မန္တလေးတိုင်း၊ မိုးကုတ်မြို့အရှေ့ပိုင်း၊ ပတ္တမြားရပ်ကွက်မှာနေထိုင်တဲ့ အမျိုးသားတစ်ဦးကို ဒီကနေ့ မေ ၂၅ ရက်မှာ အကြမ်းဖက်စစ်အုပ်စုက လာရောက်ဖမ်းဆီးသွားပါတယ်။
အိမ်စီးကား အဖြူရောင်နဲ့အရပ်ဝတ်တွေနဲ့ လာဖမ်းတာဖြစ်ပြီး ဖမ်းဆီးစဉ်မှာလည်း ရိုက်တာ အကြမ်းဖက်တာတွေ လုပ်ဆောင်သွားတယ်လို့ ဒေသခံ တစ်ယောက်က ပြောပါတယ်။
ဘာကြောင့် ဘယ်ကို ဖမ်းဆီးသွားတယ်ဆိုတာနဲ့ ဖမ်းဆီးခံရသူနဲ့ ပတ်သက်တဲ့ အကြောင်းအရာတွေကိုတော့ စုံစမ်းလို့မရသေးပါဘူး။
မိုးကုတ်မြို့မှာ အကြမ်းဖက်စစ်အုပ်စုက သပိတ်မှာပါဝင်သူတွေ ၊ Defense Team ဝင်နဲ့ CDM သမားတွေကို ဆက်တိုက်ဖမ်းဆီးနေပေမဲ့ အရပ်ဝတ်နဲ့ ဖမ်းတာကတော့ အခု ပထမဆုံးအကြိမ်ဖြစ်ပါတယ်။
ရန်ကုန်တိုင်း၊ ဒဂုံဆိပ်ကမ်းမြို့နယ်၊ ယုဇနဥယျာဥ်အိမ်ရာက ကားအစီးရေ ၂၀ ကျော်ကို မတ် ၂၇ ရက်နေ့ညမှာ အကြမ်းဖက်စစ်အုပ်စုက စိတ်ကြိုက်ရိုက်ခွဲဖျက်ဆီးသွားတယ်လို့ ရပ်ကွက်နေပြည်သူတွေက ပြောပါတယ်။
မနေ့က မနက်သပိတ်ကို အကြမ်းဖက်ဖြိုခွင်းပြီးကတည်းက ညနေ ၅ နာရီအထိ အိမ်ရာအတွင်း လှည့်ပတ်သောင်းကျန်းခဲ့ကြတာပါ။
တာယာကွင်းတွေ မီးရှို့ပြီး လမ်းတွေမှာကာထားတဲ့ အကာအရံတွေကို ဘူဒိုဇာနဲ့ ထိုးချဖျက်ဆီးသွားတယ်လို့ သိရပါတယ်။ လမ်းတွေထဲက အိမ်တွေကို သေနတ်တွေနဲ့ချိန်ပြီး ဆဲဆိုကြိမ်းမောင်းသွားတယ်လို့လည်း ပြောပါတယ်။
ကနဦးအနေနဲ့ သေဆုံးသူ ၂ ဦးရှိတယ်လို့ သိရပြီး ဖမ်းဆီးခံရသူက ၁၅ ယောက်ကျော်လောက်ရှိတယ်လို့ သိရပါတယ်။
တစ်နေ့ကုန် အသံဗုံးတွေ၊ သေနတ်တွေနဲ့ စစ်မြေပြင်အလား ပစ်ခတ်နေပြီး မနက် ၄ နာရီကျော်မှ ရပ်နားကြတယ်လို့ ရပ်ကွက်နေပြည်သူတွေက DVB ကို ပြောပါတယ်။
