ကရင်ပြည်နယ်၊ သံတောင်မြို့တွင်းကို စစ်ကောင်စီတပ်စခန်းကနေ ဧပြီ ၂၅ ရက် ည ၇ နာရီလောက်က လက်နက်ကြီးအပြင် လက်နက်ငယ်တွေနဲ့ပါ ပစ်ခတ်ခဲ့တဲ့အတွက် ဒေသခံပြည်သူတဦး ထိမှန်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။

စစ်ကောင်စီရဲ့ တပ်စခန်း၊ တောင်ငူ-သံတောင်သွား ကားလမ်းဘေးက ၇ မိုင် တပ်စခန်းက တိုက်ပွဲဖြစ်ပွားတာမရှိဘဲ အခုလို ပစ်ခတ်ခဲ့တဲ့အတွက် အမှတ် ၂ ရပ်ကွက်မှာ နေထိုင်တဲ့ အသက် ၆၀ အရွယ် အဘွားတဦး လက်နက်ကြီး ထိမှန်ခဲ့တာပါ။

ပဲခူးတိုင်း ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-s) အရပ်သားကိုယ်စားလှယ် ဦးစောဒီထူးက “အခြေအနေကတော့ လက်နက်ကြီးဒဏ်ကြောင့် အဘွားကြီးတယောက်တော့ ထိသွားတယ်။ အခု တောင်ငူကိုတော့ ပို့လိုက်ပြီ။ လက်နက်ကြီးအစ မှန်သွားတယ်” လို့ ပြောပါတယ်။

တိုက်ပွဲဖြစ်ပွားတာမရှိဘဲ စစ်ကောင်စီတပ်ဘက်က ဘာ သတင်းအချက်အလက် ကြောင့်ဆိုတာ မသိရပေမဲ့ လက်နက်ငယ်တွေနဲ့ ပစ်ခတ်ခဲ့သလို မြို့ပြင်ဘက်ကို လက်နက်ကြီးတွေနဲ့ပါ လှမ်းပစ်တာတွေ ရှိတယ်လို့လည်း ဆိုပါတယ်။

ပြီးခဲ့တဲ့ ဇန်နဝါရီ ၂၇ ရက် မနက် ၉ နာရီလောက်ကစတင်ပြီး စစ်ကောင်စီတပ်နဲ့ အမည်မသိ လက်နက်ကိုင်အဖွဲ့တွေကြား နှစ်ဖက်တိုက်ပွဲဖြစ်ခဲ့ပြီးနောက် နေ့တိုင်း စစ်ကောင်စီတပ်စခန်းတွေကနေ လက်နက်ကြီး ပစ်ခတ်နေတဲ့အတွက် ဒေသခံပြည်သူ ၈,၀၀၀ ကျော်ဟာ ဒီကနေ့အထိ ထွက်ပြေးတိမ်းရှောင်နေရပါတယ်။

စစ်ကောင်စီတပ်ပိုင်းဆိုင်ရာနဲ့ အုပ်ချုပ်ရေး၊ မြို့မိမြို့ဖ၊ ဘာသာရေးခေါင်းဆောင်တွေ တွေ့ဆုံညှိနှိုင်းမှုတွေနဲ့ မြို့ခံပြည်သူတချို့ ပြန်လည်နေထိုင်တာတွေရှိသလို နယ်မြေတည်ငြိမ်မှ အိမ်လုံးကျွတ်ပြန်လာဖို့ လုပ်ဆောင်နေတုန်း အခုလိုပစ်ခတ်မှုတွေကြောင့် ပြန်လာဖို့ တုံ့ဆိုင်းသွားနိုင်တယ်လို့ အရပ်သားကိုယ်စားလှယ်က ပြောပါတယ်။

ဧပြီ ၂၄ ရက် မနက်ပိုင်းကလည်း သံတောင်ကြီးမြို့နယ် သံမိုတောင်ကျေးရွာအနီးမှာ စစ်ကောင်စီတပ်ဖွဲ့တွေနဲ့ KNLA ပူးပေါင်းတပ်တို့ တိုက်ပွဲဖြစ်ပွားခဲ့တယ်လို့ ဒေသခံတွေဆီက သိရပါတယ်။

ကရင်ပြည်နယ်၊ သံတောင်မြို့ (၁၃ မိုင်)မှာ ပြီးခဲ့တဲ့တစ်ပတ်အတွင်း စစ်ကောင်စီတပ်နဲ့ ဒေသခံ လက်နက်ကိုင်ပူးပေါင်းတပ်ဖွဲ့တွေအကြား တိုက်ပွဲဖြစ်ပွားနေပြီး စစ်ကောင်စီတပ်တွေက မြို့ထဲမှာရှိတဲ့ ဒေသခံတွေကို ဖမ်းဆီးနေသလို လက်နက်ကြီး လက်နက်ငယ်တွေနဲ့ ပစ်ခတ်၊ နေအိမ်တွေကိုလည်း မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။

တစ်ပတ်အတွင်း မြို့ထဲကို လက်နက်ကြီး အလုံး ၄၀ လောက် ပစ်ခတ်ခဲ့ပြီး ဘာသာရေးအဆောက်အအုံတွေအပြင် လူနေရပ်ကွက်တွေထဲကိုလည်း လက်နက်ကြီး ကျရောက်ခဲ့ကာ လူနေအိမ်တွေလည်း ပျက်စီးဆုံးရှုံးခဲ့တယ်လို့ ရပ်ကွက်နေသူ တဦးက ပြောပါတယ်။

ဒါ့အပြင် ဖေဖော်ဝါရီလ ၅ ရက်ကစပြီး လူနေအိမ်တွေကို မီးရှို့ဖျက်ဆီးလို့ လူနေအိမ် ၄ လုံးမီးလောင်ဆုံးရှုံးခဲ့ပါတယ်။

စစ်ကောင်စီတပ်က သံတောင်မြို့ပေါ်မှာလည်း လုံခြုံရေး တင်းကျပ်ထားပြီး လမ်းသွားလမ်းလာတွေကို စစ်ဆေးမေးမြန်းနေသလို ဖမ်းဆီးရိုက်နှက် နှိပ်စက်နေတယ်လို့ ဒေသခံတွေက ပြောပါတယ်။

ဒေသခံ တဦးက "သူတို့က တွေ့ရင် ဖမ်းတယ်။ မေးတယ်။ ရိုက်တယ်။ ဖုန်းတွေလည်း ရိုက်ခွဲတယ်။ အကြောင်းပြချက်မရှိဘဲ ကျောကုန်းတွေ ရိုက်တယ်။ ကေအန်ယူ လူကြီးတွေရဲ့ နာမည်တွေ မေးတယ်။ ဓာတ်ပုံတွေပြမေးတယ်။ သူတို့ ဘယ်ရွာမှာနေလဲ သူတို့အိမ် ဘယ်မှာလဲ။ ပြီးတော့ PDF တွေနဲ့ပတ်သက်တယ်မလား။ PDF တွေကို ထောက်ပို့တွေ လုပ်ပေးတယ်မလား။ နင် PDF ထဲ ပါတယ်မလား မေးတယ်" လို့ ဆိုပါတယ်။

ကရင်အမျိုးသားအစည်းအရုံး (ကေအန်ယူ) တောင်ငူခရိုင် သံတောင်မြို့နယ် တာဝန်ရှိသူတွေရဲ့ နေအိမ်တွေကို စစ်ကောင်စီက ဇန်နဝါရီလ ၄ ရက်ညနေ ၃ နာရီလောက်က  မီးရှို့ဖျက်ဆီးခဲ့တယ်လို့ မြို့ခံ တဦးက ပြောပါတယ်။

“ရှို့တာက စကစ တပ်က ရှို့တာ။ မီးလောင်သွားတာက ကေအန်ယူ သံတောင်မြို့နယ် မြို့နယ်မှူးအိမ်နဲ့၊ တပ်မတော်(ကေအန်ယူအရာရှိ) အိမ် ၂ အိမ် အပါအဝင် ဒေသခံအိမ် ၈ လုံး မီးလောင်ပျက်စီးသွားတယ်။”

အဆိုပါ မီးရှို့မှုမတိုင်ခင် ဖေဖော်ဝါရီလ ၄ ရက် မနက်ပိုင်းကလည်း စစ်ကြောင်းထိုးလာတဲ့ စစ်ကောင်စီကားကို ဒေသပြည်သူ့ကာကွယ်ရေးတပ်တွေက တိုက်ခိုက်ခဲ့လို့  စစ်ကား ၃ စီးပျက်ပြီး စစ်ကောင်စီတပ်သား ၃၀ လောက် ထိခိုက်သေဆုံးမှုရှိခဲ့တယ်လို့လည်း သူက ပြောပါတယ်။

ဒေသခံပူးပေါင်းတပ်ဖွဲ့တွေက စစ်ကောင်စီစစ်ကြောင်းကို မိုင်းဆွဲတိုက်ခိုက်တာ၊ စနိုက်ပါနဲ့ လာရောက်ပစ်ခတ်တာတွေရှိတာကြောင့် စစ်ကောင်စီအနေနဲ့အထိနာလာနေတဲ့အတွက် အခုလို ဖမ်းဆီးနှိပ်စက်တာလို့ ဒေသခံတွေက ဆိုပါတယ်။

လတ်တလော သံတောင်မြို့တွင်းမှာ နေတဲ့ ဒေသခံ ၃၀၀၀ ကျော်က နီးစပ်ရာ နေရာတွေကို ထွက်ပြေးနေရတယ်လို့လည်း သိရပါတယ်။