ရှမ်းပြည်နယ်တောင်ပိုင်း၊ တောင်ကြီးမြို့၊ ကျောင်းကြီးစုရပ်ကွက်မှာနေထိုင်တဲ့ သတင်းထောက် ဦးခိုင်မြင့်ထွန်း (ခ)ရွှေလင်းသစ်ကို စစ်ကောင်စီတရားရုံးကနေ ဧပြီ ၅ ရက်နေ့က ထောင်ဒဏ် ၁၀ နှစ် ချမှတ်လိုက်ပါတယ်။
ရွှေတြိဂံသတင်းဌာနမှာ သတင်းရေးသားခဲ့တဲ့ ကဗျာဝါသနာရှင်လည်းဖြစ်သူ သတင်းထောက် ဦးခိုင်မင်းထွန်းဟာ ၂၀၂၁ ခုနှစ်၊ ဇူလိုင် ၁၁ ရက်က နေအိမ်မှာဖမ်းဆီးခံရတာဖြစ်ပြီး ညောင်ရွှေ(တောင်သုံးလုံး) အကျဉ်းထောင်မှာ ချုပ်နှောင်ထားကာ အကြမ်းဖက်မှုတိုက်ဖျက်ရေးဥပဒေ ပုဒ်မ ၅၁(ဂ)နဲ့ သူ့ကို အမှုဖွင့်ပြီး အမြင့်ဆုံးပြစ်ဒဏ် ဖြစ်တဲ့ ထောင်ဒဏ် ၁၀ နှစ် ချမှတ်ခဲ့တာ ဖြစ်ပါတယ်။
စစ်အာဏာသိမ်းပြီးနောက်ပိုင်း ရှမ်းပြည်နယ်မှာ စစ်ကောင်စီက ဖမ်းဆီးထားတဲ့ သတင်းမီဒီယာသမား အမျိုးသား ၆ ယောက်နဲ့ အမျိုးသမီး ၄ ယောက် စုစုပေါင်း ၁၀ ယောက်ရှိပြီး အဲဒီထဲက ၆ ယောက်ကတော့ ထောင်ဒဏ်အသီးသီးကျခံနေရပြီး ၄ ယောက်ကတော့ အမှုရင်ဆိုင်နေရဆဲ ဖြစ်ပါတယ်။
ဒါ့အပြင် ရှမ်းပြည်နယ်အခြေစိုက် သတင်းဌာနတချို့နဲ့ သတင်းမီဒီယာသမားအများစုကိုလည်း စစ်ကောင်စီက ဖမ်းဆီးဖို့ ဝရမ်းထုတ်ထားတွေလည်း ရှိနေပါတယ်။
CRPH၊ PDF တို့ကို ငွေကြေးထောက်ပံ့တယ်ဆိုပြီး အကြမ်းဖက်မှုတိုက်ဖျက်ရေး ဥပဒေပုဒ်မနဲ့ တရားစွဲခံထားရတဲ့ ရခိုင်ပြည်လုံးဆိုင်ရာ လူငယ်များကွန်ရက် (AAYON) အဖွဲ့ဝင် တောင်ကုတ်လူငယ်ကွန်ရက် ဥက္ကဋ္ဌ ကိုမင်းကိုဦး အမှုနဲ့ပတ်သက်ပြီး လာမယ့်ရုံးချိန်းမှာ အပြီးသတ်လျှောက်လဲချက်ပေးသွားမယ်လို့ တရားရုံးနဲ့ နီးစပ်သူတဦးက ပြောပါတယ်။
“ဒီနေ့ ရုံးချိန်းမှာ ကိုမင်းကိုဦးဘက်က တင်ထားတဲ့ တရားခံပြ သက်သေတဦးကို ဆက်လက် စစ်ဆေးခဲ့တယ်။ ရုံးချိန်းကိုတော့ ဧပြီလ ၄ ရက်နေ့ကို ထပ်ချိန်းလိုက်တယ်၊ နှစ်ဖက်ရှေ့နေတွေက အပြီးသတ် လျှောက်လဲချက် ကြားနာမယ်။”
ကိုမင်းကိုဦးကို ပြည်ထောင်စုလွှတ်တော်ကိုယ်စားပြုကော်မတီ (CRPH)၊ ပြည်သူ့ကာကွယ်ရေးတပ်ဖွဲ PDF တွေကို ငွေကြေးထောက်ပံ့တယ်ဆိုပြီးတော့ ၂၀၂၁ ခုနှစ် ဒီဇင်ဘာ ၁၄ ရက်နေ့ မနက်ပိုင်းက တောင်ကုတ်မြိုမှာရှိတဲ့ သူ့ရဲ့နေအိမ်ကနေ ရဲတပ်ဖွဲဝင်တွေက လာရောက်ဖမ်းဆီးခဲ့တာပါ။
အဲဒီနောက် သူ့ကို တောင်ကုတ်မြိုနယ် မြိုမရဲစခန်းမှူး ဒုရဲမှူးဇော်လတ်က သံတွဲခရိုင်တရားရုံးမှာ တရားလိုလုပ်ပြီး အကြမ်းဖက်မှုတိုက်ဖျက်ရေး ဥပဒေပုဒ်မ ၅၀ (ည) နဲ့ တရားစွဲဆိုခဲ့တာလည်း ဖြစ်ပါတယ်။
PDF နဲ့ ဆက်စပ်တယ်ဆိုပြီး ကိုမင်းကိုဦး အပါအဝင် ရခိုင်ပြည်နယ်က ဖမ်းဆီးတရားစွဲခံထားရတဲ့ သူတွေကို ပြန်လွှတ်ပေးဖို AAYON က ၂၀၂၂ ခုနှစ် ဇန်နဝါရီ ၇ ရက်နေ့က ကြေညာချက်တစောင် ထုတ်ပြန်ခဲ့ပါတယ်။
ကိုမင်းကိုဦးဟာ တောင်ကုတ်မြိုမှာ ပရဟိတအလုပ်တွေနဲ့ ကိုဗစ်ကာလ ဆင်းရဲကျပ်တည်းသူတွေကို ကူညီဆောင်ရွက်ပေးနေတဲ့ လူငယ်တဦးလည်း ဖြစ်ပါတယ်။
ရခိုင်ပြည်နယ်မှာ PDF တွေနဲ့ ဆက်စပ်တယ်ဆိုပြီးတော့ ဖမ်းဆီးတရားစွဲခံထားရသူ ၁၂ ဦး အထိ ရှိလာပြီဖြစ်ပါတယ်။
