟာ သံတောင်ပြည်သူ့ ကာကွယ်ရေးအဖွဲ့ရဲ့ စနိုက်ပါနဲ့ ပစ်ခတ်ခံရတာ၊ စောင့်ဆိုင်းပစ်ခတ်ခံရတဲ့အတွက် သေဆုံးသူတွေရှိ ခဲ့သလို ပြည်သူတွေအနေနဲ့ စစ်ကောင်စီတပ်တွေနဲ့ အဝေးကနေ ရှောင်နေပေးဖို့ သတိပေးထားပါတယ်။
