close

အကျဉ်းထောင်စစ်ဆင်ရေး

close

November 4, 2022

အီကွေဒေါထောင်တွင်းပစ်ခတ်မှုကြောင့် ရဲနှင့် လက်နက်ကိုင်တပ်ဖွဲ့ဝင် ၁၂ ဦး ဒဏ်ရာရ

အီကွေဒေါနိုင်ငံ၊ ဂိုင်ယာကေးလ်မြို့ရှိ အန္တရာယ်အရှိဆုံး အကျဉ်းထောင်တွင်း စစ်ဆင်ရေးမှာ အကျဉ်းသားတွေက ထောင်အရာရှိတွေကို ပစ်ခတ်ခဲ့တာကြောင့် ရဲတွေနဲ့ လက်နက်ကိုင် တပ်ဖွဲ့ဝင် ၁၂ ဦးထက် မနည်း ဒဏ်ရာရရှိသွားကြောင်း အကျဉ်းထောင်ဆိုင်ရာ အေဂျင်စီ SNAI က နိုဝင်ဘာ ၃ ရက်မှာ ပြောပါတယ်။

အရာရှိတွေရဲ့ ခက်ခက်ခဲခဲ ကြိုးစားအားထုတ်မှုကြောင့် အခြေအနေကို ထိန်းချုပ်နိုင်ခဲ့ကြောင်း ဂိုင်ယာကေးလ် ရဲတပ်ဖွဲ့မှ ရဲမှူး Victor Zarate က ပြောပါတယ်။

အကျဉ်းထောင်က လူ ၁,၀၀၀ လောက်ကို တခြားထိန်းသိမ်းရေးစခန်း ၂ ခုဆီ လွှဲပြောင်းပေးခဲ့တဲ့ နိုဝင်ဘာ ၁ ရက်က ရဲတပ်ဖွဲ့ကို သေနတ်နဲ့တိုက်ခိုက်မှု ၁၈ ခုထက်မနည်း ဖြစ်ပွားခဲ့ပြီး ရဲတွေကို ပစ်ခတ်ခဲ့ရာမှာ အရာရှိ ၅ ဦး သေဆုံးခဲ့ပါတယ်။

ဒါကိုတုံ့ပြန်တဲ့အနေနဲ့ သမ္မတ ဂီလာမို လာ့ဆိုက ၄၅ ရက်ကြာ အရေးပေါ်အခြေအနေနဲ့ ဂွိုင်ယာ့စ်နဲ့ အက်စ်မရဲလ်ဒါ ပြည်နယ်တွေမှာ ညမထွက်ရအမိန့် ကြေညာခဲ့တာပါ။

နိုဝင်ဘာ ၂ ရက်နေ့မှာ ဂိုင်ယာကေးလ် အကျဉ်းထောင်က လူဆိုးဂိုဏ်းတွေကြား ဖြစ်ပွားခဲ့တဲ့ ရန်ပွဲကြောင့် အနည်းဆုံး လူ ၂ ဦးသေဆုံးပြီး ၆ ဦး ဒဏ်ရာရခဲ့ပါတယ်။

ထောင်အပြောင်းအရွှေ့တွေဟာ အကျဉ်းသားဦးရေ များပြားမှုကို လျှော့ချဖို့နဲ့ အကျဉ်းသားတွေအတွက် အခြေအနေတွေ တိုးတက်စေဖို့ ကြိုးပမ်းမှုတခုဖြစ်ကြောင်း SNAI က ပြောပါတယ်။

အီကွေဒေါရဲ့ အကျဉ်းထောင်စနစ်ဟာ ဖွဲ့စည်းတည်ဆောက်ပုံဆိုင်ရာ ပြဿနာတွေကို ဆယ်စုနှစ်များစွာ ကြုံတွေ့နေရတာပါ။ ဒါပေမဲ့ အကျဉ်းထောင်တွင်း အကြမ်းဖက်မှုတွေဟာ ၂၀၂၀ ခုနှစ် နှောင်းပိုင်းက စတင်ကာ မြင့်တက်လာခဲ့တာကြောင့် အနည်းဆုံး လူ ၄၀၀ လောက် သေဆုံးခဲ့ရပြီး အကျဉ်းသားတွေရဲ့ မိသားစုတွေ စိုးရိမ်ပူပန်နေရပါတယ်။

2 mins Ago
Up