မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေရဲ့ အကြမ်းဖက် ပစ်ခတ် သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၂၇၆ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၅၃၅ ယောက်ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။
ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ စက်တင်ဘာ ၁၄ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။
နွေဦးတော်လှန်ရေးကာလအတွင်း ဒီနေ့အထိ ၁၂,၄၀၁ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၄၇၂ ယောက်ကတော့ ထောင်ဒဏ် ချမှတ်ခံထားရပါတယ်။
တော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူအရေတွက်ကတော့ ၈၄ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၂၆ ယောက် ရှိလာခဲ့ပြီဖြစ်ပါတယ်။
လတ်တလောအချိန်ထိ အာမခံနဲ့ လွတ်မြောက်သူ ၂၂ ယောက်ရှိပြီး ပြန်လည်လွတ်မြောက်လာသူဦးရေကတော့ ၃,၁၁၂ ယောက် ရှိခဲ့တယ်လို့ ဆိုပါတယ်။ ဒါ့အပြင် အေအေပီပီကနေ လက်လှမ်းမီသမျှ မှတ်တမ်း ပြုစုထားချက်အရ အာဏာသိမ်းချိန်ကနေ ပြီးခဲ့တဲ့ ဩဂုတ်လကုန်ထိ အကြမ်းဖက်စစ်အုပ်စုက မတရားချိပ်ပိတ်သိမ်းဆည်းခဲ့တဲ့ နေအိမ်၊ အဆောက်အဦ အရေအတွက် စုစုပေါင်း ၇၆၀ ခုထက်မနည်းရှိခဲ့တယ်လို့ ဆိုပါတယ်။
စစ်ကိုင်းတိုင်း၊ ကန့်ဘလူမြို့နယ်၊ ဇီးကနားကျေးရွာမှာ နေထိုင်တဲ့ အသက် ၁၇ နှစ်အရွယ် မသဇင်မိုးကို အကြမ်းဖက်စစ်အုပ်စုတပ်က ပြီးခဲ့တဲ့ စက်တင်ဘာ ၈ ရက်နေ့ကတည်းက ဖမ်းဆီးသွားခဲ့တယ်လို့ သိရပါ တယ်။ မသဇင်မိုးဟာ တက္ကသိုလ်ဝင်တန်းကျောင်းသူ တယောက်ဖြစ်ပြီး သူဖမ်းဆီးခံရတဲ့ နေ့မှာပဲ ဖမ်းဆီးခံခဲ့ရတဲ့ ရွာသားတချို့ကို စက်တင်ဘာ ၉ ရက်က ပြန်လည်လွှတ်ပေးခဲ့ပေမယ့် သူနဲ့ တခြားရွာသား ၃ ယောက်ကို ဆက်လက်ချုပ်နှောင်ထားဆဲဖြစ်တယ်လို့ သိရပါတယ်။
ဒါ့အပြင် စက်တင်ဘာ ၁၂ ရက်ညနေ ၅ နာရီလောက်ကလည်း စစ်ကိုင်းတိုင်း၊ ကောလင်းမြို့နယ်၊ ဇီးကုန်းကျေးရွာကို အကြမ်းဖက်စစ်အုပ်စုရဲ့ တပ်က စစ်ကြောင်းထိုးကာ ရောက်ရှိလာခဲ့ပြီး ဒေသခံ အမျိုးသား ၂ ယောက်ကို ဖမ်းဆီးပြီးနောက် ပစ်သတ်ခဲ့တယ်လို့ သိရပါတယ်။ အဆိုပါအမျိုးသား ၂ ယောက်ဟာ အာဏာဖီဆန်ရေးလှုပ်ရှားမှု (CDM) ပြုလုပ်ထားတဲ့ ကျောင်းဆရာ ကိုချမ်းသာနဲ့ အရပ်သား ကိုသိန်းဇော်တို့ဖြစ် တယ်လို့ သိရပါတယ်။
အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။
ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။
စစ်ကိုင်းတိုင်း၊ ကလေးမြို့နယ်မှာ ဩဂုတ် ၁၆ ရက် မနက်က ဒေသကာကွယ်ရေး ပြောက်ကျားတပ်ဖွဲ့စခန်းတစ်ခုကို စစ်ကောင်စီတပ်က ဝင်ရောက်စီးနင်းမီးရှို့သွားပါတယ်။
စစ်ကောင်စီတပ်ဖွဲ့ဟာ အင်အား ၅၀ လောက်နဲ့ ဝင်ရောက်စီးနင်းခဲ့တာဖြစ်ပြီး စခန်းအတွင်းက လက်လုပ်ရိုင်ဖယ် ၁ လက်၊ ဖုန်းနဲ့ ပစ္စည်းတချို့ကို ဆုံးရှုံးခဲ့ရတယ်လို့ ကလေးမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။
ကလေးမြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း ၂ တာဝန်ရှိသူတစ်ဦးက “ရုတ်တရက် လက်နက်အင်အားရော၊ လူအင်အားရော မမျှလို့ ရှောင်ပေးလိုက်ရတဲ့ သဘောပါ။ တပ်ဖွဲ့ဝင်တွေကတော့ အထိအခိုက်မရှိ လွတ်မြောက်ခဲ့တယ်။ တပ်ဖွဲ့အင်အားဖြည့်ပြီး ပြန်တိုက်မယ်လုပ်တော့ ဒီကောင်တွေက ပြေးပြီ”လို့ ပြောပါတယ်။
စစ်ကောင်စီတပ်ဖွဲ့ဟာ စစ်ကြောင်းထိုးလာစဉ် လေးအိမ်စုကျေးရွာအနီး လယ်တောအတွင်း အလုပ်လုပ်နေတဲ့ တောင်သူနှစ်ဦးကို အကြောင်းမဲ့ပစ်သတ်သွားပြီး လေးအိမ်စုကျေးရွာအတွင်းက နေအိမ် ၂ လုံးကိုလည်း မီးရှို့သွားခဲ့တယ်လို့ သိရပါတယ်။
အဲ့ဒီနောက် ဒေသကာကွယ်ရေးတပ်ဖွဲ့တွေက အင်အားဖြည့်ပြီး စစ်ကောင်စီတပ်ဖွဲ့စစ်ကြောင်းကို ပြန်လည်တိုက်ခိုက်ဖို့ လေးအိမ်စုကျေးရွာကို ချဥ်းကပ်ခဲ့ပေမယ့် စစ်ကောင်စီတပ်ဖွဲ့ဟာ လက်ပံခုံကျေးရွာမှတဆင့် ကလေးမြို့ဒေသကွပ်ကဲမှုစစ်ဌာနချုပ်အတွင်း ဆုတ်ခွာသွားတဲ့အတွက် တိုက်ပွဲမဖြစ်ခဲ့ဘူးလို့ ဆိုပါတယ်။
ကလေးမြို့နယ်မှာ ဩဂုတ် ၂ ရက်နဲ့ ၃ ရက်နေ့တွေကလည်း ပြည်သူ့ကာကွယ်ရေး ပူးပေါင်းတပ်ဖွဲ့တွေနဲ့ စစ်ကောင်စီတပ်ဖွဲ့တွေ သာယာကုန်းကျေးရွာအနီးမှာ ၂ ရက်ကြာ တိုက်ပွဲပြင်းထန်စွာ ဖြစ်ပွားခဲ့ပါတယ်။
