မန်ယူအသင်းကခေါ်ယူဖို့ ပစ်မှတ်ထားတဲ့ တိုက်စစ်မှူးဟယ်ရီကိန်းကို ပေါင်သန်း ၁၀၀ ရရှိမှ စပါးအသင်းက ရောင်းချမယ်လို့သိရပါတယ်။
အင်္ဂလန်အသင်းခေါင်းဆောင်ကိန်းဟာ လာမယ့်ရာသီမှာ သူ့ရဲ့စာချုပ်သက်တမ်းနောက်ဆုံးနှစ်ကို ရောက်ရှိတော့မှာဖြစ်ပြီး သက်တမ်း မတိုးဘူးဆိုရင်တော့ အလွတ်ပြောင်းရွှေ့ခွင့်ပြုရမှာပါ။
ဒါပေမဲ့ မန်ယူအသင်းက ဟယ်ရီကိန်းကို ခေါ်ယူဖို့ ပစ်မှတ်ထားနေတာကြောင့် စပါးအသင်းက ပေါင်သန်း ၁၀၀ ရမယ်ဆိုရင် လက်လွှတ်ဖို့ ပြင်ဆင်ထားတယ်လို့ The Times သတင်းမှာ ဖော်ပြပါတယ်။
ဟယ်ရီကိန်းကိုခေါ်ယူဖို့ ဘိုင်ယန်မြူးနစ်နဲ့ ရီးရဲလ်မက်ဒရစ်အသင်းတွေကလည်း စိတ်ဝင်စားနေပမယ့် ကစားသမားကိုယ်တိုင်က အင်္ဂလန်မှာပဲ ဆက်ကစားချင်တယ်လို့ဆိုပါတယ်။
မန်ယူအသင်းကတော့ ကိန်းကို ဦးစားပေးခေါ်ယူဖို့ ပစ်မှတ်ထားပေမဲ့ အဆင်မပြေခဲ့ဘူးဆိုရင် နာပိုလီတိုက်စစ်မှူး အိုဆင်ဟမ်ကို ခေါ်ယူမယ်လို့ သိရပါတယ်။
