ဟာဝိုင်အီကျွန်းပေါ်က ကမ္ဘာ့အကြီးဆုံး မာအူနာလိုအာ မီးတောင်ကြီးဟာ နှစ်ပေါင်း ၄၀ အတွင်း ပထမဆုံးအကြိမ်အဖြစ် နိုဝင်ဘာ ၂၈ ရက်က စတင်ပေါက်ကွဲခဲ့ပါတယ်။
ဒါဟာ သမိုင်းမှာ မီးတောင်ပေါက်ကွဲမှုမရှိတဲ့ အချိန်အကြာဆုံး မှတ်တမ်းဖြစ်ခဲ့သလို ဟာဝိုင်အီရဲ့ အကြီးဆုံးကျွန်းပေါ်က ညကောင်းကင်မှာ ငရဲမီးလို ဖိတ်ဖိတ်တောက်နေပြီး ချော်ရည်ပူတွေကတော့ ပြီးခဲ့တဲ့ တနင်္ဂနွေနေ့ ဒေသစံတော်ချိန် ည ၁၁ နာရီခွဲလောက်မှာ မီးတောင်ထိပ်ကနေ စီးကျလာပါတယ်။
လက်ရှိမှာ မီးတောင်ချော်ရည်ပူတွေဟာ တောင်ထိပ်မှာပဲ ရှိသေးတာကြောင့် တောင်ခြေက ဟာဝိုင်အီကျွန်းသားတွေကို အန္တရာယ်မပေးနိုင်သေးပေမဲ့ မီးတောင်ကထွက်လာတဲ့ ဓာတ်ငွေ့တွေနဲ့ ပြာမှုန့်တွေကတော့ လမ်းကြောင်းတလျှောက် ပျံ့နှံ့နိုင်တယ်လို့ အမေရိကန် ဘူမိဗေဒဌာနက သတိပေးထားပါတယ်။
ဟာဝိုင်အီ အရေးပေါ်အခြေအနေ စီမံခန့်ခွဲရေး အေဂျင်စီက ကြိုတင်ကာကွယ်တဲ့အနေနဲ့ ကျွန်းပေါ်မှာ ကယ်ဆယ်ရေးနေရာ ၂ ခု ဖွင့်လှစ်ထားပြီး ချော်ရည်ပူတွေဟာ လူနေထူထပ်တဲ့ ဧရိယာကို စီးဆင်းလာနိုင်တဲ့ အခြေအနေကို အထူးစောင့်ကြည့်နေပေမဲ့ ကျွန်းကနေစွန့်ခွာဖို့ အမိန့်ကိုတော့ ထုတ်ပြန်ခြင်း မရှိသေးပါဘူး။
