ရုရှားနိုင်ငံမှာ ကွန်ပြူတာဟက်ခ်ကာတွေရဲ့လက်ချက်နဲ့ နိုင်ငံအရှေ့ပိုင်းမှာ နေထိုင်ကြသူတွေရဲ့ ရုပ်မြင်သံကြားနဲ့ ရေဒီယိုတွေမှာ နျူးကလီးယား တိုက်ခိုက်ခံလိုက်ရပြီဆိုတဲ့ သတိပေးချက်အတုတွေ ထုတ်လွှင့်သွားခဲ့လို့ ပြည်သူတွေ အထိတ်တလန့် ဖြစ်ခဲ့ကြရပါတယ်။

သီတင်းနှစ်ပတ်ကျော်ကာလမှာတင် ရုရှားနိုင်ငံတွင်း မီဒီယာဌာနတွေကတဆင့် ဒီလို အလိမ်အညာ သတိပေးချက်တွေကို  ၃ ကြိမ်မြောက် ထုတ်လွှင့်ခဲ့တာပါ။

ဖေဖော်ဝါရီလ ၂၂ ရက်နေ့တုန်းကလည်း အရပ်ဘက်ကာကွယ်ရေးဆိုင်ရာ အချက်ပေးသံအတုနဲ့အတူ လေကြောင်းတိုက်ခိုက်မှု သတိပေးချက် အသက်ဝင်ပြီဖြစ်ကြောင်း ထုတ်လွှင့်ဖော်ပြခဲ့သလို ဖေဖော်ဝါရီလ ၂၈ ရက်နေ့မှာလည်း “ဒုံးကျည်ဆိုင်ရာ ခြိမ်းခြောက်မှု” တခု ရှိတယ်ဆိုပြီး တီဗီနဲ့ ရေဒီယိုတွေမှာ ပေါ်ပေါက်လာခဲ့ပါတယ်။

ဒီတခေါက် စာသားထဲမှာတော့ ဓာတ်ရောင်ခြည်သင့်နိုင်မယ့် အရေးပေါ်အခြေအနေတွေမှာ အသုံးပြုလေ့ရှိတဲ့ ပိုတက်စီယမ်အိုင်အိုဒိုက် ဆေးပြားတွေကို သောက်သုံးထားဖို့ ညွှန်ကြားချက်တခုနဲ့အတူ ကြောက်မက်ဖွယ်ကောင်းလောက်အောင် အသေးစိတ် ဖော်ပြခဲ့တာပါ။

ရုပ်မြင်သံကြား ကြည့်နေကြသူတွေဟာ ရုရှားမြေပုံက အနောက်ကနေ အရှေ့ကို တဖြည်းဖြည်း အနီရောင်ပြောင်းသွားတာကို မြင်တွေ့ခဲ့ရပြီး လက်ရှိမှာ တိုက်ခိုက်မှုတခု ဖြစ်ပွားခဲ့တဲ့အတွက် ခိုလှုံနိုင်မယ့်နေရာတခုကို ချက်ချင်းသွားကြဖို့ ပြောဆိုခဲ့တာ ဖြစ်ပါတယ်။

အဆောက်အဦ မျက်နှာစာတွေကို အလုံပိတ်ထားဖို့နဲ့ ဓာတ်ငွေ့မျက်နှာဖုံး အမျိုးအစား အားလုံးကို အသုံးပြုဖို့အပြင် ဓာတ်ငွေ့မျက်နှာဖုံးမရှိခဲ့ရင် ချည်ပိတ်သားပတ်တီးတွေကို အသုံးပြုဖို့ ကြေညာခဲ့သလို တီဗီဖန်သားပြင်မှာလည်း အမည်းရောင်နဲ့ အနီရောင်ပါ ဓာတ်ရောင်ခြည်သတိပေး သင်္ကေတနဲ့အတူ ခိုလှုံနိုင်မယ့်နေရာတွေကို လူအယောက်စီတိုင်း ချက်ချင်းသွားကြဖို့ သတိပေးခဲ့တာ ဖြစ်ပါတယ်။

သတင်းဖော်ပြချက်တွေအရ ဒီလိုရုပ်ပုံတွေဟာ ရုရှားနိုင်ငံရဲ့ စတုတ္ထအကြီးဆုံးမြို့တခုဖြစ်တဲ့ ရေကတ်တီရင်ဘတ်မြို့ အပါအဝင် မော်စကိုနဲ့ ဆဲလ်ဒလော့ဗ်ဒေသတွေက တီဗီနဲ့ ရေဒီယိုအစီအစဉ်တွေမှာ အနှောင့်အယှက်ပေး ဝင်ရောက်လာခဲ့တာဖြစ်တယ်လို့ သိရပါတယ်။

ရုရှားအရေးပေါ်အခြေအနေဆိုင်ရာ ဝန်ကြီးဌာနကတော့ “တီဗီချန်နယ်တွေနဲ့ ရေဒီယိုဌာနတွေရဲ့ ဆာဗာကို ဟက်ခ်ခံခဲ့ရပြီးနောက် မှားယွင်းတဲ့ လေကြောင်းတိုက်ခိုက်မှု ဆိုင်ရာ သတိပေးချက်ကို မော်စကိုမှာ ထုတ်လွှင့်သွားခဲ့တာ” ဖြစ်ကြောင်း အတည်ပြု ပြောကြားပါတယ်။

ဒီလို သတိပေးချက်အတုတွေဟာ ပြီးခဲ့တဲ့လက ပထမဆုံး ပေါ်ပေါက်လာခဲ့တာဖြစ်ပြီး ပြီးခဲ့တဲ့နှစ် ဖေဖော်ဝါရီလမှာ ယူကရိန်းအပေါ် ရုရှား စတင်ကျူးကျော်စဉ်ကတည်းက ဒီလို ဆိုက်ဘာတိုက်ခိုက်မှုတွေ ပုံမှန်ဖြစ်ပွားနေခဲ့တယ်လို့လည်း သိရပါတယ်။

ပထမဆုံး သတိပေးချက်အတု မထုတ်လွှင့်ခင်ကလည်း ရုရှားသမ္မတ ဗလာဒီမာပူတင်ရဲ့  နိုင်ငံတော်မိန့်ခွန်းမှာ အင်တာနက်ပြတ်တောက်သွားအောင် ဟက်ခ်ကာတွေက တိုက်ရိုက်ထုတ်လွှင့်မှုဆိုင်ရာ ဝန်ဆောင်မှုတွေကို တိုက်ခိုက်ခဲ့ပါသေးတယ်။

ပူတင်ရဲ့မိန့်ခွန်းအတွင်း ရုရှားနိုင်ငံပိုင် ရုပ်မြင်သံကြားနဲ့ ရေဒီယိုထုတ်လွှင့်မှုဆိုင်ရာ ကုမ္ပဏီတခုဖြစ်တဲ့ VGTRK ရဲ့ မီဒီယာဌာနတွေကို ပစ်မှတ်ထား တိုက်ခိုက်ခဲ့တာပါ။

ရုရှားကျူးကျော်စစ် စတင်အပြီး မကြာခင်မှာ ဖွဲ့စည်းခဲ့တဲ့ ယူကရိန်း သတင်းအချက်အလက် နည်းပညာဆိုင်ရာ တပ်ဖွဲ့က ဒါတွေကို လုပ်ဆောင်ခဲ့တာဖြစ်ကြောင်း အခိုင်အမာ ပြောလာပါတယ်။ ဒါပေမဲ့ အခုလို တီဗီနဲ့ ရေဒီယိုတွေကို ဟက်ခ်ရာမှာ နောက်ကွယ်က ဘယ်သူပါဝင်နေလဲ ဆိုတာကိုတော့ အရိပ်အမြွက်ပြောကြားခြင်း မရှိသေးပါဘူး။