ကာတာကမ္ဘာ့ဖလားပြိုင်ပွဲဝင် အင်္ဂလန်အသင်းရဲ့ အုပ်စုနောက်ဆုံးပွဲစဉ်မှာ တိုက်စစ်မှူးဟာရီကိန်းနဲ့ ကွင်းလယ်လူဘယ်လင်ဂမ်တို့ကို အနားပေးသင့်ကြောင်း လက်ရွေးစင် ကစားသမားဟောင်း ဂျိုကိုးလ်ကတိုက်တွန်းပါတယ်။
အင်္ဂလန်အသင်းဟာ အုပ်စုနောက်ဆုံးပွဲစဉ်အနေနဲ့ နိုဝင်ဘာ ၃၀ ရက်နေ့မှာ ဝေးလ်အသင်းနဲ့ ယှဉ်ပြိုင်သွားရမှာပါ။
အဲဒီပွဲစဉ်မတိုင်ခင် ဂယ်ရီနဗီးလ်နဲ့အတူ စကိုင်းစပေါ့မှာ သုံးသပ်ရာမှာ ပွဲဆက်များနေတဲ့ ဟာရီကိန်း နဲ့ ဘယ်လင်ဂမ်တို့ကို အနားပေးသင့်ကြောင်း ဂျိုကိုးလ်ကတိုက်တွန်းခဲ့တာပါ။
ဒါ့အပြင် မေဆန်မောင့်နေရာမှာ ဖိုဒမ်ကို အသုံးပြုသင့်ပြီး တောင်ပံနှစ်ဖက်မှာ ဂရေးလစ်ရှ်နဲ့ ဆာကာ အထောင်တိုက်စစ်မှူး ရက်ရှ်ဖို့ဒ်၊ ဘယ်လင်ဂမ်နေရာမှာ ဟန်ဒါဆန်ကို ပြောင်းလဲ အသုံးပြုသင့်ကြောင်း ဂျိုကိုးလ်က တိုက်တွန်းသွားခဲ့ပါတယ်။
