ဂျပန်ဝန်ကြီးချုပ်ဟောင်း ရှင်ဇိုအာဘေးရဲ့ နိုင်ငံတော်ဈာပနအခမ်းအနားကို မြန်မာနိုင်ငံမှ အာဏာသိမ်းအကြမ်းဖက်စစ်အုပ်စုကိုယ်စားပြုသူ တက်ရောက်တာကို လုံးဝခွင့်မပြုဖို့ တိုကျိုမြို့ ဂျပန်နိုင်ငံခြားရေးဝန်ကြီးဌာနရှေ့မှာ ဩဂုတ် ၅ ရက် ဒီနေ့ညနေပိုင်းက ဂျပန်ရောက် မြန်မာနိုင်ငံသားတွေ ဂျပန်၊ မြန်မာ၊ အင်္ဂလိပ် သုံးဘာသာနဲ့ ကြွေးကြော်သံတွေနဲ့ တောင်းဆို ဆန္ဒပြခဲ့ကြပါတယ်။
ဝန်ကြီးဌာနရုံးရှေ့ ဆန္ဒပြစဉ် ဂျပန်ရောက်မြန်မာနိုင်ငံသားများကိုယ်စား မြန်မာ့အရေး ဆောင်ရွက်နေကြတဲ့ စီဒီအမ်သံအရာရှိ ဦးအောင်စိုးမိုး၊ ဦးမြင့်ဆွေ၊ ဒေါက်တာခင်ဇေယျာမြင့်နဲ့ မလဲ့လဲ့လွင်တို့ ၄ ဦး ဝင်ရောက်တွေ့ဆုံကာ ရှင်းလင်းတင်ပြခဲ့ပြီး အရှေ့တောင်အာရှဆိုင်ရာ ဒုတိယညွန်ကြားရေးမှူး Mr.Takanori Hayashi က လက်ခံတွေ့ဆုံတယ်လို့ သိရပါတယ်။
အရင် ၁၉၈၉ ခုနှစ် စစ်အာဏာရှင်လက်ထက်ကလည်း ဂျပန်အစိုးရက ဖိတ်ခေါ်ပြီး စစ်အစိုးရကို ကမ္ဘာမှာ ပထမဆုံးအသိအမှတ်ပြုခဲ့တဲ့ အတွေ့အကြုံရှိခဲ့တာကြောင့် အခုဝန်ကြီးချုပ်ဟောင်း ဈာပနမှာ မြန်မာပြည်သူတွေ ဆန္ဒဖြစ်တဲ့ အကြမ်းဖက်စစ်ကောင်စီဝင်တဦးမျှ တက်ရောက်ခွင့်မပြုဖို့နဲ့ ခွင့်ပြုခဲ့ပါက နောင်တချိန် ဂျပန်-မြန်မာ ဆက်ဆံရေးမှာ အကြီးအကျယ် ထိခိုက်နိုင်ကြောင်း ပြင်းပြင်းထန်ထန် သတိပေးခဲ့တယ်လို့လည်း ရုံးအတွင်း ဝင်ရောက်တောင်းဆိုခဲ့သူ ဒေါက်တာခင်ဇေယျာမြင့်က ဒီဗွီဘီကို ပြောပါတယ်။
ဂျပန်နိုင်ငံခြားရေးရုံးတာဝန်ခံက စစ်ကောင်စီကို သံတမန်ဆက်ဆံရေးတွေ ရှိနေပါတယ်လို့ ပြန်ရှင်းပြပေမယ့် တကယ်က နိုင်ငံတကာကျင့်ဝတ် သံတမန်ကျင့်ဝတ်တောင် နားမလည် မလိုက်နာတဲ့ ဒီအကြမ်းဖက်စစ်ကောင်စီကို သံတမန်အဆင့် ဆက်ဆံဖို့မလိုကြောင်း ရှင်းပြခဲ့ကြောင်းလည်း ဂျပန်နိုင်ငံရှိ မြန်မာနိုင်ငံသားများကိုယ်စား ဝင်ရောက်တွေ့ဆုံခဲ့သူ တဦးဖြစ်တဲ့ စီဒီအမ်သံအရာရှိ ဦးအောင်စိုးမိုးက ဒီဗွီဘီကို ပြောပါတယ်။
အခုလို တောင်းဆိုမှုတွေကို ၁၇ နိုင်ငံက မြန်မာနိုင်ငံသားတွေ ဂျပန်သံရုံးတွေကို အခုအပတ်အတွင်း တပြိုင်နက် တောင်းဆိုသွားကြမှာဖြစ်ပြီး ဇူလိုင်လက ရွေးကောက်ပွဲမဲဆွယ်စဉ် လုပ်ကြံခံရသူ ဝန်ကြီးချုပ်ဟောင်း ရှင်ဇိုအာဘေးရဲ့ နိုင်ငံတော်ဈာပနကို လာမယ့်စက်တင်ဘာ ၂၇ ရက်နေ့ တိုကျိုမြို့မှာ ကျင်းပမှာဖြစ်ပြီး နိုင်ငံအသီးသီးမှ ခေါင်းဆောင်း၊ ကိုယ်စားလှယ်တွေ တက်ရောက်ကြမှာဖြစ်ပါတယ်။
ပြီးခဲ့တဲ့ ဇူလိုင်လထဲမှာ တနိုင်ငံလုံး တိုက်ပွဲနဲ့ပဋိပက္ခဖြစ်စဉ် ၃၅၀ ကျော်ဖြစ်ခဲ့ပြီး အကြမ်းဖက် စစ်ကောင်စီဘက်က အယောက် ၇၅၀ လောက် သေခဲ့တယ်လို့ အမျိုးသားညီညွတ်ရေးအစိုးရဲ့ ကာကွယ်ရေး ဝန်ကြီးဌာနက ထုတ်ပြန်ပါတယ်။
ဒီထဲမှာ လက်နက်ကိုင်တိုက်ပွဲ အကြိမ်ပေါင်း ၆၀ ၊ စစ်ကောင်စီရဲ့ လက်တံတွေ လုပ်ကြံခံရတာက ၈၇ ကြိမ်၊ လက်နက်ကိုင်ခုခံမှုက ၆၂ ခု၊ ပေါက်ကွဲမှုက ၇၅ ခု၊ အရပ်သားတွေအပေါ် အကြမ်းဖက်တာ ၆၉ ခု၊ ပေါက်ကွဲမှုက ၇၅ ခုနဲ့ စစ်ကောင်စီအချင်းချင်းပစ်ခတ်တာက ၂ ကြိမ်ပါဝင်ပါတယ်။
အများဆုံးဖြစ်ခဲ့တာကတော့ စစ်ကိုင်းတိုင်းဖြစ်ပြီး ၁၀၇ ကြိမ်ဖြစ်ခဲ့တာပါ။ ဒုတိယအများဆုံးက မန္တလေးတိုင်းမှာဖြစ်ပြီး ၄၄ ကြိမ်ဖြစ်ခဲ့ပါတယ်။ ပြီးတော့ ကချင်ပြည်နယ်မှာ အကြိမ် ၄၀၊ ရန်ကုန်တိုင်းမှာ ၃၅ ကြိမ်၊ မကွေးတိုင်းမှာ ၂၂ ကြိမ်၊ ရှမ်းပြည်နယ်မှာ အကြိမ် ၂၀ နဲ့ အများဆုံးဖြစ်ခဲ့ပြီး ရခိုင်ပြည်နယ်မှာတော့ ၂ ကြိမ်ပဲဖြစ်ခဲ့လို့ အနည်းဆုံးဖြစ်ပါတယ်။
ဒီဖြစ်စဉ်တွေကြောင့် စစ်ကောင်စီဘက်က ၇၄၃ ယောက် သေဆုံး၊ ၃၆၉ ယောက် ဒဏ်ရာရပြီး ပြည်သူတွေဘက်က ၁၉၉ ယောက် သေဆုံး၊ ၄၇ ယောက် ဒဏ်ရာရခဲ့ပါတယ်။
ရန်ကုန်တိုင်းမှာ ပေါက်ကွဲမှု အများဆုံးဖြစ်ပြီး ၁၈ ကြိမ်ဖြစ်ခဲ့ပါတယ်။ စစ်ကိုင်းတိုင်းမှာတော့ စစ်ကောင်စီ ဘက်သားတွေကို လုပ်ကြံတာနဲ့ လက်နက်ကိုင် ခုခံတာ ၃၆ ကြိမ်စီနဲ့ အများဆုံးဖြစ်ခဲ့ပါတယ်။
ပြည်တွင်း သတင်းမီဒီယာ ၃၀ မှာ ဖော်ပြထားတဲ့ အချက်အလက်တွေကို အခြေခံပြုစုထားတာဖြစ်ပြီး တကယ့်မြေပြင်မှာတော့ ဒါထက်ပိုနိုင်တယ်လို့ ဆိုပါတယ်။
